काठमाडौं– प्रधानमन्त्री केपी ओली सिंगापुरमा रहँदा भिडियो कन्फरेन्समार्फत बसेको मन्त्रिपरिषद्को बैठकप्रति कांग्रेसले आपत्ति जनाएको छ।
सो पार्टीका प्रमुख सचेतक बालकृष्ण खाँडले मंगलबार प्रतिनिधिसभामा बोल्दै पछिल्लो प्रयोगको विरोध गरेका हुन्।
प्रधानमन्त्री सिंगापुर जानुअघि नेपाल सरकार (कार्यसम्पादन) नियमावली २०६४ मा संशोधन गरी प्रधानमन्त्री स्वदेश वा विदेश भ्रमणमा रहेका बेलामा पनि भिडियो कन्फरेन्सिङ लगायतका सूचना प्रविधिको प्रयोग गरी मन्त्रिपरिषद्को बैठक बस्न सक्ने व्यवस्था थप गरिएको थियो।
खाँडले सो संशोधनलाई फिर्ता लिन आग्रह गरे। 'त्यसैले पछिल्लो संशोधनलाई पुन संशोधन गरेर पूर्ववत् अवस्थामा लगियोस्', उनले भने।
उनले कार्यविधि ज्यादै नै गम्भीर विषय भएको र संशोधन गर्दा अधिकारलाई दुरुपयोग गर्नु नहुने बताए। उनले हालै गरिएको संशोधन विल्कुलै अनुचित भएको बताए। यसबाट सूचना पनि चुहिने उनले शंका व्यक्त गरे।
उनले प्रधानमन्त्री बाहिर जाँदाखेर प्रधानमन्त्रीको कार्यभार सम्हाल्ने गरी कार्यवाहक प्रधानमन्त्री पनि तोकिएको तर तर भिडियो कन्फरेन्सबाट हेर्दाखेरि प्रधानमन्त्री कार्यरत भएको भन्दै गम्भीर गल्ती भएको बताए। 'आफैंमा पनि नमिल्ने कुरा भयो। यस्ता खालका गम्भीर गल्ती गर्नुहुँदैन', उनले भने।
'प्रधानमन्त्री नहुँदाखेरि भिडियो कन्फरेन्सबाट क्याबिनेटको बैठक सञ्चालन गर्न मिल्ने हो भने सभामुख हुनुभएन भने प्रतिनिधिसभाको बैठक पनि बस्न सक्छ? त्यस्तै राष्ट्रियसभाका अध्यक्ष पनि नहुनुहोला। हामीले कार्यविधि र नियमावली बदलिदिएर राष्ट्रियसभाका अध्यक्ष अमेरिका गएको बेलामा त्यहीँबाट भिडियो कन्फरेन्सबाट राष्ट्रियसभा चलाउन मिल्छ कि मिल्दैन? त्यस्तै प्रधानन्यायाधिश विदेश जानुहोला। उहाँले न्यायपालिकाको बैठक पनि त्यसैगरी गर्नुहोला', उनले तर्क गरे।
उनले पछिल्लो प्रयोग अस्वभाविक भएको भन्दै त्यसलाई प्रमुख प्रतिपक्षले गम्भीरतापूर्वक लिएको बताए।
'यसले हाम्रो परम्परा पनि बिग्रिन्छ', उनले भने, 'उच्च प्रविधिको सदुपयोग हुँदैन, दुरुपयोग हुन्छ। यो जग हाँस्ने कुरा हो।'
उनले विधिको शासनकै लागि आफूहरुले बोलेको बताए। 'उच्च प्रविधि प्रयोग गर्दा कहिलेकाहीँ हामीलाई पनि खुसी नै लाग्छ', उनले भने, 'तर, सदुपयोग भएन।'
खाँडले भिडियो कन्फरेन्स डाक्टर, इन्जिनियर, विज्ञ र व्यवसायीले प्रयोग गर्ने विषय भएको भन्दै मुलुककै ज्यादै नै महत्त्वपूर्ण निकाय मन्त्रिपरिषद्को बैठक नै भिडियो कन्फरेन्समार्फत गर्नु घोर आपत्तिजनक भएको बताए। 'फिर्ता गरियोस्', उनले आग्रह गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
