काठमाडौं– काठमाडौं, भक्तपुर हुँदै काभ्रेको धुलिखेल जोड्ने अरनिको राजमार्गलाई व्यवस्थित गर्न काठमाडौंको तीनकुनेबाट पेप्सीकोला हुँदै करिब डेढ किलोमिटर सुरुङ मार्ग निर्माण हुने भएको छ। यस्तै, भक्तपुरको पलासेबाट साँगा भञ्ज्याङ हुँदै काभ्रे जोड्ने सुरुङमार्ग निर्माण पनि सँगै हुने भएको छ।
यसको सम्भाव्यताको निम्ति प्राविधिक विशेषज्ञ टोलीले काठमाडौंको तीनकुनेदेखि साँगा भञ्ज्याङसम्मको अध्ययन भ्रमण गर्ने क्रममा सो जानकारी दिइएको हो।
भक्तपुर क्षेत्र नम्बर २ का सांसद महेश बस्नेतको नेतृत्वमा भक्तपुरका निर्वाचित प्रदेशसभाका सांसद, नगरपालिकाका प्रमुख एवं वडाअध्यक्ष तथा प्राविधिक विशेषज्ञहरुको टोलीसहित साँगास्थित कैलाशपति महादेव मन्दिर परिसरमा आयोजना गरेको छलफल कार्यक्रममा बस्नेतले भक्तपुरको साँगालाई धार्मिक र पर्यटकीय क्षेत्रको रुपमा विकास गरिने बताए।
उनले भने, ‘धार्मिक पर्यटकीय क्षेत्रका रुपमा समेत विकास गर्न सकिने यो क्षेत्रलाई यातायातको वैकल्पिक मार्गका रुपमा पनि सुरुङमार्ग निर्माण गर्न लागिएको हो।’
बस्नेतले काठमाडौंबाट भक्तपुरलाई जोड्ने वैकल्पिक मार्गको रुपमा तीनकुनेस्थित मुनिभैरवदेखि पेप्सीकोलासम्मको करिब डेढ किलोमिटर सुरुङमार्ग निर्माण कार्य अब छिटै सुरु हुने बताए। उनले प्राविधिक रुपमा समेत नागरिक उड्डयन प्राधिकरणले सम्भाव्यता अध्ययन गरिसकेकाले अबको केही समयमै सुरुङ निर्माण कार्य सुरु हुने उल्लेख गरे।
भक्तपुरको साँगा भन्ज्याङलाई धार्मिक र पर्यटकीय क्षेत्र सहित खानेपानी र भण्डारण केन्द्रको रुपमा समेत विकास गर्न खानेपानीको ड्याम बनाउने योजना रहेको समेत छलफल कार्यक्रममा बताइएको थियो।
कार्यक्रममा सडक विभाग वैदेशिक महाशाखाका उप महानिर्देशक सञ्जयकुमार श्रेष्ठले आगामी ५ वर्षभित्रमा दुवै सुरुङ निर्माण कार्य सम्पन्न हुने बताए।
कार्यक्रममा भक्तपुर क्षेत्र नम्बर २ प्रदेशसभा सदस्य शशिजंग थापा, सूर्यविनायक नगरपलिका प्रमुख बासुदेव थापा, उपत्यका ट्राफिक प्रमुख डिआइजी सर्वेन्द्र खनाल, लगायत वडा प्रतिनिधिहरु लगायतका सरोकारवाला निकायका प्रतिनिधिहरुको सहभागिता थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
