सिओल- संयुक्त कोरियाली महिला आइस हक्की टोलीले शीतकालीन ओलम्पिकको पहिलो खेलमा नै पराजय भोगेको छ। शुक्रबारबाट दक्षिण कोरियाको प्योङचाङमा सुरु भएको ओलम्पिकको पहिलो दिनको खेलमा नै कोरियाली टोलीले स्विजरल्यान्डसँग ८–० को फराकिलो हार व्यहोरेको हो।
क्वानदोङ हक्की केन्द्रमा सन् २०१४ को रजत पदक विजेता टोली स्विजरल्यान्डसँग पराजय भोगे पनि सो खेललाई ऐतिहासिक खेलको रुपमा हेरिएको छ।
ओलम्पिकमा सहभागिताको बारेमा दुई कोरियाबिचको उच्चस्तरीय वार्तामा भएको सहमतिअनुसार नै उद्घाटन सत्रमा दुबै कोरियाली टोलीले संयुक्त झन्डामुनि मार्चपास गरेका थिए। यसपटक दुबै टोलीले खेलका क्रममा पनि संयुक्त झन्डा नै प्रयोग गर्नेछन्।
सोहि सहमतिअनुसार महिला आइस हक्की टोलीमा दुबै देशका खेलाडीलाई संलग्न गराएर संयुक्त टोली बनाइएको थियो। जम्मा २३ खेलाडी रहेको संयुक्त हक्की टोलीमा १२ खेलाडी उत्तरका छन् भने कम्तिमा ३ उत्तरका खेलाडी अनिवार्य रुपमा एरिना(हक्की खेल्ने मैदान)मा उत्रनुपर्ने सहमती बनेको थियो।
खेलमा स्विजरल्यान्डकी एलिना मुलरले पहिलो र दोस्रो हाफमा गरी २ ह्याट्रिक गरेकी थिइन्। बाँकी २ गोल भने फोबे स्टान्ज र लारा स्टरडेरको नाममा रह्यो।
खेल अवधिभर स्विस टोलीले कोरियाली पोष्टमा ५२ पटकसम्म गोलका लागि प्रहार गर्दा कोरियाली टोलीले मात्र ८ पटक मात्रै सो अवसर सिर्जना गरेको थियो। तर प्राप्त अवसरलाई सदुपयोग गर्न नसक्दा खेलअवधीभर निरीह देखिएको कोरियाली टोली ऐतिहासिक खेलमा गोल गर्नबाट चुक्यो।
सो ऐतिहासिक खेल हेर्न रंगशालामा अन्तर्राष्ट्रिय ओलम्पिक कमिटिका अध्यक्ष थोमस बच, दक्षिण कोरियाका राष्ट्रपति मुन जाइ–इन, उत्तर कोरियाको तर्फबाट संवैधानिक संसद प्रमुख किम योङ नाम तथा उत्तर कोरियाली नेता किम जोङ उनकी बहिनी तथा सत्तारुढ दल लेवर्स पार्टीको केन्द्रिय समितिकी उप–निर्देशक किम यो जोङलगायत उच्चस्तरिय अधिकारीहरुको उपस्थिती रहेको थियो।
संयुक्त टोलीको निर्माण गर्दा खेलाडी छान्न नै त्यति सहज नभएको र प्रशिक्षक सराह मुर्रेलाई प्रशिक्षणका दौरानमा भाषाका कारण निर्देशन दिन अप्ठेरो भएकोले पनि खेलाडीहरुको मैदानमा राम्रो प्रदर्शन गर्न नसकेको औँल्याइएको छ।
यसअघि टोलीले आफ्नो पहिलो मैत्रीपूर्ण खेलमा पनि स्विडेनसँग ३–१ ले पराजय भोगेको थियो।
संयुक्त झण्डाका साथ घरेलु टोलीलाई समर्थन तथा खेलाडीको हौसला बढाउन ठूलो संख्यामा रंगशाला पुगेका कोरियाली दर्शक प्याराफिटबाट निराश हुदैँ फर्किएका थिए।
रातो सुटमा सजिएका करिब १ सयभन्दा बढी उत्तर कोरियाली चेयर लिडरले रंगशालामा उत्तर कोरियाकै पप गीत गाएर संयुक्त टोलीको हौसला बढाएको दृश्य हेर्नलायकको देखिन्थ्यो।
रंगशालामा उपस्थित भएर खेल हेरिरहेका दर्शकले संयुक्त टालीको खेल हेर्न पाएकोमा आफुलाई निकै भाग्यमानी ठानेको बताएका थिए।
यसअघि आयोजक राष्ट्र दक्षिण कोरियाका लागि लिम ह्यो–जुनले सर्ट ट्रयाक स्पिड स्केटरमा पहिलो स्वर्ण दिल्याएकी थिइन्।
तर प्रतियोगिताको पहिलो स्वर्ण भने स्विडेनका चारलोटे कालाको नाममा दर्ता भयो। उनले महिला स्काइथलन स्पर्धामा पहिलो स्थान प्राप्त गरिन्। सोहि स्पर्धामा नर्वेली म्यारिट जोर्जेनले रजत पदक हात पार्दै ओलम्पिकको इतिहासमा सर्वकालिक बहुप्रतिभाशाली महिला खेलाडी बन्न पुगेकी छन्।
प्रतियोतिाअन्तर्गत आज दोस्रो दिनको खेल चलिरहँदा जर्मनी २ स्वर्णका साथ शिर्षस्थानमा छ। १ स्वर्ण जितेको नेदरल्यान्ड कुल ४ पदकसहित दोस्रो स्थानमा रहँदा आयोजक दक्षिण कोरिया, स्विडेन तथा अमेरिकाले १ स्वर्ण प्राप्त गरेका छन्।
हालसम्म कुल ९ राष्ट्र तथा १ स्वतन्त्र खेलाडीले पदक प्राप्त गर्न सकेका छन्।
प्रस्तुतिः विमर्श कँडेल
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
