राजाराम पौड्याल चर्चित हास्य कलाकार हुन्। रेडियो नेपालबाट प्रसारित बाल कार्यक्रमको रेडियो नाटकबाट अभिनय यात्रा थालेका उनी अहिले फिल्ममा अभिनय गरिरहेका छन्।
वयस्कताले छिन्यो गायक बन्ने रहर
दर्जनौं रेडियो नाटक, टेलिफिल्ममा अभिनय गरिसकेका राजाराम फिल्ममा उत्तिकै देखिइरहेका छन्। तर, उनको सुरुवाती चाहना गायक बन्ने थियो। त्यसैले उनी गीत गाउन थाले। रेडियो नेपालको बाल कार्यक्रममा पनि गाए।
सम्झिन्छन्, ‘मेरो स्वर मीठो भएकाले साथीहरु मलाई पिकनिकमा गीत गाउन लिएर जान्थेँ।’
उमेर बढ्दै जाँदा स्वर पनि धोद्रो हुँदै गयो।
‘पहिला एउटै स्वर सुरिलो सुनिन्थ्यो। पछि त दुइटा सुनिन थाल्यो’, उनले ठट्टा गरे। यसरी गायक बन्ने उनको सपना वयस्कताले खोसिदियो।
परिवारको खुसीका लागि पलायन
नाट्य क्षेत्रमा उनको रुचि र अनुभव दुवै थियो। उनी त्यतै सक्रिय भए। ०३९ सालमा पहिलो पटक गाईजात्रा प्रहसनमा भाग लिएपछि उनको अभिनय करिअरको गाडी राम्ररी गुड्न थालेको हो। वरिष्ठ कलाकारद्वय मदनकृष्ण श्रेष्ठ र हरिवंश आचार्यसँग गाईजात्रा कार्यक्रम गर्न पाउनुलाई उनी करिअरको महत्वपूर्ण मोडका रुपमा लिन्छन्।
त्यसपछि ‘मह’का हरेक कार्यक्रम र टेलिफिल्ममा काम गरे उनले। अभिनय क्षेत्रमा उनी व्यस्त भइरहेकै बेला केही समय अमेरिका पलायन भए।
उनी भन्छन्, ‘कलाकारिबाट कमाएको नाम एकातिर अनि परिवार, आफ्नो व्यक्तिगत जीवन र परिवारको खुसी अर्कातिर तुलामा तौलिँदा परिवारकै खुसी भारी पर्यो र अमेरिका हान्निएँ।’
हँसाउने राजारामको दुःखको क्षण
राजाराम नेपाली कलाकारहरुमा रमाइला व्यक्तिका रुपमा परिचित छन्। उनलाई मनमा लागेका कुरा साथीभाइ, परिवार र मिडियामा उत्तिकै खुलेर सेयर गर्ने गर्छन्। कहिल्यै पनि गम्भीर स्वभावमा प्रस्तुत नहुने राजाराम प्रायः घुमाउरा शब्दावलीका माध्यमबाट हँसाइरहन्छन्।
हाँसिरहने स्वभावका उनको हृदय छिया–छिया बनेको एउटा अनुभव सुनाउँछन्, ‘म अमेरिका बस्दा यस्तो क्षण पनि काट्नुपर्यो, जतिबेला मेरो नजिकको मान्छे मर्दा अन्त्येष्टिमा जान समेत मैले कामबाट बिदा पाइनँ। सायद जीवनका दुःखका घडीहरुमध्ये मेरो मानसपटलमा गहिरो चोट बनेर बसेको घटना हो यो।’
‘जति व्यस्त, त्यति स्वस्थ’
राजाराम फिल्ममा भने ०४९ सालमा ‘वासुदेव’बाट अभिनय गर्न थालेका हुन्। अहिले उनी व्यस्त कलाकारमध्येमा पर्छन् । यी पाका कलाकार व्यस्ततालाई लिएर यसरी प्रस्तुत भए, ‘जति व्यस्त भइन्छ, त्यति नै स्वस्थ पनि रहिन्छ।’
हास्यकलालाई अभिनयको मुख्य हतियार बनाइरहेका कलाकारहरुले निरन्तर ठूला पर्दामा पाइरहेको सफलताले उनलाई पनि गर्व लाग्छ।
उनले रमाइलो तरिकाले भने, ‘अहिले त साथीहरुले लगातार फिल्म खेल्ने मात्र होइन, पारिश्रमिक पनि कस्सेर लिन थाल्नुभएको छ। यो हास्यकलाकारका लागि खुसीको कुरा हो।’
उनले हालै १० लाख पारिश्रमिक पाएका केदार घिमिरे ‘माग्नेबुढा’लाई इंगित गरेका थिए।
पारिश्रमिक छैन प्राथमिकतामा
उनी आफू भने पारिश्रमिकलाई प्राथमिकतामा राखिरहेका छैनन्। उनी आफ्नो अभिनयलाई जीवनको अन्तिम समयसम्म निरन्तरता दिन चाहन्छन्। भन्छन्, ‘आज जति पारिश्रमिक लिइन्छ, त्यसलाई भविष्यसम्म निरन्तरता दिन सकिएन भने राम्रो हुँदैन। त्यसैले एउटा स्तरमा राख्छु।’
‘छक्का पञ्जा २’, ‘म यस्तो गीत गाउँछु’, ‘प्रेमगीत’ जस्ता नाम चलेका फिल्महरुमा अभिनय गरेबापत क्रमशः ३० हजार, २५ हजार, १५ हजार रुपैयाँ पारिश्रमिक थापेको उनले लुकाएनन्। तर, अब भने केही बढाउनुपर्छ कि भन्ने लागेको छ उनलाई।
बुढेसकालमा बैंस !
फिल्म ‘हुर्रे’को दोस्रो गीत सार्वजनिक कार्यक्रममा आइतबार दरबारमार्गस्थित क्युज हलमा भेटिएका राजाराम साथीभाइ, मिडियाकर्मी र फिल्मकर्मीको स्याबासी थाप्नमै व्यस्त थिए।
प्रसंग थियो उक्त गीतमा राजारामको बैंसालु नृत्यको। फिल्म दोस्रो गीतका रुपमा सार्वजनिक ‘बाँचे'नि पशुपति’ बोलको गीतमा ६० नाघेका राजाराम अभिनेत्री नीता ढुंगानासँग कम्मर मर्काइरहेका थिए। राजारामले यसअघि सार्वजनिक ‘ठेकीमा दही’ बोलको गीतमा पनि केकी अधिकारीसँग कम्मर मर्काएका थिए।
यही प्रसंगमा राजाराम मुस्कुराउँदै भन्छन्, ‘म उमेरले ६० कटे पनि अभिनयका लागि बल्ल १६ वर्षमा प्रवेश गरेको छु।’
राजारामले फिल्मको गीतको छायांकनका क्षण सम्झँदै भने, ‘सुरुमा निकै डर लागेको थियो, तर पछि डाइरेक्टरको सल्लाह र मेरो आफ्नै प्रयासले यो सफल बन्यो। मलाई केकी अधिकारी, नीता ढुंगाना जस्ता कालाकारहरुसँग नृत्य गर्न त्यति सहज थिएन, तर राम्रै भएछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
