नेपालगञ्ज– बाँके राष्ट्रिय निकुञ्जमा बाघ गणनाका लागि राखिएको स्वचालित क्यामेरामा भरुवा बन्दुक बोकेको सिकारीको फोटो कैद भएको छ।
निकुञ्जले बाघ गणनाका लागि पुस १९ गतेदेखि बाघ बढी हिँडडुल गर्ने सम्भावित स्थानहरुमा ५० जोडी स्वचालित क्यामेरा राखेको थियो। क्यामेराले खिचेका फोटोहरु हेर्ने क्रममा भरुवा बन्दुक बोकेको सिकारीको फोटो देखेपछि गणनामा खटिएका प्राविधिक, निकुञ्जका कर्मचारीका साथै निकुञ्जको सुरक्षार्थ खटिएका सैनिक अधिकृतहरु समेत अचम्ममा परे।
फोटोका व्यक्तिको पहिचानपछि निकुञ्जका कर्मचारी र सुरक्षाकर्मीहरुले सिकारीको घरमा छापा मारे। आफू सुटुक्क सिकार खेल्न गएर सुरक्षितै फर्किएका उनले आफ्नो संलग्नता अस्वीकार गरे।
बन्दुक बोकेर जंगलमा हिँड्दै गरेको फोटो नै छ भनेर कडा सोधपुछ गरेपछि निकुञ्ज नजिकै पर्ने ढकेरी गाउँका भेबबहादुर खत्रीले आफ्नो संलग्नता अन्ततः स्विकारे। तर, खत्रीको घरमा खानतलासी गर्दा बन्दुक भेटिएन। सोधपुछ गर्दै जाँदा सिकारीले निकुञ्जकै जलशैनी भन्ने ठाउँमा खमारीको धोद्रो रुखमा बन्दुक लुकाएर राखेको बताए।
सिकारीसहित निकुञ्जका कर्मचारी र सुरुक्षाकर्मी जलशैनीमा पुगेपछि रुखमा लुकाएको अवस्थामा बन्दुक फेला पर्यो।
खत्री वन्यजन्तुको सिकार गर्ने उद्देश्यले निकुञ्जको वन्यजन्तुको बढी चहलपहल हुने क्षेत्र जलशैनीमा भरुवा बन्दुकसहित पुगेका थिए। पहिलो दिनमा सिकार गर्न नसकेपछि जंगलमै बन्दुक लुकाएर घर फर्किएको उनले बताए।
बाँके निकुञ्जमा सिकारी खत्री पक्राउ परेको यो तेस्रो पटक हो। पहिलो पटक उनी निकुञ्ज क्षेत्रमा गएर बँदेल मार्ने र बँदेलको मासु राजमार्गका होटलमा बिक्री गरेको अभियोगमा पक्राउ परेका थिए। दोस्रो पटक उनी निकुञ्जमै सानो निर बिरालो मारेको अभियोगमा पक्राउ परेका थिए।
सिकारी खत्रीलाई राष्ट्रिय निकुञ्ज तथा वन्यजन्तु ऐन २०२० अनुसार कारबाही अगाडि बढाइने निकुञ्जका सहायक संरक्षण अधिकृत लालबहादुर भण्डारीले बताए।
दोस्रो पटक बाघ गणना हुँदै
बाघ र बाघको आहारा प्रजातिहरुको पछिल्लो अवस्था पत्ता लगाउन बाँके राष्ट्रिय निकुञ्जमा दोस्रो पटक बाघको गणना गर्न लागिएको हो।
गणनाका लागि स्वचालित क्यामेरासहित ४० जना प्राविधिकलाई खटाइएको निुकञ्जका सहायक संरक्षण अधिकृत भन्डारीले बताए।
राट्रिय निकुञ्जहरुमा बाघको गणना हरेक ४/४ वर्षमा गरिने भए पनि बाघको संख्या कम भएका निकुञ्जहरुमा हरेक वर्ष बाघको अनुगमन गरिन्छ।
गत वर्षको अनुगमनमा बाँकेमा १३ वटा वयस्क बाघ फेला परेका थिए। १३ मध्ये ९ वटा पोथी र ४ वटा भाले थिए। चार वर्षअघिको गणनामा भने निकुञ्जमा ४ वटा वयस्क बाघ भेटिएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
