धनगढी- नेकपा स्थायी कमिटी सदस्य भीम रावलले प्रधानमन्त्रीले विदेशबाट भिडियो कन्फ्रेन्सबाट मन्त्रिपरिषद् बैठक बोलाउनु सुरक्षा र कानुनका दृष्टिले गलत भएको बताएका छन्।
बुधबार धनगढीमा पत्रकार सम्मेलन गर्दै नेता रावलले प्रधानमन्त्री आफैंले उपप्रधानमन्त्री ईश्वर पोख्रेललाई कार्यवाहक प्रधानमन्त्रीको जिम्मेवारी दिएर गए पनि विदेशबाट आफैं मन्त्रिपरिषद् बैठक बोलाउनु जरुरी पनि नभएको र यो काम आफैंमा विवादास्पद भएको बताए।
‘देशको सुरक्षा र गोपनियताको कुरामा भिडियो कन्फ्रेन्स उपयुक्त होइन,’ उनले भने, ‘आधुनिक युगमा गयौं भन्दैमा अरु कुनै चिजको ख्याल नगरिनु राम्रो होइन। भोलिका दिनमा प्रदेश र स्थानीय तहका सरकारले पनि यही सिको गर्नसक्ने सम्भावना रहन्छ।
नेकपाको सुदूरपश्चिम प्रदेश इन्चार्ज समेत रहेका नेता रावलले सुदूरपश्चिममा फेरि टीकापुर घटनाको पुनरावृत्ति गर्न खोजिएको आरोप लगाए।
उनले समाजवादी पार्टी नेपालका संघीय परिषद् अध्यक्ष डा बाबुराम भट्टराईले टीकापुरमै आएर फेरि जातीय राज्य निर्माणका लागि आन्दोलन चर्काउन लगाउनु विखण्डनकारी काम भएको आरोप लगाए।
भट्टराईले केही दिन पहिले टीकापुरमा आयोजित थरुहट/थारुवान राष्ट्रिय सम्मेलनलाई सम्बोधन गर्दै अधिकार प्राप्तिका लागि थप आन्दोलन गर्नुपर्ने अभिव्यक्ति दिएका थिए। नेता रावलले जिम्मेवार नेता भट्टराईको अभिव्यक्ति देशमा फेरि विखण्डन निम्त्याउने खालको भएको जिकिर गरे।
माक्सवादलाई पोलेर त्यसको खरानी घसेर जातीय राज्य बनाउन बाबुराम भट्टराई लागिरहेको उनको आरोप छ। ‘तराई र पहाड मिल्न दिनुहुँदैन भन्ने कुरा बाबुरामजीको संविधान बनाउने बेला देखिको निरन्तरता हो,’ उनले भने, ‘देशको प्रधानमन्त्रीसमेत भइसकेको मान्छेले यस्तो कुरा गर्नु सुहाउँदैन।’
नेता रावलले डा भट्टराईजस्ता नेताहरुकै कारण थारु समुदायका व्यक्तिहरु जेल परेर दुःख पाएको उनको भनाइ छ। ‘अरुलाई भड्काएर आफू कता जान्छन् जान्छन,’ उनले भने, ‘दुःख पाउने अरु नै हुन्छन्।’
नेता भट्टराईले भनेजस्तो देशमा जातीय राज्य बन्न सक्ने सम्भावनासमेत नरहेको रावलको दाबी छ। ‘जातीय राज्य चाहिने नै हो भने नेपालमा १ सय २४ राज्य बनाउनुपर्छ,’ उनले भने, ‘राउटेले पनि राज्य खोज्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
