महेन्द्रनगर, धनुषा- पत्रकारिता पेसा गर्दै प्रदेशसभा सदस्य बन्न सफल रामाशीष यादवलाई आइतबार बस्ने प्रदेश सभाको ऐतिहासिक पहिलो बैठकको व्यग्र प्रतीक्षा छ।
प्रदेशसभा सदस्य यादव मात्रै होइन सम्पूर्ण जनकपुरधामवासी र २ नं प्रदेशवासीले यो बैठकका लागि व्यग्र प्रतीक्षा गरिरहेका छन्।
'संघीयता कार्यान्वयनको औपचारिक सुरुआत पनि पहिलो बैठकबाटै हुन्छ। संघर्षले प्राप्त प्रदेश भएकाले सहिदको योगदान र उनीहरूले कल्पना गरेको विकासको चाहनामा संसद् बैठक केन्द्रित हुने अपेक्षा गरेको छु,' यादव भन्छन्।
प्रदेश नं २ को पहिलो प्रदेशसभा बैठक आज जनकपुरको कुवारामपुरस्थित शिक्षा कार्यालय तथा शिक्षक तालिम केन्द्रलाई बनाइएको प्रदेशसभा भवनमा बिहान ११ बजेदेखि सुरु हुँदैछ।
प्रदेशसभा बैठकलाई मध्यनजर गर्दै सभाहल तयारीको काम शनिबार रातभरि गरेर आइतबार बैठक सञ्चालन गर्नेगरी भएको छ।
बैठकका लागि सभाहल सिँगारिएको छ। सभाहलमा कुर्सी र डेस्क लगाउने, साउन्ड सिस्टमको व्यवस्था, लाइट राख्ने कामसमेत सम्पन्न भएको छ। सभाहलको मूल गेटमै मिथिला आर्ट राखिएको छ। प्रदेशसभाकै पहिलो बैठक भएकाले रोष्टममा फूलमालाले सजाइएको छ।
प्रदेशसभाको बैठकको तयारीमा जुटेका शहरी विकास तथा भवन निर्माण डिभिजन कार्यालय जनकपुरका इन्जिनियर महेश साहले सभाहलभित्र १७७ कुर्सीको व्यवस्था गरिएको बताए। जसमध्ये १०७ प्रदेशसभा सदस्य तथा ७० संसद् सचिवालयका कर्मचारी एवं अतिविशिष्ट पाहुनाका लागि छुट्याइएको छ।
सभाहलभित्र स्थान अभाव भएकाले प्रदेशसभाको ऐतिहासिक बैठक हेर्न आउने सर्वसाधारणका लागि भने प्रदेशसभा भवनअगाडि प्रत्यक्ष प्रसारणको व्यवस्था मिलाइएको इन्जिनियर साहले जानकारी दिए।
बैठक सञ्चालनमा सहयोग गर्ने राष्ट्रसेवक तथा मर्यादापालकहरूलाई संसद् सचिवालयबाट खटिआएका सहसचिव वंशीराज पौडेल नेतृत्वको चार सदस्यीय टोलीले तालिम दिएको छ। संसद् सचिवालयका सहसचिव पौडेलका अनुसार प्रदेशसभाका लागि ५० जनपथ प्रहरीको दरबन्दी छुट्याइएको छ। तीमध्ये २१ जना मर्यादापालकको भूमिकामा तथा बाँकीका २९ जना प्रदेश सभा बाहिरको सुरक्षामा तैनाथ गरिनेछ।
मर्यादापालकहरूलाई संसद् सचिवालयका कर्मचारीले खटनपटन गर्नेछन् भने सुरक्षार्थ खटिने सुरक्षाकर्मीलाई जिल्ला प्रहरी कार्यालयले काममा लगाउने छन्। बाहिरको सुरक्षा भने सशस्त्र प्रहरीको जिम्मा दिइएको छ।
गत बिहीबार बसेको सर्वदलीय बैठकले प्रदेशसभा सदस्यहरूका लागि कफी रङको कोट र लोगो निर्धारण गरेको थियो। भित्री पोशाक भने आफूखुसी लगाउन पाउने निर्णय गरिएको छ। मर्यादापालकले सफारी सुट लगाउने र भाषामा राष्ट्रिय भाषाबाहेक आफ्नो मातृभाषाको प्रयोग गर्न पाउने निर्णय गरिएको छ।
केके हुन्छ पहिलो बैठकमा?
पहिलो बैठकको सभामुखको भूमिका ज्येष्ठ सदस्य लगनलाल चौधरीले गर्दैछन्। ७६ वर्षीय चौधरी सिरहा निर्वाचन क्षेत्र नं १ (क) का एमाले विधायक हुन्। बैठकको शुरुमा सभामुखको आसनबाट चौधरीले प्रदेश प्रमुख रत्नेश्वरलाल कायस्थले प्रथम प्रदेशसभा बैठक आह्वान गर्न जारी गरेको सूचना पढेर सुनाउनेछन्।
प्रदेश नं २ मा प्रतिनिधित्व गर्ने पाँच राजनीतिक दलका नेताको शनिबार साँझ बसेको कार्यव्यवस्था तथा सर्वदलीय परामर्श समितिको बैठकले उक्त कार्यसूची तय गरेको हो। सर्वदलीय बैठकले फागुन २ गते बस्ने प्रदेश सभाको अर्को बैठकबाट सभामुखको निर्वाचन गर्ने निर्णयसमेत गरेको छ।
सभामुखको अनुपस्थितिमा बैठक सञ्चालनका लागि प्रदेशसभाका केही सदस्य मनोनयन पनि पहिलो बैठकबाटै गरिनेछ।
प्रदेशसभाको पहिलो बैठक भएकाले सभामा उपस्थित दलका एक–एक जनालाई सम्बोधन गर्न समय दिइनेछ। पहिलो बैठक बसेको १५ दिनभित्र सभामुख चयन गर्नुपर्ने संवैधानिक व्यवस्था छ।
त्यस्तै प्रदेशसभाको प्रथम बैठकमा दलका तर्फबाट बोल्न पाउने समयसीमा पनि निर्धारण गरिएको छ। प्रदेशसभामा प्राप्त सिट संख्याका आधारमा संघीय समाजवादी फोरमलाई सबैभन्दा बढी १४ मिनेट, राजपालाई १२ मिनेट, एमालेलाई १० मिनेट, काँग्रेसलाई ९ मिनेट, माओवादीलाई ६ मिनेट र संघीय समाजवादी पार्टी तथा स्वतन्त्र विधायकलाई ४ मिनेटको दरले बोल्न पाउनेगरी समय उपलब्ध गराउने निर्णय सर्वदलीय बैठकबाट गरिएको सचिवालय सचिव पौडेलले बताए।रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
