सिओल- दक्षिण कोरियामा आगामि शुक्रबारबाट सुरु हुने शितकालिन ओलम्पिकको उद्घाटन सत्रमा सहभागी हुन उत्तर कोरियाले २२ सदस्यीय उच्च सरकारी प्रतिनिधिमण्डल तोकेको छ।
उत्तरको केन्द्रिय संसदका संवैधानिक संसद प्रमुख किम योङ नामको संयोजकत्वमा रहने टोलीले ओलम्पिकको उद्घाटन समारोहमा सहभागिता जनाउने दक्षिणको एकता मन्त्रालयले जनाएको हो। सो टोली पछिल्लो ४ वर्षमा उत्तरबाट दक्षिण आउने सबैभन्दा उच्च स्तरको प्रतिनिधि मण्डल हुनेछ।
उत्तरका प्रतिनिधि मण्डल संयोजक नामले अमेरिकाका उपराष्ट्रपति माइक पेन्ससँगै एकैसाथ मञ्चबाट उद्घाटन सत्र अवलोकन गर्छन् कि गर्दैनन् भन्ने बारेमा केहि पनि बताइएको छैन।
अमेरिका उत्तर कोरियाको आणविक कार्यक्रमलाई लिएर सन्तुष्ट नभइरहेको अवस्थामा यी दुई मुलुकका उच्च अधिकारीहरुको एकै कार्यक्रममा हुने उपस्थितीलाई विश्व राजनीतिमा फरक कोणबाट हेरिएको छ।
दक्षिणको एकता मन्त्रालयका अनुसार उत्तरी प्रतिनिधि मण्डलमा संयोजक नामसँगै अन्य ३ जना उच्च सरकारी अधिकारी तथा १८ जना सहयोगी कर्मचारीहरु रहनेछन्।
उद्घाटन सत्रमा दुवै कोरियाली खेलाडिले संयुक्त झण्डामुनि मार्चपास गर्नेछन्। प्रतियोगितामा उत्तरका खेलाडि, सांस्कृतिक टोली तथा चेयर लिडरसमेतको ठूलो सहभागिता रहनेछ।
ओलम्पिकमा प्योङयाङको सहभागितालाई कोरियाली प्रायद्धिपमा चुलिएको तनावलाई घटाउने महत्वयूर्ण कुटनीतिक उपायको रुपमा हेरिएको छ।
पछिल्लो समयमा विभिन्न आणविक कार्यक्रमहरुले गर्दा उत्तर कोरिया माथि विश्व शक्ति राष्ट्रहरुले निरन्तर दवाव दिइरहेका छन्।
दुवै राष्ट्रहरुबिच विद्यमान आवातजावत प्रतिबन्धलाई खुकुलो बनाउन उत्तरले गत सोमबार पानीजहाजमार्फत प्रतियोगितामा सामेल हुनका लागि एक सांस्कृतिक टोली पठाउने प्रस्ताव राखेको थियो।
‘सन् १९९२ देखि उत्तर कोरिया र रसियाबिचमा आवतजावत गर्न संचालनमा आएको मांगयोंगबोंग पानी जहाजमार्फत उत्तरले आफ्नो प्रतिमण्डल पठाउने प्रस्ताव गरेको थियो।,’ दक्षिणको एकता मन्त्रालयले भन्यो। सन् २०१० देखि उत्तर कोरियाका पानी जहाजलाई दक्षिण कोरियामा प्रवेश गर्न प्रतिबन्ध लगाइएको छ।
दक्षिण कोरियाली सरकारका प्रवक्ता बेइक ताइ ह्युनले पत्रकार सम्मेलन गर्दै भने,‘ओलम्पिकको सफल आयोजनाको लागि हामीले सकेसम्म कुनै एक छुट दिने सोचिरेहेका छौँ।’
९० वर्षिय संयोजक नाम उत्तर कोरियाको संसद प्रमुखको रुपमा सन् १९९८ देखि कार्यरत छन्। सोअघि उनले सन् १९८३ देखि १९९८ सम्म उत्तर कोरियाको विदेश मन्त्रीको रुपमा समेत काम गरिसकेका छन्।
नाम विश्वकै तेस्रो सबैभन्दा बढि उमेरमा पनि राज्य प्रमुखको पदमा कार्यरत नेता हुन्।
शुक्रबार हुने आलम्पिकको उद्घाटन सत्रमा अमेरिकी उपराष्ट्रपति पेन्सको सहभागितालाई लिएर ह्वाइट हाउस भने सकारात्मक देखिएको छ।
उत्तर कोरियामा जेलमै मारिएका अटो वार्मवियरका बाबु फ्रेड वार्मवियर उद्घाटन सत्रमा उपराष्ट्रपति पेन्सको अतिथिको रुपमा उपस्थित हुन लागेको आइतबार वासिंगटन पोष्टले लेखेको छ।
गत शुक्रबार युनियन अफ स्टेटमा सम्बोधनका क्रममा अमेरिकी राष्ट्रपति डोलाल्ड ट्रम्पले वार्मवियर र उनकी श्रीमतीलाई अतिथिका रुपमा निम्ता गरेका थिए।
आफ्नो आणविक क्षमता जाँचका लागि उत्तर कोरियाले लगातार रुपमा मिसाइल परिक्षणहरु गरिरहेको छ। ओलम्पिक सुरु हुने अघिल्लो दिन बिहिबार पनि उत्तरले आफ्नो विशाल सैन्य परेड देखाउने यसअघि नै घोषणा गरिसकेको छ। तर सैनिक दिवशका अवसरमा गरिने भएकोले सो परेड आफ्नो नियमित कार्यक्रम भएको उत्तरले जनाएको छ।
यसबाट दक्षिण कोरिया र अमेरिका भने संशकित देखिएका छन्।
यतिबेला धेरैको मनमा प्रश्न उब्जिएको छ कि उत्तरले दक्षिण आउने आफ्नो टोली घोषणा गरिसक्दा शुक्रबारबाट सुरु हुने शितकालिन ओलम्पिकको उद्घाटन सत्रमा के अमेरिकाले उपराष्ट्रपति पेन्सलाई उत्तर कोरिया पठाउला त? सँगसँगै शत्रु राष्ट्र मानिएका दुई देशका उच्चपदस्थ अधिकारीहरुले एकै मञ्चमा बसेर खेल हेर्लान् त?
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
