काठमाडौं– किराँतेश्वर संगीताश्रमको २६औं वार्षिकोत्सवको अवसरमा विभिन्न साधकहरु सम्मानित भएका छन्।
संगीताश्रमले ०५१ सालदेखि हरेक वर्ष शास्त्रीय संगीत प्रतियोगिता गर्दै आएकोमा यस वर्षको प्रतियोगितामा विजयीहरुलाई बुधबार सम्मान तथा पुरस्कार वितरण गरिएको हो।
यस वर्ष शास्त्रीय गायततर्फ बाल कलाकार अविज्ञा घिमिरे पुरस्कृत भइन् भने सविना बुढाथोकीले सान्त्वना पुरस्कार पाइन्।
त्यस्तै, सुर (बेला) वादनमा सामिप्य डंगोल प्रथम भए। उनले मोहन सुन्दर पुरस्कार पनि पाएका छन्। स्वधा पौडेल द्वतीय र जया महर्जन तृतीय भएका थिए।
ताल वादनतर्फ शशांक सापकोटा प्रथम भएका थिए। उनले सन्तोष वर्मा पुरस्कार पनि पाएका छन्। सुजन तामाङ द्वितीय र सामिप्य डंगोल तृतीय भए।
त्यस्तै, संगीत क्षेत्रमा निरन्तर साधना, संवर्द्धन, संरक्षण र उत्थानमा निरन्तर लागेका र ५० वर्ष नाघेका साधकलाई दिइने 'किराँतेश्वर संगीताश्रम पुरस्कार'बाट साधक दंकन दास चौधरी सम्मानित भएका छन्।
त्यसैगरी शास्त्रीय संगीतका युवा साधकलाई दिइने 'पदमप्रिया–हरिप्रिया' पुरस्कारबाट सितार बाधक अमृत हिरा योगी पुरस्कृत भए।
किराँतेश्वर संगीताश्रमकी अध्यक्ष सरिता मिश्रले यस्ता कार्यक्रमले नयाँ पुस्ताका साधकलाई उत्प्रेरित गर्ने, पुराना सर्जकको जीवनभरको मिहिनेतलाई कदर गर्ने तथा शास्त्रीय संगीतलाई बचाउन पहल गरेको बताइन्।
कार्यक्रममा पुरस्कार वितरण गर्दै कार्यक्रमका प्रमुख अतिथि तथा पशुपति क्षेत्र विकास कोषका सदस्य सचिव डा प्रदीप ढकालले यस्ता कार्यक्रममा गर्दै आएको सहयोगलाई बढाउने र निरन्तरता दिने प्रतिबद्धता व्यक्त गरे। उनले संगीताश्रमको भवनलाई यसै आर्थिक वर्षमा निर्माण प्रक्रिया अघि बढाउने पनि बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
