राजविराज- सप्तरीको सप्तकोसी नगरपालिकास्थित कमलपुरमा सडक डिभिजन कार्यालय लहानले सुरु गरेको सडक निर्माणको काम अलपत्र परेको छ। असार अन्तिम साताको वर्षा र बाढीपछि अवरुद्ध भएको निर्माण कार्य अझै सुरु भएको छैन।
डिभिजन कार्यालय लहानले ‘मलेठ–भगनी–कमलपुर–ओद्राहा–बनिगामा–सखुवनी–सिद्धिपुर रिङ रोड’ योजना अन्तर्गत २०७५ माघ १४ गते सडक निर्माणको टेन्डर आह्वान गरेको थियो। सडक निर्माणको ठेक्का सप्तरीको राजविराजस्थित ओम रंजित कन्स्ट्रक्सनले पाएको थियो। कुल ९९ लाख ८३ हजार २ सय ११ रुपैयाँ ६२ पैसाको उक्त योजना तीन महिना भित्र सम्पन्न गर्नुपर्ने थियो।
कमलपुर चोक (भगनी मलेठ)बाट नगरपालिकाको वडा नं. १० र ११ को बीच हुँदै निस्कने यो सडक निर्माण बैैसाखको पहिलो सातादेखि सुरु भयो। तर, सुरुदेखि नै निर्माण कम्पनीले काममा उदासिनता देखाएको स्थानीय पशुपति चौधरी बताउँछन्। काम नगर्ने मनसायले गुणस्तरहीन र लापरबाहीपूर्वक काम गरेको उनको आरोप छ। ‘काम गुणस्तरहीन भयो भन्दा ‘गुणस्तरहीन’ शब्दकै अपमान हुन्छ,’ चौधरीले भने, ‘सरकारी रकमबाट हुने काममा यति साह्रो लापरबाही हुन्छ भन्ने पहिलो पटक अनुभव गर्न पाइयो।’
मापदण्ड विपरीतका काम
स्थानीयवासीको अवरोध भए काम छोड्न पाइने मनसाय राखेपनि आफूहरूकै अग्रसरता र पहलका कारण करिब ५० मिटरसम्म पिच भएको स्थानीय शम्भुप्रसाद चौधरीले बताए। तर, मापदण्ड अनुसारको काम कतै पनि नभएको उनको आरोप छ। ‘काममा इमान्दारिता नदेखिएपछि दुई पटक हामीले कम्पनीका मान्छेसँग कुरा गर्यौं। काम रोक्ने धम्की पनि दियौं,’ उनले भने, ‘काम रोक्ने कुरा गरेपछि उनीहरू नै खुसी हुने अवस्था देखेर हामीले नै करकाप गरेर केही काम गरायौं। तर, त्यो काम पनि उदेक लाग्दो छ।’
निर्माण कम्पनीले सुरुकै अवस्थादेखि काम भन्दा ‘छलछाम’ बढी गरेको पशुपति चौधरीको आरोप छ। ‘करिब ५० मिटर पिच भएको छ। तर, सम्बन्धित निकायले अहिले पनि अनुगमन गरोस्, कालोपत्रे कतै छैन। खाली गिट्टी मात्रै फेला पछर्,’ पिच भनिएको स्थानबाट हातमा गिट्टी उठाउँदै उनले भने, ‘सरकारी पैसाबाट भएको काममा यस्तो अराजकता कहीँ हुन्छ?’
निर्माण कम्पनीले रोलर लगाउनुपर्नेमा एक्स्काभेटर र सब बेस तयार गर्दा कम्प्रेसरले सफा गर्नुपर्ने ठाउँमा कुचो लगाएर काम चलाएको पनि उनले प्रष्ट्याए।
यस विषयमा सडक डिभिजन कार्यालय लहानमा जानकारी गराउँदा पनि बेवास्ता गरिएको वडा नं. १० का वडाअध्यक्ष उचित नारायण चौधरीले बताए। ‘योजना स्थलमा सुचना बोर्ड छैन, मनलाग्दी काम भयो,’ उनले थपे, ‘लगत स्टिमेट माग्दा ठेकेदारले नदिने, सडकका कर्मचारी पन्छिने गर्न थालेपछि मिलेमतोमै काम भएको प्रष्ट हुन्छ।’
प्राविधककै भनाइ अनुसार ६ मिटर चौडाई र १५ सेन्टिमिटर हाइटको बेस तथा ४ मिटर चौडाई र ३० एमएम हाइटको सडक बन्नु पर्ने थियो। तर, अधिकांश स्थानमा ३ देखि साढे ४ मिटरको बेस तथा तीन मिटर भन्दा कम पिच गरिएको चौधरीले दाबी गरे। उनले भने, ‘सडक कार्यालयको नाप्ने छुट्टै यन्त्र छ भने भन्नु केही छैन। तर, बुझे अनुसार कामको गुणस्तर र मापदण्ड यस्तो हुँदैन।’
सडक निर्माणको नाममा प्रकृया मात्रै पुर्याएर कर्मचारीकै मिलेमतोमा भ्रष्टाचार गरिएको उनको आरोप छ। निर्माण कम्पनीका प्रतिनिधिहरू भने सम्पर्कमा छैनन्।
नगरपालिकालाई टेर्दैन सडक डिभिजन
सडक निर्माणमा व्यापक गुनासो आएपछि मेयर उत्तम कुमार गौतमसहित सप्तकोशी नगरपालिकाको टोलीले स्थलगत निरीक्षण गर्यो। निर्माण कार्य सन्तोषजक नदेखिएपछि लहानस्थित सडक डिभिजन कार्यालयमै पुगेर त्यो विषयमा गुनासो गरेको थियो। तर, त्यति गर्दा पनि काममा सुधार नभएको मेयर गौतमले बताए। ‘काम हेर्दा चित्त बुझाउने अवस्था छैन। सडक बनाएको होकी गिट्टी छर्केको हो द्विविधा हुन्छ,’ उनले भने, ‘त्यो विषयमा हामीले कुरा राख्यौं। चिप्ला कुरा गरेर पठाए, काममा सुधार भएन।’
योजनाको लगत स्टिमेट माग्दा इमेल गरेर पठाइदिन्छु भनेको कार्यालयले २ महिना वितिसक्दा पनि उपलब्ध नगराएको भन्दै उनले आक्रोश व्यक्त गरे।
कार्यालयले नगरपालिका मात्र होइन, सञ्चारकर्मीलाई समेत स्टिमेट इमेलमा पठाइदिने भन्दै झुक्याउने गरेको छ। राजविराजबाट धाएर लहानस्थित कार्यालयमा निवेदन दर्ता गराएका प्रेस युनियनका केन्द्रीय पार्सद ओमप्रकाश साह भन्छन्, ‘फोन गर्दा कार्यालयमा आउनोस् भनेर बोलाए, कार्यालयमा जाँदा इमेल गर्दिन्छु भने। तर, निवेदन दर्ता गराएर आउँदा पनि लगत स्टिमेट पाइएन।’
सडक डिभिजनका कर्मचारीको आ–आफ्नै धुन
सडक डिभिजन कार्यालय लहानका प्रमुख विनोद साहले उक्त योजनाको बारेमा आफूलाई विस्तृत जानकारी नै नभएको प्रतिक्रिया दिए। सप्तरीमा सञ्चालित योजनाहरू इन्जिनियर नवीन साह र वेचन भण्डारीले हेरिरहेकाले उनीहरूसँग बुझेर मात्रै आफूले जवाफ दिन सक्ने उनको भनाइ छ।
सबैकुरा बुझेर आफूले योजनाको स्थलगत निरीक्षण गर्ने उनले बताए।
इन्जिनियर साह र भण्डारी भने सम्पर्कमा आउन चाहेनन्। साहको नम्बरमा फोन सम्पर्क गरी जानकारी माग्दा कार्यालयमा बोलाउने गरेका छन्। तर, पटक–पटक कार्यालयमा पुग्दा उनी भेटिँदैनन्। कार्यालयबाटै फोन गर्दा समेत उनको फोन नउठ्ने गरेको कमलपुरका स्थानीयवासी बताउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791950786-1793201567.png)
-1786602170.png)
