भैरहवा- संस्कृति, पर्यटन तथा नागरिक उड्डयन मन्त्री योगेश भट्टराईले गौतमबुद्ध अन्तर्राष्ट्रिय विमानस्थल निर्माणका लागि आवश्यक नदीजन्य पदार्थ लगायत आवश्यक सबै सामग्री सहयोग गर्न स्थानीय तहलाई निर्देशन दिएका छन्।
नदीजन्य पदार्थको अभावमा निर्माण समस्या झेलेको विमानस्थलको अवलोकन तथा निरीक्षणमा आएका मन्त्री भट्टराईले विमानस्थललाई तोकिएको समयावधिभित्रै सम्पन्न गर्नका लागि सबैले सहयोग गर्नुपर्नेमा जोड दिए।
रुपन्देहीका केही स्थानीय तहहरुले सम्झौता गरेर कार्यदेश दिएर पनि विमानस्थल आयोजनालाई सहज रुपमा नदीजन्य पदार्थ उपलब्ध नगराएपछि समस्या देखिएको छ।
मन्त्री भट्टराईले बिहीबार भैरहवामास्थित विमानस्थलमा आयोजित विमानस्थलको प्रगति र समस्या विषयक छलफल कार्यक्रममा स्थानीय तहलाई निर्देशन दिएका हुन्। ‘आयोजनाको काममा कुनै पनि स्थानीय तह वा सरकारी निकायबाट बाधा उत्पन्न हुने कदमहरु सह्य हुनेछैनन्,’ मन्त्री भट्टराईले उपस्थित स्थानीय तहका प्रमुख तथा सरकारी निकायका प्रमुखहरुलाई निर्देशन दिँदै भने, ‘कुनै छलफल गर्नुछ भने पहिल्यै गरौं, पछि बाधा उत्पन्न गर्न पाइँदैन, त्यो हाम्रा लागि सह्य हुँदैन।’
बुटवल उपमहानगरपालिका, सिद्धार्थनगर नगरपालिका र जिल्ला समन्वय समितीका प्रमुखसहित विभिन्न सरकारी कार्यालयका प्रमुख सहभागी कार्यक्रममा उनले आयोजनाले माग गरे अनुसार पर्याप्त मात्रामा नदीजन्य पदार्थ उपलब्ध गराउनेदेखि आवश्यक सबै सहयोग गर्न निर्देशन दिए। ‘आयोजनाले माग गरेको अवस्थामा कहाँबाट हुन्छ पर्याप्त मात्रामा नदीजन्य पदार्थ उपलब्ध गराउनू, बाधा उत्पन्न गर्न भएन,’ उनले भने।
जिल्लाका स्थानीय तहहरुले सहज रुपमा नदीजन्य पदार्थ उपलब्ध नगराउँदा अन्य जिल्लाबाट नदीजन्य पदार्थ ढुवानी गर्नुपर्दा समस्या भएको आयोजना प्रमुख प्रवेश अधिकारीले कार्यक्रममा ब्रिफिङ गरेका थिए। विमानस्थलको ठेकेदार चिनियाँ कम्पनीका प्रतिनिधिले पनि विमानस्थल समयमा सम्पन्न गर्नका लागि नदीजन्य पदार्थ र माटोको अभाव समस्याको रुपमा रहेको बताएका थिए।
‘यो विमानस्थल समयमा सक्नु/नसक्नु हाम्रा लागि परीक्षा हो,’ मन्त्री भट्टराईले भने, ‘प्रधानमन्त्रीज्युले यसमा परीक्षा लिनुभएको छ। मलाई विश्वास छ, हामी यसमा उत्तीर्ण हुन्छौं।’ आयोजनाको काम सम्पन्न गर्नका लागि आवश्यक परे राजनीतिक संयन्त्र गठन गरेर भए पनि अघि बढ्नुपर्ने उनको भनाइ थियो।
उनले थपिएको म्याद (२०१९ डिसेम्बर ३०) भित्र विमानस्थलको निर्माण कार्य सम्पन्न गर्न समेत निर्देशन दिए। अधिकांश आयोजना अन्तिम समयमा पुग्दा समस्या उत्पन्न गरेको देखिए पनि यस आयोजनामा कुनै समस्या उत्पन्न हुन नदिने उनको भनाइ छ। त्यसका लागि आफूले अनुदान तथा ऋण सहयोगी एडिबीलाई पनि म्याद अवधिभित्र सबै रकम प्रदान गर्नका लागि स्पष्ट भाषमा भनिसकेको बताए। उनले ठेकेदार कम्पनीलाई रकम भुक्तानीमा सहजीकरण गर्ने तर निर्माण अवधि एक दिन पनि ढिला भए मान्य नहुने मन्त्री भट्टराईले चेतावनी दिए।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।