जनकपुर- प्रदेश २ को मंगलबार बसेको प्रदेशसभा बैठकले लोक सेवा विधेयक पारित गरेको छ।
प्रदेश २ मा प्रदेश लोक सेवा आयोगको गठन काम, कर्तव्य र अधिकारका सम्बन्धमा व्यवस्था गर्न बनेको विधेयक पारित भएको हो।
जेठ १२ गते प्रदेशसभा बैठकमा टेबल भएको विधेयक झन्डै अढाई महिनापछि प्रदेश लोकसेवा विधेयक पारित भएको हो। यो विधेयक गत टेबल भएको थियो मंगलबार बसेको प्रदेशसभाको बैठकमा यो विधेयक पारित भएको घोषणा गरिएको छ।
विधेयक पारित भएसँगै अब प्रदेश २ सरकारलाई लोक सेवा आयोगको गठन गरी कर्मचारी भर्ना गर्ने बाटो खुलेको छ। प्रदेशसभामा पेश भएको यो विधेयक माथि सैद्वान्तिक छलफल भई विशेष छलफलका निम्ति ४ जना सांसद रहेको विशेष समितिमा पठाइएको थियो।
यसैबीच सोमबारको प्रदेशसभा बैठकमा सामाजिक विकास मन्त्री नवलकिशोर साहले पेश गरेको प्रदेश प्राविधिक शिक्षा परिषद्को स्थापना र संचालन गर्न बनेको विधेयक २०७६ माथि मंगलबार सैद्विान्तिक छलफल भएको छ।
छलफलमा भाग लिँदै नेकपाका सांसद गोविन्द न्यौपाने र कांग्रेसका सांसद शिवचन्द्र चौधरीले यो विधेयकलाई धेरै ठाउँमा सच्याउनु जरुरी रहेको बताए।
मन्त्री साहले सिप नसिकी हजारौं युवा विदेश गइरहेकाले प्राविधिक शिक्षा स्थापना गरेर उनीहरुलाई विभिन्न किसिमको तालिम दिन र आफैं रोजगारी गर्ने किसिमको प्राविधिक अध्ययनका निम्ति यो विधेयक अपरिहार्य भएको बताए।
बाढी पीडितलाई राहत दिन नसकेको भन्दै सरकारको आलोचना
प्रदेश २ का विभिन्न जिल्लामा बाढी आएको २० दिन बितिसक्दा समेत पीडितसमक्ष राहत नपुगेको भन्दै प्रदेश २ का सांसदले सरकारको आलोचना गरेका छन्।
प्रदेशका सत्तारुढ र विपक्षी सांसदले एकै स्वरमा प्रदेश सरकारको आलोचना गरेका हुन्। उनीहरुले प्रदेश सरकारले राहतमा पनि भेदभाव गरेको र जिम्मेवारीपूर्ण तरिकाले काम नगरेको आरोप समेत लगाए।
समाजवादी पार्टीका सांसद सञ्जय यादवले राहत वितरण गर्न प्रदेश सरकारले देखाउनुपर्ने तत्परता नदेखाएको बताए। बाढीपीडितका लागि हालसम्म हेल्प डेस्कसमेत स्थापना हुन नसकेको बताउँदै जनताको बलिदानीबाट निर्माण भएको सरकारलाई जिम्मेवारी पूर्वक राहत वितरण गर्नुपर्ने बताए।
समाजवादी पार्टीकै सांसद करिमा बेगमले मुख्यमन्त्रीले आफ्नै निर्वाचन क्षेत्रका बाढीपीडितलाई समेत राहत वितरण गर्न नसकेको बताइन्। उनले पर्साका धेरै ठाउँमा बाढीपीडित भएपनि प्रदेश सरकारले थोरै पनि ध्यान नदिएको गुनासो गरिन्।
राजपाकी सांसद रानी शर्मा तिवारीले प्रदेश सरकारले राहतमा पनि भेदभाव गरेको जनाउँदै आफ्नो क्षेत्रका बाढीपीडितलाई हालसम्म राहत वितरण नभएको बताइन्। उनले यसबारेमा मुख्यमन्त्रीलाई धेरै पटक फोन गरे पनि चासो नलिएको आरोप लगाइन्।
राजपाकै सांसद विन्देश्वर यादव ‘विक्की’ ले बाढीबाट क्षति भएका नदीहरूको बाँध र नदी नियन्त्रणका लागि प्राधिकरण गठन गरी अघि बढ्न सुझाव दिए।
कांग्रेसकी सांसद सरस्वती चौधरीले बाढीप्रति सरकारको ध्यान किन गएको छैन? भनेर प्रश्न गरिन्। उनले प्रदेश सरकारले आफैंले घोषणा गरेको मृतक परिवारलाई ३ लाखका दरको राहत हालसम्म कसैले नपाएको बताइन्।
कांग्रेसकै सांसद राजेश्वरप्रसाद साहले पर्सा जिल्लामा बाढीका कारण ४ जनाको ज्यान गएको र करोडौंको क्षति भएपनि हालसम्म राहत नपुगेको बताए।
नेकपाका सांसद गोविन्द न्यौपानेले सप्तरीको प्रत्येक स्थानीय तह बाढीबाट प्रभावित भए पनि हालसम्म प्रदेश सरकारले कुनै किसिमको राहत नदिएको बताए।
संघीयता समाप्त पार्न खोजेको आरोप
प्रदेश २ का विपक्षी दलका सांसदले प्रदेश सरकार स्वयं संघीयता समाप्त पार्न खोजेको आरोप लगाएका छन्। उनीहरूले संघीयता समाप्त गर्ने संघीय सरकारको दाउमा प्रदेश सरकार सहयोगी भएको आरोप समेत लगाए।
मंगलबार बसेको प्रदेशसभाको बैठकमा बोल्दै विपक्षी दल नेपाली कांग्रेसका संसदीय दलका नेता रामसरोज यादवले प्रदेश सरकारको क्रियाकलाप र स्वभाव हेर्दा संघीयता समाप्त गर्न उद्धत रहेको बताए। ‘प्रदेश सरकारको गतिविधिप्रति अति नै चिन्तित छु,’उनले भने, ‘अनियमितताको चर्चा, होटेलमा बसेर गरेको लेनदेनको कुरा र मुख्यमन्त्री र मन्त्रीहरुले गरिरहेको अपशब्दले यही सरकारले संघीयता समाप्त होस् भन्ने चाहेको छ।’
जनताको रगत, पसिनाबाट सिर्जित भएको पैसाले मन्त्रीहरुले मज्जा लिइरहेको बताउँदै उनले मन्त्रीहरु सामन्ती भइसकेको बताए। संघीयतालाई पालेर राख्नुपर्ने र यसमा आफूहरु पनि सहयोग गर्न तयार भएको बताउँदै यादवले मन्त्रीहरुको व्यबहारले जनता संघीयताको विरोधमा आउन सक्ने बताए। ‘यो प्रदेशका जनता संघीयताको बिरोधमा उत्रेपछि देशभर संघीयता रहँदैन,’उनले भने, ‘यसमा ध्यान दिनु जरुरी छ।’
नेकपाकी सांसद ज्वालाकुमारी साहले सार्वजनिक रुपमा अपशब्द बोल्ने मुख्यमन्त्री र मन्त्रीलाई राजिनामा दिनुपर्ने बताइन्। ‘अहिले मुख्यमन्त्री त हुनुहुन्न, तर अपशब्द बोल्ने सामाजिक विकास मन्त्री हुनुहुन्छ,’साहले भनिन्, ‘म नैतिकताको आधारमा दुवैलाई राजीनामा दिन आग्रह गर्दछु।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
