बुटवल- अख्तियार अनुसन्धान दुरुपयोग आयोगका प्रमुख आयुक्त दीप बस्न्यातले प्रदेश सरकार गठन भइरहँदा स्थानीय स्तरमा हुने विकास आयोजनामा अनियमितता हुन सक्ने भन्दै कर्मचारीलाई चनाखो बन्ने निर्देशन दिएका छन्।
आयोग बुटवल कार्यालयको नवनिर्मित भवनको आज उद्घाटन गर्दै प्रमुख आयुक्त बस्न्यातले स्थानीय र प्रदेश सरकारका गतिविधिको निगरानी गर्न मातहतका कर्मचारीलाई निर्देशन दिएका हुन्।
प्रमुख बस्न्यातले भ्रष्टाचार नियन्त्रण गर्न अख्तियारको एक्लो भूमिकाले सम्भव नहुने भन्दै निजामती कर्मचारी र पत्रकारहरुको महत्वपूर्ण भूमिका हुनुपर्ने भनाइ राखे। अख्तियारले संघीय संरचना अनुरुप प्रादेशिक कार्यालय पनि स्थापना गर्ने तयारी गरेको उनले जानकारी दिए। हाल १० वटा क्षेत्रमा रहेका कार्यालयलाई निकट भविष्यमै ७ प्रदेशमा ढालिने उनले बताए।
भवन उद्घाटन कार्यक्रममा बोल्दै अख्तियारका सचिव राजन खनालले देशको धेरै बजेट खर्च हुने स्थानीय सरकारको विकास निर्माणमा अख्तियारका कर्मचारीको ध्यान जानुपर्नेमा जोड दिएका छन्। त्यस्तै प्रदेश नम्बर ५ का प्रमुख सचिव शंकर पाठकले प्रदेश नम्बर ५ लाई भ्रष्टारमुक्त बनाउन आफ्नो महत्वपूर्ण काम हुने प्रतिबद्धता जनाए।
५ करोड ८८ लाख लागतमा भवन निर्माण भएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
