नेपालगन्ज- प्रहरीले सर्वसाधारण र पहुँच नभएकाहरुलाई कसरी सताउँछ भन्ने एउटा घटना बाहिर आएको छ।
घर बनाउने मिस्त्री काम गर्ने नेपालगञ्ज–८, भैरवगञ्जटोलका रघुराज बेलदारलाई नेपाल प्रहरीले आफ्नो अधिकारको चरम दुरुपयोग गर्दै सास्ती दिँदै आएको छ। बेलदारलाई तीन महिना बाँके, काठमाडौं, भक्तपुर हुँदै फेरि बाँकेमा पुर्याएर ‘प्रहरीलाई हातपात र गाजीगलौज’ गरेको आरोप लगाउँदै सार्वजनिक अपराध मुद्दा लगाएर दुःख दिएको छ।
प्रहरीले उनी विरुद्ध कुनै ठूलो अपराधमा संलग्नता भएको प्रमाण फेला पार्न नसके पनि दु:ख दिने नियतले पक्राउ गर्दै सार्वजनिक मुद्दा लगाउँदै थुन्ने र छुटे लगत्तै फेरि पक्राउ गरेर मुद्दा दर्ता गर्ने गरेको पाइएको छ।
घटना १
नेपालगन्जस्थित घरमा बसिरहेका रघुराजलाई कात्तिक २० गते बिहान आठ बजे सादा पोशाकका प्रहरीले 'हाकिम सापको घर बनाउनु छ' भनेर मोटरसाइकलमा राखेर बिपी चौक र त्यसपछि गाडीमा हालेर खजुराको नजिकैको मानपुर प्रहरी कार्यालयमा पुर्याएर कुटपिट गरे। गाडीमै हालेर कोहलपुर पुर्याए। सोही दिन साँझ तीन जना प्रहरीले बसमा चढाएर भोलिपल्टै काठमाडौं पुर्याए।
काठमाडौं पुगेपछि महानगरीय वृत्त महाराजगन्जले कात्तिक २१ गते प्रहरीलाई हातपात र गाजीगलौजको आरोप लगाउँदै जिल्ला प्रशासन कार्यालय काठमाडौंमा सार्वजनिक अपराधमा मुद्दा चलायो।
मंसिर ५ गते काठमाडौं जिल्ला प्रशासन कार्यालयले रघुराजसँग १५ हजार धरौटी माग माग्यो। धरौटी तिर्न नसकेर उनी कारागार पुगे। १८ गते रघुराजका परिवारले धरौटी बुझाएपछि उनी रिहा हुन नपाउँदै सादा पोशाकका प्रहरीले प्रशासन कार्यालय परिसरबाटै नियन्त्रणमा लिए।
घटना २
जिल्ला प्रशासन कार्यालय काठमाडौं परिसरबाट पक्राउ गरिएपछि उनलाई महानगरीय प्रहरी परिसर भक्तपुर लगियो। परिसरले सोही दिन (१८ गते) उनी विरुद्ध सार्वजनिक मुद्दा चलायो।
मंसिर १९ गते जिल्ला प्रशासन कार्यालय भक्तपुरले एक हजार रुपैयाँ धरौटी माग्यो। रघुराज त्यो पनि तिर्न नसकेर कारागार पुगे। २१ गते एक हजार रुपैया धरौटी तिरे। रकम बुझाए पनि भक्तपुरबाट थुनामुक्त गरिएन।
घटना ३
अदालतले २६ गते २४ घन्टाभित्र बन्दीसहित उपस्थित हुन आदेश गर्यो। तर, अदातलमा उपस्थित गराउनुको साटो महानगरीय प्रहरी परिसर भक्तपुरले रघुराजलाई सादा पोशाकका तीन जना प्रहरीसहित २५ गते राति नै बस मार्फत बाँकेको कोहलपुर पुर्यायो।
कोहलपुरस्थित इलाका प्रहरी कार्यालयले फेरि रघुराजलाई मंसिर २६ गते सार्वजनिक अपराधमा मुद्दा चलायो। माघ ७ गते जिल्ला प्रशासन कार्यालय बाँकेले उनीसँग तीन हजार रुपैयाँ धरौटी माग गर्यो।
धरौटी रकम बुझाएपछि छुटे लगत्तै प्रहरीले फेरि पक्राउ गरेर कहाँ लगेर फेरि मुद्दा चलाउला भन्ने डरका कारण रघुराज धरौटी नतिरी बाँके कारागार गए। रघुराजका आफन्तले प्रहरीले अनावश्यक रुपमा पक्राउ गर्दै मुद्दा चलाएर दु:ख दिने गरेको जनाउँदै अन्तरिम आदेशसहित निषेधाज्ञा लगायत उपयुक्त आदेशको माग गर्दै उच्च अदालत तुल्सीपुर नेपालगन्ज इजलासमा रिट दायर गरे।
अदालतका न्यायाधीश गोपालप्रसाद भटटराईको इजलासले धरौटी रकम राखेपछि आफन्त र कानुन व्यवसायीको रोहबरमा छाडिदिन आदेश गरेको छ। रघुराजलाई जिल्ला प्रशासन कार्यालय बाँकेले रिहा गरेपछि उनी बिहीबार घर फर्किएका छन्। प्रशासनबाट रिहा भए पनि फेरि प्रहरीले पक्राउ गर्ने हो कि भन्ने आशंका भने कायमै रहेको उनले बताए।
यस कारण दु:ख दियो प्रहरीले
रघुराजका अनुसार, करिब १७/१८ वर्षअघि नेपालगन्जको फुलटेग्रामा होली खेल्ने क्रममा स्थानीय निशान्त श्रीवास्तवका बुवासँग रघुराजको झगडा भयो। झगडाले उग्र रुप लिएपछि कुटपिट पनि भयो। तर, स्थानीय बासिन्दाले छुट्याएपछि घटना त्यत्तिकै साम्य भयो।
फुलटेग्राका तिनै निशान्त श्रीवास्तव अहिले प्रहरीको केन्द्रीय अनुसन्धान ब्यूरोमा प्रहरी निरीक्षकको रुपमा कार्यरत छन्। १७/१८ वर्ष पुरानो घटनाको रिस फेर्न प्रहरी निरीक्षक श्रीवास्तवकै योजना अनुसार आफूलाई पक्राउ गरी विभिन्न ठाउँमा मुद्दा लगाएर दु:ख दिइएको रघुराजले बताए।
काठमाडौं जिल्ला प्रशासन कार्यालयबाट धरौटीमा छुट्न लागेका बेला प्रहरी निरीक्षक श्रीवास्तव पनि त्यहाँ पुगेका थिए। श्रीवास्तवले घर पुर्याइदिन्छु भन्दै आफूलाई भक्तपुर लगेर अर्को मुद्दा लगाएको उनले बताए। प्रहरी निरीक्षक श्रीवास्तवसँग सम्पर्क गर्ने प्रयास गरे पनि सम्पर्क हुन सकेन।
इलाका प्रहरी कार्यालय कोहलपुरका मुद्दा फाँटका नायव निरीक्षक सुरेन्द्र पन्तले भने बाँकेको पार्वतीपुरमा सादा पोशाकमा रहेका प्रहरीसँग विवाद भई कुटपिट पनि गरेको घटनामा प्रहरीको प्रतिवेदनको आधारमा कार्यालय प्रमुखले रघुराजमाथि सार्वजनिक मुद्दा चलाएको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
