काठमाडौं- दसैंका लागि सार्वजनिक बसको अग्रिम टिकट बुकिङ खोल्ने विषयमा यातायात व्यवस्था विभागले छलफल थालेको छ। सरकारले अग्रिम टिकट बुकिङको विषयमा चासो राखेर शुक्रबार प्रधानमन्त्री कार्यालयमा विभाग लगायतलाई बोलाएर छलफल गरेको हो।
योसँगै विभागले सरोकारवालाहरुसँग अग्रिम टिकट बुकिङ खोल्ने मिति तय गर्न कुराकानी सुरु गरेको छ। विभागले सोमबारका लागि यातायात व्यवसायी, ट्राफिक प्रहरीलगायतलाई छलफलमा बोलाएको छ। विगतका वर्षहरुमा दसैं सुरु हुनु १ महिना अघिदेखि अग्रिम टिकट बुकिङ खुल्दै आएको थियो। तर, दुई वर्षयता विभिन्न कारणले एक साता अघिमात्र बुकिङ खुल्ने गरेको छ।
यो वर्ष विगतमा जस्तो समस्या नदेखिएको भए पनि अग्रिम टिकट बुकिङ खोल्ने विषयमा विभागले छलफल थालेको विभागका महानिर्देशक गोगनबहादुर हमालले बताए। ‘शुक्रबार प्रधानमन्त्री कार्यालयमा दसैंका लागि अग्रिम टिकट बुकिङ खुल्ला गर्ने विषयमा छलफल भयो। उक्त छलफल सकारात्मक भएको छ,’ उनले भने, ‘त्यही आधारमा विभागले सोमबार व्यवसायीलगायत सरोकारवालालाई बोलाएको छ। केही निचोड निस्कन्छ होला।’
अग्रिम टिकट खुल्ला गर्ने विषयमा व्यवसायीहरु सकारात्मक भए पनि विभागले हालसम्म छलफलमै नबोलाएको नेपाल यातायात व्यवसायी राष्ट्रिय महासंघका महासचिव सरोज सिटौलाले बताए। ‘टिकट बुकिङ खोल्ने विषयमा हामी सकारात्मक नै छौं,’ उनले भने, ‘यो वर्ष नयाँ बस थपिने सम्भावना कमै देखिएको छ। तर, भएका बसको व्यवस्थापन गर्न विभागले समन्वय गर्नुपर्ने हो। गर्ला भन्ने विश्वासमै छौं।’
राजधानीमा अध्ययन तथा कामकाजका लागि अस्थाई रुपमा बसोबास गर्दै आएका ७७ वटै जिल्लाका अधिकांश नागरिकहरु दसैं मान्न भने जन्मघर नै जाने गरेका छन्। यो समयमा दैनिक हजारौंको संख्यामा यात्रु काठमाडौं छाडेर विभिन्न जिल्ला जाने भएकाले बसको संख्या धेरै चाहिने हुन्छ। त्यसका लागि सरकारको समन्वयमा यातायात व्यवसायीहरुले आवश्यकताअनुसार विभिन्न रुटमा रहेका बसहरु चाप धेरै हुने रुटमा व्यवस्थापन गर्दै आएका छन्।
यो समयमा व्यवसायीहरुले यात्रुबाट आवश्यकताभन्दा धेरै भाडा असुल गर्ने सम्भावना रहेकाले सरकारले अनुगमनसमेत गर्ने गरेको छ। त्यसका लागि विभाग, ट्राफिक प्रहरी र उपभोक्ता आधिकारवादीहरुको समेत सहभागिता रहँदै आएको छ।
यो वर्षको अग्रिम टिकट बुकिङ भदौको अन्तिम सातासम्ममा खुल्ने अनुमान विभागले गरेको छ। (फाइल तस्बिर)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1761726523.jpg)
