काठमाडौं- मंगलबारबाट राजधानीको भृकुटीमण्डपमा सुरु भएको 'नाडा अटो शो २०१९' दुई दिनमै २३ हजारले अवलोकन गरेका छन्। अटो शो सुरु भएको पहिलो दिन मंगलबार १० हजारले र दोस्रो दिन बुधबार १३ हजारले अवलोकन गरेको नाडाले जनाएको छ।
नाडा अटो शोमा हरेक वर्ष नयाँनयाँ ब्रान्डका सवारी तथा नयाँ मोडल आउने भएकाले उपभोक्ताको आकर्षण बढ्दै गएको नाडा अटोमोबाइल्स एसोसिएसन अफ नेपालका सचिव अनुपकुमार बरालले बताए।
‘हरेक वर्षजसो अटो शोमा अवलोकनकर्ताहरु बढ्दै गइरहेका छन्,’ बरालले भने, ‘यो वर्ष हाइब्रिड तथा इलेक्ट्रिक सवारीले उपभोक्तालाई आकर्षित गरेको देखिन्छ।’
१० गते सुरु भएको नाडा अटो शो १५ गतेसम्म हुनेछ। दुईपांग्रे र चारपांग्रे गरि ४१ वटा ब्राण्डका सवारी कम्पनीले सहभागिता जनाएका छन्। त्यस्तै बैंक तथा स्पेयर पार्टस लगायत सबै गरेर अटो शोमा कुल ९० भन्दा बढी कम्पनीको सहभागिता रहेको छ। स्थान अभावका कारण गत वर्षदेखि नाडाले अटो शोमा कमर्सियल सवारीलाई सहभागी गराउन छाडेको छ।
मेलामा सवारी साधनको प्रदर्शनीका साथै सवारी सुरक्षा प्रविधि, स्पेयर पार्टस्, लुब्रिकेन्टस, टायर, ग्यारेज उपकरण, व्याट्री तथा अन्य एसोसेरिजहरूको सहभागिता रहेको छ। जसमा नेपालमै उत्पादित सामग्रीहरू समेत राखिने छन्।
अवलोकनकर्ताहरूको सुविधालाई लक्षित गर्दै र व्यवस्थापनमा समेत सहज हुने भएकाले २ पांग्रे, ४ पांग्रे तथा वित्तिय संस्थाहरूको छुट्टाछुट्टै ठाउँ निर्धारण गरिएको छ। नाडा अटोमाबाइल एसोसिएसन अफ नेपालले सवारी, पार्टपूर्जा, तथा यससँग सम्बन्धी एसोसिरिजहरुको प्रदर्शनी नाडा अटो बर्सेनि गर्दै आएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
