काठमाडौं- नेपालमा पहिलो पटक जर्मन विलासी कार निर्माता कम्पनी अउडीका कार भित्रिएका छन्। अउडीका ३ इलेक्ट्रिक कार भन्सार जाँसपासका लागि यातायात व्यवस्था विभागमा प्रस्ताव पेश भएको छ।
विभागले आयातकर्ता कम्पनी प्रिन्सा अटोमोटिभ प्रालिलाई कार आयात गर्न आवश्यक प्रक्रिया पूरा गरी पत्र पठाएको छ। इलेक्ट्रिक कार भएकाले नेपाल सवारी प्रदूषण मापदण्ड, २०६९ आकर्षित हुनेछैन भनी मापदण्डमा लेखिएको छ।
तर नेपालमा इलेक्ट्रिक सवारी साधन दर्ता, सञ्चालन तथा बिक्री गर्न 'रोड वर्दिनेस टेस्ट' गर्नुपर्ने व्यवस्था छ। उक्त टेस्ट भएपछि मात्र दर्ता, सञ्चालन तथा बिक्री गर्न पाइने व्यवस्था छ। विभागले प्रिन्सा अटोमोटिभलाई भन्सार कार्यालय सिर्सिया पर्साबाट छुटाउन अनुमति दिएको हो।
अउडीका इलेक्ट्रिक कार इ–ट्रोन भन्सार पाँचपास, रोड वर्दिनेस टेस्टलगायत प्रक्रिया पुर्याई काठमाडौं आइपुग्न एक महिनाभन्दा बढी समय लाग्ने आयातकर्ता कम्पनी स्रोतले जानकारी दिएको छ।
नेपालमा इलेक्ट्रिक कारमा १० प्रतिशत भन्सार र १३ प्रतिशत मूल्य अभिवृद्धि कर मात्र लाग्दै आएको छ। डिजेल/पेट्रोलबाट चल्ने कारमा मूल्यको करिब ८० प्रतिशत भन्सार, ६० देखि १०० प्रतिशतसम्म अन्तःशुल्क, १३ प्रतिशत मूल्य अभिवृद्धि कर र ८ प्रतिशत सडक मर्मत तथा सम्भार दस्तुर लाग्दै आएको छ।
सरकारले इलेक्ट्रिक सवारी प्रवर्द्धन गर्ने उद्देश्यले कर छुट दिएकाले पछिल्लो समय विभिन्न ब्रान्डका इलेक्ट्रिक सवारी नेपाल भित्रिने क्रम तीव्र भएको छ।
अमेरिकामा अउडीको इन्ट्रिलेवल इलेक्ट्रिक कार अउडी इ–ट्रोनको मूल्य ७४ हजार ८ सय अमेरिकी डलर छ। त्यस्तै भारतीय बजारमा यो कारको मूल्य ५४ लाखदेखि ५६ लाख भारतीय रुपया पर्ने भारतीय मिडियाले उल्लेख गरेका छन्। यो कारको नेपाली बजार मूल्य सवा करोड रुपैयाँ पर्ने अनुमान गरिएको छ।
अउडी इ–ट्रोन भारतीय बजारमा २०१९ को डिसेम्बरमा सार्वजनिक हुने कम्पनीले जनाएको छ।
के हो अउडी?
अउडी जर्मन विलासी कार उत्पादक कम्पनी हो। यसको स्थापना १ सय ९ वर्ष अघि अर्थात् सन् १९१० अप्रिलमा भएको थियो। हाल अउडी जर्मन अटोमोबाइल निर्माता फक्सवागन ग्रुपसँग रहेको छ। अउडीका कार हाल ९ देशका विभिन्न ११ फ्याक्ट्रीबाट उत्पादन भइरहेको छ।
अउडी इ–ट्रोन
अउडी इ–ट्रोन कम्पनीको पहिलो इलेक्ट्रिक कार हो। यो कार कम्पनीले पहिलो पटक २०१८ को जेनेभा इन्टरनेसनल मोटर सोमा सोकेस गरेको थियो। अउडी इ–ट्रोन क्रसओभर समेगमेन्टको इलेक्ट्रिक कार हो।
अउडी इ–ट्रोन कार अउडी क्यू-५ र अउडी क्यू-७ बीचको कार हो। यो कार ४९ सय १ एमएम लेन्थ, १९ सय ३५ एमएम वाइड र १६ सय १६ एमएम हाइट रहेको छ।
अउडीका अन्य एसयुभीमा जस्तै विशेषता हुने गरी कम्पनीले इ–ट्रोनमा २९ सय २८ एमएम ह्वीलवेस दिएको छ। त्यस्तै यो कारमा ६ सय ६० लिटर बुट स्पेश रहेको छ।
यो कारमा दुई वटा इलेक्ट्रिक मोटर राखिएको छ। अगाडिको मोटर १ सय २५ के डब्लू र रेयर मोटर १ सय ४० के डब्लूको छ। यसको ब्याट्रीले ३ सय ५५ बिएचपीसम्म पावर र ५ सय ६१ एनएम टर्क जेनेरेट गर्छ।
अधिकतम गति २ सय किलोमिटर प्रतिघण्टा रहेको यो कारले एक पटकको फुल चार्जमा ४ सय किलोमिटर माइलेज दिने बताइएको छ।
त्यस्तै इ–ट्रोनले शून्यदेखि १ सय किलोमिटरको गति ६.६ सेमेन्डमा नर्मल मोडलमा र ५.७ सेकेन्डमा बुस्ट मोडमा तय गर्न सक्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778245878.png)
-1764146706.png)
