चितवन- नारायणगढ-मुग्लिन सडकखण्डको पछिल्लोपटक थपिएको मिति सकिन लाग्दा पुनः समय थप्ने तयारी गरिएको छ। यसअघि तीनपटक गरी १० महिना समय थप गरिएकोमा अब तीन महिना मिति थप्ने तयारी गरिएको हो।
नारायणगढ–मुग्लिन सडक आयोजनाका इञ्जिनियर शिव खनालका अनुसार हालसम्म ७४ प्रतिशत काम सम्पन्न भएको छ। फागुन पहिलो साता पछिल्लो पटक थपिएको समय सकिँदैछ।
सन् २०१५ को अप्रिलमा २४ महिनामा सक्ने गरी ठेक्का दिइएको थियो। त्यसलगत्तै गएको भूकम्प, नाकाबन्दी र दुई वर्षसम्म वर्षात् बढी भएका कारण मिति थप गरिँदै आएको थियो। विसं २०७४ शुरु भएयताको दुई पटकको निर्वाचन, वर्षात्को समय, चाडपर्वको समय र थपिएको कामका कारण मिति थप्न लागिएको खनालले बताए।
ठेकेदार कम्पनीले भूकम्पको समयमा तत्कालीन सरकारले एक वर्षसम्म मिति थप्न सकिने जनाएको भन्दै एक हजार चार दिनसम्म मिति थप मागेको आयोजनाका प्रमुख चन्द्रनारायण यादवले बताए। 'ठेकेदारले त अस्वाभाविक समय मागेका छन् तर रोकिएको दिनको परिपूर्ति हुने गरी मिति थपिन्छ,' उनले भने।
दिउँसो यातायात रोकेर गरिएको काम प्रभावकारी
पछिल्लो समय माघ १३ गतेदेखि दिउँसोको समयमा यातायात रोकेर काम गरिँदै आएको छ। त्यसअघि रातको समयमा सवारी रोकेर काम गरिएको थियो। दिउँसोमा काम गर्दा प्रभावकारी भएको इञ्जिनियर खनालले बताए।
'अहिले दिनको समयमा सडक रोकेर काम थालिएसँगै कामले पनि गति लिएको छ,' उनले भने, 'भित्तो काट्ने र कालोपत्र गर्ने काम सँगसँगै भइरहेको छ।'
खनालका अनुसार फेब्रुअरी ४ तारिखका दिन एकै दिन करिब एक प्रतिशत काम भएको थियो। एक प्रतिशत भन्नाले करिब रु तीन करोडको काम हुन आउँछ।
हालसम्म तीनवटा खण्डमा गरेर १७ दशमलव ७ किलोमिटर सडक कालोपत्र भएको छ। सो सडक तीन तह कालोपत्र गरिँदै छ। थप सात किलोमिटरको कालोपत्र गर्ने अन्तिम तयारी भएको छ।
सडकलाई तीनखण्ड गरेर ठेक्का दिइएको छ। पहिलोखण्ड आँपटारीदेखि १० दशमलव ४ किलोमिटर मुग्नितर्फ ६ किलोमिटर सडक कालोपत्र भएको छ। उक्त खण्ड बिएलए तथा श्रेष्ठ निर्माण कम्पनीले ठेक्का लिएको छ। दोस्रो खण्ड निर्माणको जिम्मा लिएको उड हिल तथा लामा निर्माण कम्पनीले १० दशमलव ७ किलोमिटरमध्ये हालसम्म ७ दशमलव ७ किलोमिटर सडक कालोपत्र गरेको छ।
तेस्रो खण्ड सिमलतालदेखि मुग्लिनसम्मको निर्माणको जिम्मा लिएको सुप्रिम तथा रौताहा निर्माण कम्पनीले १२ दशमलव १ किलोमिटरमध्ये ४ किलोमिटर सडक कालोपत्र गरेको छ।
उक्त सडकखण्ड ३३ दशमलव २ किलोमिटर रहेको छ। जसमध्ये ५५ प्रतिशत भाग कालोपत्र गरिएको हो। तीनखण्डमध्ये सबैभन्दा बढी बीचको सडकखण्डको काम प्रभावकारी देखिएको छ। खनालका अनुसार यही गतिमा काम भएमा सो खण्ड भने आउँदो एक महिनामा सम्पन्न हुनेछ। अन्य दुई खण्ड पनि चैतसम्ममा भित्तो काट्नु पर्नेबाहेक अधिकांश भाग कालोपत्र भइसक्ने उनले बताए।
सो सडकको १६ किलोमिटरमा ३०० मिटर पहाड काट्नुपर्नेमध्ये १२० मिटर काटिसकिएको छ भने १८० मिटर काट्न बाँकी छ। त्यसको पनि माथिल्लो भाग काटिएको छ।
घुमाउनेमा २०० मिटर भित्तो काट्नु पर्नेमा १०० मिटरमात्रै बाँकी छ। सोको पनि माथिल्लो भाग निकै तल झरेर आठ मिटर उचाइमा आइपुगेको छ। सो क्षेत्रमा ४४ मिटर अग्लो पहाड थियो। उता तेस्रो सडकखण्डको भने चेपाङ डाँडामा २०० मिटर पहाड काट्नु पर्ने छ। सोको भने निकै कममात्रै प्रगति भएको देखिन्छ। सो पहाड काट्न भने निकै कठिन भइरहेको खनालले बताए।
नारायणगढ र गोरखा जोड्न सन् १९८२ मा चीन सरकारको सहयोगमा सो सडक बनेको थियो। नेपाल–भारत क्षेत्रीय व्यापार तथा यातायात आयोजनाअन्तर्गत एशियाली विकास बैंकको ऋण सहयोगमा यो सडकको स्तर उकास्ने काम शुरु गरिएको हो।रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
