काठमाडौं- एक वर्षअघि नाडा अटो शोमा जिप ब्रान्ड औपचारिक रुपमा नेपाल भित्रिएको थियो।
वास्तवमा जिप कम्पास भित्रिनु नेपाली अटोमोबाइल बजारका लागि महत्वपूर्ण थियो। जसले गर्दा एक वर्षमै नेपालमा कम्पासको लोकप्रियता निकै माथि पुग्यो। गतिशील बजारको मागलाई धान्न जिपले कम्पासमा निरन्तर ‘अपडेट’हरु दिइनै रह्यो।
हाल नेपालमा उपलब्ध जिप कम्पासको सबैभन्दा टप भेरियन्ट लिमिटेड प्लस हो। जिप प्रेमीहरु योभन्दा पनि माथि एसयुभीको अपेक्षा गरिरहेको परिप्रेक्ष्यमा लाइफ अटोमोबाइलले यो वर्षको नाडा अटो शोमा अर्को शक्तिशाली र भारतमै पनि बहुप्रतिक्षित जिप कम्पास 'ट्रायल हक' ल्याउने भएको छ। त्यसो त यो एसयुभी भारतमा पनि औपचारिक रुपमा सार्वजनिक गरिएको छैन।
आखिर के छ त जिपको यो नयाँ उत्पादनमा?
ट्रायल हक ‘अफरोड–फोकस्ड’ छ र यसमा निकै आवश्यकता महसुस गरिएको ‘डिजेल अटो कम्बिनेसन’ रहेको छ। टाढाबाट हेर्दा ट्रायल हक अरु कम्पास जस्तै देखिन्छ, तर जब नजिकबाट हेरिन्छ यसमा पुराना क्रोम बिटहरुलाई ‘ब्ल्याक आउट’ गरिएको छ। ‘फ्रन्ट गिल’ अब ‘म्याट ब्ल्याक’ भएको छ र बोनेटको बीचमा रहेको जिपको लोगो पनि कालो बनाइएको छ।
सबैभन्दा महत्वपूर्ण कुरा यसको फेन्डरमा ‘ट्रायल रेटेड’ ब्याज पाइनेछ।
जिपले आफ्ना केही निश्चित मोडेललाई मात्र ‘ट्रायल रेटेड’ ब्याज दिने गरेको छ। ‘ट्रायल रेटेड’को अर्थ यो एसयूभी लिएर उपभोक्ता ट्रायलमा जान सक्छन् भन्ने हो। किनकी यो कठोर परीक्षण पास भएर आएको छ र यसमा केही निश्चित स्पेसिफिकेसनहरु छन्, जुन दुर्लभ मानिन्छन्।
ट्रायल रेटेड जिपले अफरोड चुनौतीको सजिलै सामना गर्न सक्छ। यसले जिप धनीलाई पूर्ण सुरक्षाको अनुभुति दिलाउँछ। किनकी यसले कठोर स्थानमा पनि साथ दिन्छ। ट्रायल हक हाइड्रो ब्लूबाहेक सबै कलरमा उपलब्ध हुनेछ।
उत्कृष्ट ‘अफरोड क्यापाबिलिटी’का लागि ट्रायल हकको बम्पर पनि रि-डिजाइन गरिएको छ। अगाडिको बम्परको एप्रोच एंगल २६.५ डिगी रहेको छ भने पछाडिको डिपार्चर एंगल ३१.६ डिगी रहेको छ।
ट्रायल हकमा १७ इन्चको अलोय ह्विल लगाइएको छ भने ग्राउन्ड क्लेरेन्स २०५ एमएम रहेको छ। यसको ‘वाटर वेन्डिङ डेप्थ’ ४८० एमएम रहेको छ, जुन अघिल्ला कम्पासको तुलनामा ७५ एमएम बढी हो। जसले गर्दा चालकले गहिरो पानी भएको खोलामा पनि मज्जाले ट्रायल हक चलाउन सक्नेछन्।
कम्पास ट्रायल हकमा सिंगल टोन ब्ल्याक इन्टेरियर प्रयोग गरिएको छ। यसमा सिट स्टिच, डोर प्याड, स्टेरिङ र गियर नब जस्ता स्थानमा रातो रङको प्रयोग गरिएको छ। स्ट्यान्डर्ड कम्पासमा चाहिँ डुअल टोन इन्टेरियर छ। यसमा लिमिटेड प्लसका फिचरहरु, जस्तो कि ६ स्पिकर अडियो सिस्टम, डुअल पेन पानोरामिक सनरुफ राखिएका छन्।
ट्याक्सन कन्ट्रोल, इलेक्ट्रोनिक स्ट्याबिलिटी कन्ट्रोल, हिल स्टार्ट असिस्ट, इबिडीसहितको एबिएस, ड्राइभर, प्यासेन्जर र साइड एयरब्याग पनि छन्। साथै अटो स्टार्ट स्टप सिस्टम, क्रुज कन्ट्रोल सिस्टम र ड्राइभरका लागि ७ इन्चको फुलकल एमआइडी डिस्प्ले पनि छ, जुन लिमिटेड प्लसमा छैन। ८.४ इन्चको इन्फोटेनमेन्ट सिस्टम यसमा उपलब्ध छ।
जिपको एक्टिभ डाइभ ४-बाई-४ सिस्टम रोटरी नब र अरु कन्ट्रोलहरु छन्। अटो, स्नो, स्यान्ड र मडसहित यसमा नयाँ एउटा मोडल थपिएको छ- रक।
ट्रायल हकमा ‘ट्राइड एन्ड टेस्टेड’ २.० लिटरको एफसिए निर्मित मल्टिजेड डिजेल प्रयोग गरिएको छ। जसले १७३ पिएस पावर र ३५० एनएम टर्क उत्पन्न गर्छ। ट्रायल हकको इन्जिन बिएस सिक्स्थ स्टयान्डर्ड अनुसारको छ।
९ स्पिड अटोमेटिक गियर बक्स यसको सबैभन्दा ठूलो परिवर्तन हो। डिजेल भर्सनका पुराना कम्पासमा ६ स्पिड म्यानुअल गियरबक्स थियो भने १.४ लिटरको पेटोल इन्जिनमा ७ स्पिड डिसिटी अटोमेटिक गियरबक्स थियो। अब भविष्यमा जिपले आफ्ना सबै कम्पासमा ९ स्पिड गियरबक्स प्रयोग गर्ने घोषणा गरिसकेको छ।
कम्पास ट्रायल हकमा डिजेल अटोमेटिक कम्बिनेसन छ र कठोर भू-बनोटमा पनि गुड्न सक्ने क्षमता छ। त्यसैले, अफरोड त्यो पनि अफ्ठ्यारो बाटो भएकै ठाउँमा ट्रायल गर्न चाहनेहरुले ट्रायल हक रुचाउने छन्।
नेपालमा यसको मूल्य एक करोड २५ लाख रुपैयाँको हाराहारी रहने अनुमान गरिएको छ।
यसका साथै कम्पनीले जिपका अन्य मोडलसमेत नाडा अटो शोमा प्रदर्शनीका लागि राख्ने जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
