काठमाडौं– नेपाल क्रिकेट संघ (क्यान) को निर्वाचन मार्च अन्तिमसम्म सकिने अन्तर्राष्ट्रिय क्रिकेट काउन्सिल (आइसिसी) जनाएको छ।
आइसिसीले शुक्रबार जारी गरेको मिडिया रिलिज अनुसार नेपाल क्रिकेट विवाद समाधानका लागि मार्चसम्म केन्द्रिय समितिको निर्वाचन सकिने छ। आइसिसीको यसै साता बसेको बोर्ड बैठकपछि क्यान निर्वाचनको समयसीमा तोकिएको हो।
'मार्चसम्म संशोधित विधान लागु गर्ने सहमति भएको छ,' आइसिसीको मिडिया रिलिजमा भनिएको छ, 'सदस्यताको आधार निर्धारण गर्न सहमति भएको छ। त्यसपछि जिल्ला, प्रदेश र केन्द्रीय समितिको निर्वाचन हुनेछ। निर्वाचन मार्चको अन्तिमसम्म सकिने अनुमान छ।' निर्वाचनको आधारमा क्यान माथिको निलम्बन फुकुवा गर्न जुनमा हुने साधारणसभा प्रस्ताव लैजाने आइसिसीले जनाएको छ।
आइसिसीले बोर्ड बैठकमा नेपाली क्रिकेट विवाद समाधानको विषयमा भएको प्रगति विवरण पेश गरिएको थियो।
आइसिसीको रिलिज :
अब क्यानले केहि दिनमै विशेष साधारणसभा मार्फत विधान पारित गर्नेछ। त्यसपछि निर्वाचन प्रक्रिया अघि बढ्नेछ। यसअघि निर्वाचन भइसकेका जिल्ला क्रिकेट संघलाई मान्यता दिन आइसिसीले यसअघिनै सहमति जनाइसकेको छ। उजुरी परेका केहि जिल्ला भने मोनिटरिङ कमिटीले छानविन गर्नेछ। तर अहिलेसम्म कुनै पनि जिल्लामा उजुरी नपरेको राष्ट्रिय खेलकुद परिषद्ले जनाएको छ।
यसअघिक्यानको विवाद र निलम्बन फुकुवा गर्ने विषयमा आइसिसीका कार्यवहाक अध्यक्ष इमरान ख्वाजासहितको प्रतिनिधि मण्डलले माघ दोस्रो साता छलफल गरेको थियो। प्रतिनिधि मण्डलले निर्वाचित क्यान तथा सल्लाहकार समूहसहित राखेपका सदस्यसचिव केशव विष्टसँग बैठक गरेको थियो।
छलफलपछि सल्लाहकार समितिले बनाएको पुरानै विधान पारित गर्ने र निर्वाचनका लागि मोनिटरिङ समिति बनाउने सहमति भएको थियो। समितिमा ३ जना आइसिसीका सदस्य हुनेछन् भने निर्वाचित क्यान र परिषद्का १–१ जना सदस्य रहनेछन्।
निर्वाचन भइसकेको जिल्लालाई पनि मान्यता दिने सहमति भएको राष्ट्रिय खेलकुद परिषद्लका सदस्यसचिव केशव विष्टले बताएका थिए।
विवादित जिल्लामा मोनिटरिङ कमिटीले मान्यता दिन वा फेरि निर्वाचन गर्न निर्देशन दिन सक्नेछ।
निर्वाचित क्यानका महासचिव अशोकनाथ प्याकुरेलले क्यानमाथि लागेको निलम्बन फुकुवा हुने अवस्थामा आइसिसीको शर्त मान्न तयार भएको बताउँदै आएका छन्।
यसअघि साउनमा अन्तर्राष्ट्रिय क्रिकेट काउन्सिल (आइसिसी) ले गठन गरेको सल्लाहकार समितिले बनाएको विधान क्यानको विशेष साधारण सभाले संशोधनसहित पारित गरेको थियो। खेलकुद परिषदले क्यानको संशोधित विधानलाई स्विकृति प्रदान समेत प्रदान गरेको थियो।
संसोधित विधानअनुसार ८ कात्तिकभित्र जिल्ला क्रिकेट संघको निर्वाचन भएको थियो। तर ८ मंसिरसम्म गर्नु पर्ने प्रदेश संघ निर्वाचन भने नगर्न आइसिसीले क्यानलाई पत्राचार गरेको थियो।
अन्तरिक विवाद र सरकारी हस्तक्षेप भएको भन्दै आइसिसीले क्यानलाई ०७३ बैशाखमा निलम्बन गरेको थियो । त्यसपछि आइसिसीले विवाद समाधानका लागि सल्लाहकार समूह गठन गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
