काठमाडौं- प्रिन्सा अटोमोबाइल्सले भित्र्याएको अउडीको इलेक्ट्रिक कार अवैध भएको खुलेको छ। यो कार भित्र्याउँदा प्रिन्साले आर्थिक ऐनका व्यवस्था तथा प्रावधान पूरा नभएको फेला परेको हो। प्रिन्साले उत्पादक कम्पनी वा उसले तोकेको एजेन्टसँग नभई तेस्रो पक्षसँग गाडी खरिद गरेको ल्याएको पाइएको छ।
प्रिन्सा अटोमोबाइल्सले बेलायतको आयात/निर्यात कम्पनी जेमसन कार्टर लिमिटेड मार्फत आयात गरेको छ। यो कम्पनी अउडीको आधिकारिक डिलर पनि होइन र इ–ट्रोन उत्पादकसमेत होइन। उक्त कम्पनीले अउडीले बेलायतमा बिक्रीका लागि उपलब्ध कार प्रिन्सा अटोमोबाइल्सलाई बिक्री गरेको देखिन्छ। नेपाल लाइभले प्राप्त गरेको जेमसन कार्टरको इनभ्वाइस २०१९ जुन २५ मा जारी भएको छ।
नेपालका कानुन अनुसार उत्पादक कम्पनी वा कम्पनीले तोकेको एजेन्ट मार्फत मात्र खरिद गरेर ल्याउन पाइन्छ। त्यसरी नयाँ सवारी खरिद गरेर ल्याउने कम्पनी नेपालका लागि आधिकारिक बिक्रेता समेत तोकिएको हुनुपर्छ।
सरकारले २०७६/७७ का लागि ल्याएको आर्थिक विधेयको दफा १२ मा सवारीसाधन पैठारी सम्बन्धी विशेष व्यवस्था गरेको छ।
उक्त दफाको उपदफा १ मा सवारी वा ढुवानीका साधनहरु पैठारी गर्दा देहायका शर्तहरु पालना गर्नु पर्नेछ लेखिएको छ। जसको बुँदा क मा निर्माता कम्पनी वा निजको आधिकारिक बिक्रेताबाट खरिद गरिएका नयाँ सवारी वा ढुवानीका साधनहरु नेपालस्थित आधिकारिक बिक्रेताहरुले मात्र पैठारी गर्न पाउने छन्।
त्यस्तै सोही उपदफाको बुँदा 'ङ' मा ‘यस उपदफको खण्ड क वा खण्ड ख मा उल्लिखित शर्तहरु उल्लंघन गरी पैठारी गरिएको सवारी वा ढुवानीका साधनहरु जफत गर्न सकिने छ’ उल्लेख गरिएको छ।
वीरगञ्जस्थित सुख्खा बन्दरगाह भन्सार कार्यालयका प्रमुख उमेश श्रेष्ठले भने यातायात व्यवस्था विभाग र वाणिज्य विभागले उपलब्ध गराएको कागजातअनुसार नै आफूहरुले सवारी साधनको भन्सार पास गराएको जानकारी दिए।
'हामीले कागजात हेरेरै पास गरेका हौँ, आवश्यक परे फेरि अनुसन्धान गर्न सकिन्छ,' उनले भने, 'आयातकर्ताले कुनै कमजोरी गरेको पाइएमा भन्सार ऐनबमोजिम कारबाही प्रक्रिया अघि बढ्छ।'
आफूहरुले अउडीको इलेक्ट्रिक कार बेलायतको जेमसन कार्टर लिमिटेडसँग खरिद गरेको प्रिन्सा अटोमोबाइल्सका म्यानेजर हिमांशु गर्गले बताए। अउडीले प्रिन्सालाई आधिकारिक बिक्रेता तोकिएको बताए पनि उनले ठोस कुरा बताउन सकेनन्। अउडीले आफ्नो आधिकारिक बिक्रेता भएको देशको नाम आफ्नो वेभसाइटमा राखेको छ। नेपालको नाम अउडीको वेबसाइटमा उल्लेख नभएकाले पनि प्रिन्साले उक्त गाडी तेस्रो पक्षसँग खरिद गरेको प्रष्ट हुन्छ।
उनीसँग नेपाल लाइभले थप जिज्ञासा राख्दा उनले प्रतिक्रिया दिन चाहेनन्। सबै कुरा आफूलाई थाहा नभएको र बुझेर थप जानकारी दिने बताएका गर्ग मंगलबारदेखि सम्पर्कमा आउन चाहेनन्।
प्रिन्साले ल्याएको अउडीका इलेक्ट्रिक कारमा कम्पनीले प्रति कार ४६ लाख रुपैयाँभन्दा बढी नाफा राखेको छ। प्रिन्साले अउडी इ–ट्रोनको भन्सार घोषणा मूल्य ७२ हजार ४ सय ५० पाउन्ड स्टर्लिङमा खरिद गरेको हो। भन्सार महसुललगायत सबै करसहित कारको मूल्य १ करोड २८ लाख ७२ हजार ८ सय ६२ रुपैयाँ हुन्छ।
कम्पनीले एउटा कार १ करोड ७५ लाख रुपैयाँमा बिक्री गरेको छ। नेपाल लाइभलाई प्राप्त अउडी इ–ट्रोनको भन्सार प्रज्ञापनपत्र र प्रिन्सा अटोमोबाइल्सले कार बिक्रीपछि उपभोक्तालाई दिएको बिलका आधारमा यो तथ्य खुलेको हो। प्रिन्सा अटोमोबाइल्सले प्रति गाडी ४६ लाख २७ हजार १ सय ३८ रुपैयाँ नाफा राखेको छ। प्रिन्साले पहिलो चरणमा ३ वटा इ–ट्रोन नेपाल ल्याएको हो। नोपल भित्रिएका ३ वटै कार बिक्री भइसकेको छ।
सरकारले वातावरणमैत्री सवारीलाई प्रोत्साहन दिने उद्देश्यले विद्युतीय सवारीमा लाग्ने अन्तःशुल्क मिनाहा गर्दै १० प्रतिशतमात्र भन्सार लाग्ने व्यवस्था गरेको छ। त्यस्तै इलेक्ट्रिक कारमा १३ प्रतिशत मूल्य अभिवृद्धि कर र ४ प्रतिशत सडक मर्मत तथा सम्भार दस्तुर लाग्दै आएको छ। यसका साथै इलेक्ट्रिक सवारीमा ब्लुबुक नवीकरणबाहेकका अन्य वार्षिक सवारी कर नलाग्ने व्यवस्था सरकारले गरेको छ।
थप समाचार
पहिलो पटक भित्रियो जर्मन विलासी कार अउडी
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
