सिमरा– आयोजक नवजनजागृती युवा क्लबलाई टाइब्रेकरमा पराजित गर्दै मोरङ्ग फुटबल क्लब विराटनगर सिमरामा जारी नवौं रुस्लान सिमरा गोल्डकपको सेमिफाइनलमा प्रवेश गरेको छ।
शनिबार भएको पहिलो क्वाटरफाइनलमा आयोजक विरुद्ध टाइब्रेकरमा ४–१ को जित निकाल्दै मोरङ पहिलो सहभागितामै प्रतियोगिताको सेमिफानलमा पुग्न सफल भयो।
टाइब्रेकरमा मोरङका निरज बस्नेत, बुद्धिमान राई, विक्रम लिम्बु र दिपक राईले गोल गरे भने आयोजक नवजनजागृतीका विजय श्रेष्ठ बाहेक अन्य खेलाडीले गोल गर्न सकेनन्।
टाइब्रेकरमा आयोजकका मानबहादुर तामाङ र शौरभ मगरको प्रहारले पोष्टको दिशा लिन नसक्दा घरेलु समर्थकका माझ आयोजक निराश बन्यो।
निर्धारित ९० मिनटको खेल १–१ गोलको बराबरीमा सकिएपछि खेल टाइब्रेकरमा धकेलियो। समय अभावका कारण थप समयको खेल नगराई सिधै टाइब्रेकरबाट नतिजा निकालिएको हो।
यसअघि खेलको ६५ औं मिनटमा नवजनजागृतीका विजय श्रेष्ठ र ७५ औं मिनटमा मोरङ्गका भुवन बस्नेतले एक एक गोल गरेका थिए।
६५ औं मिनटमा अफ्रिकि खेलाडी भिक्टरको प्रहार मोरङका डिफेन्डर सुरेन खवासले बचाउ गर्दा रिवाउण्ड बललाई आयोजकका विजय श्रेष्ठले गोलमा परिणत गरे। डि–एरियामा पाएको अवसर सदुपयोग गर्दै विजयले टिमलाई अग्रता दिलाए। ७५ औं मिनटमा योगेश गुरुङको पास सदुपयोग गर्दै भूवन बस्नेतले बराबरी गोल गरे।
खेलको म्यान अफ दि म्याच नवजनजागृतीका सुरजसिंह ठकुरी घोषित भए। आइतबार नेपाल आर्मीको त्रिभूवन आर्मी क्लब र सशस्त्र प्रहरीको नेपाल एपिएफ क्लबबीच दोश्रो क्वाटरफाइनल खेल हुनेछ।
मोरङले अब सोमबार हुने थ्रीस्टार र सुदुरपश्चिम ११ बीचको विजेता संग फाईनल प्रवेशका लागि खेल्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
