काबुल, अफगानिस्तानको राजधानी काबुलमा शनिबार भएको भीषण आतङ्ककारी हमलाको संयुक्त राष्ट्रसंघलगायत विश्वव्यापी रुपमा निन्दा गरिएको छ। एम्बुलेन्समा बम राखेर आत्मघाती विस्फोट गराइएको सो घटनामा ९५ जनाको मृत्यु भएको छ । साथै यसमा परी १ सय ६३ जना घाइते भएका बताइएको छ ।
अफगानिस्तानका अधिकारीहरुले यस हमलालाई अफगानिस्तानको यस वर्षको सबैभन्दा धेरै मानवीय क्षति हुने गरी भएको हिंसात्मक घटना भनेका छन्। यस हमलाको संयुक्त राष्ट्रसंघले कडा शब्दमा निन्दा गरेका छन्। संयुक्त राष्ट्रसंघको सुरक्षा परिषद्ले शनिबार भएको सो हमलाको निन्दा गर्दै आइतबार बिहान विज्ञप्ति प्रकाशन गरेको छ।
सुरक्षा परिषदद्वारा प्रकाशित सो विज्ञप्तिमा उक्त घटना आतङ्ककारी र कायर मानसिकताले गराइएको भन्दै यस्ता घटनाको जतिसुकै निन्दा गरेपनि नपुग्ने बताएको छ । संयुक्त राष्ट्रसंघीय महासचिव एन्टोनियो गुथ्रेसले पनि सो हमलाको कडा शब्दमा भत्र्सना गरेका छन्। उनले नागरिकको बाँच्न पाउने अधिकारको कुनै पनि पक्षबाट हमला गर्न नहुनेमा जोड दिएका छन्।
संयुक्त राज्य अमेरिकाका राष्ट्रपति डोनाल्ड ट्रम्पले पनि सो घटनाको विरोध गरेका छन्। उनले अफगानिस्तानलाई आतङ्कवादमुक्त गर्न अमेरिकाले जस्तोसुकै काममा पनि सघाउने धारणा राखेको ह्वाइट हाउसद्वारा जारी विज्ञप्तिमा जनाइएको छ।
अफगानिस्तानका राष्ट्रपति असरफ घानी र प्रमुख कार्यकारी अब्दुल्लाह अब्दुल्लाहले सो घटनाको निन्दा गरेका छन्। त्यस्तै अफगानिस्तानका अधिकारवादीहरुले पनि उक्त हमलाको कडा शब्दमा निन्दा गरेका छन्।
शनिबार अपरान्ह काबुलको मध्य भागमा अवस्थित सिदारात स्क्वायरमा स्थानीय समयानुसार दिउँसो करिब १२ः५० मा अत्यधिक भीड भएतर्फ लक्षित गरी विस्फोटक पदार्थ बोकेको एम्बुलेन्स ठोकाइएको थियो। घाइतेहरुमध्ये धेरैको अवस्था अत्यन्तै गम्भिर रहेको बताइएको छ। उनीहरुको सङ्ख्या बढी भएकाले विभिन्न स्थानीय अस्पतालहरूमा उपचारार्थ राखिएको छ।
उक्त शक्तिशाली बम विस्फोट गराइएको क्षेत्रमा अफगानिस्तानको गृह मन्त्रालयको पुरानो कार्यालय, युरोपेली संघलगायतका विभिन्न विदेशी र स्वदेशी संवेदनशील संघसंस्था र कार्यालयहरु रहेका छन्।
एम्बुलेन्स आक्रमणको तालिवान लडाकू समूहले जिम्मेवारी लिएको छ। घटनापछि सरकारी सुरक्षाकर्मीहरूले दोषीहरूको खोजी कार्य तीव्र पारेको जनाए पनि उनीहरुलाई अहिलेसम्म पक्राउ गर्न भने नसकिएको प्रहरीले बताएको छ। रासस/सिन्ह्वा
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
