काठमाडौं- सरकारले फ्री-भिसा फ्री-टिकट नीति लागू गरेका खाडीलगायत विभिन्न मुलुकमा युवा पठाउँदा १० हजारभन्दा बढी शुल्क असुली गर्ने म्यानपावर कम्पनीमाथि वैदेशिक रोजगार विभागले स्टिङ अप्रेसन सुरु गरेको छ।
कामदारबाट तोकिएको भन्दा बढी रकम असुल्ने म्यानपावर कम्पनीमाथि विभागले स्टिङ अप्रेसन सुरु गरेको विभागका महानिर्देशक भीष्मकुमार भुसालले जानकारी दिए।
‘हामीले कामदारबाट बढी रकम असुल्ने म्यानपावर कम्पनीमाथि कारबाही प्रक्रिया अघि बढाइसकेका छौँ, अब हामी चुप लागेर बस्दैनौँ,’ महानिर्देशक भुसालले नेपाल लाइभसँग भने।
यसै सन्दर्भमा विगाले स्टिङ अप्रेसनका लागि अनुगमन गर्न जनशक्ति परिचालन गरेको छ। आइतबार विभागले ललितपुर कुपन्डोलस्थित प्याराडाइज इन्टरनेसनलमा छापा मारेको छ। कामदारलाई युएई पठाउने नाममा प्रति कामदार १ लाख १५ हजारदेखि १ लाख ३० हजारसम्म रकम असुली गरिरहेको गोप्य सूचनाका आधारमा विभागले सो म्यानपावर कम्पनीमा छापा मारेको हो।
छापा मार्ने क्रममा विभागको टोलीले तनहुँका कुमार गुरुङबाट म्यानपावरले १ लाख १५ हजार लिएको अबस्थामा रंगेहात फेला पारेको थियो।
प्याराडाइज म्यानपावरले युएईको फर्नेक कम्पनीमा क्लिनर काम भनी कुमार गुरुङसँग १ लाख १५ हजार असुली गरेको थियो। ‘पकेट खर्च छैन, १ लाख ५ हजारमा मिलाईदिनुस् न भन्दा पनि म्यानपावरले मान्दै मानेन,’ पीडित गुरुङले भने।
कुमार गुरुङसहित देवेन्द्र गुरुङ, गंगाबहादुर परियार, सुमन सार्कीलाई युएईको फर्नेक कम्पनीमा क्लिनर काममा पठाइदिने भन्दै प्याराडाइज म्यानपावरले प्रतिव्यक्ति १ लाख १५ देखि १ लाख ३० हजार रकम माग गरेको थियो।
युवाहरुले आइतबार बुझाएको रकम विभागको अनुगमन टोलीले जफत गरेको छ। कुमार गुरुङले बुझाएको १ लाख १५ हजार र देवेन्द्र गुरुङले बुझाउँदै गरेको १ लाख १० हजार रकम जफत गरिएको हो। देवेद्र गुरुङलाई पनि सोही कम्पनीमा जानका लागि १ लाख १५ हजार लाग्ने बताइएको थियो।
आइतबार देवेन्द्र गुरुङले १ लाख ५ हजार म्यानपावरलाई बुझाउँदा म्यानपावर कम्पनीले सो रकम लिन नमानेपछि उनले १ लाख १० हजार रकम बुझाउन लागेको अवस्थामा अनुगमन टोलीले फेला पारेको थियो।
सुमन सार्कीले भने प्याराडाइज म्यानपावरको पोखरा शाखाकी एजेन्ट सविना गुरुङलाई १ लाख ३० हजार रकम बुझाएको खुलेको छ। सो रकमबाट १ लाख २० हजार रकम फिर्ता दिन विभागले प्याराडाइजका म्यानेजिङ डाइरेक्टर जय खापुङलाई निर्देशन दिएको छ।
खापुङले आफूले सो रकम फिर्ता गर्न लगाउने बताएका छन्।
म्यानपावरले १ लाख १५ हजारभन्दा १ रुपैयाँ पनि कम नहुने बताएको थियो, सोही बेला विभाग टोली पुगी देबेन्द्र गुरुङलाई पनि १० हजारमा युएई उडाउन विभागले म्यानपावरलाई लिखित निर्देशन दिएको छ।
म्यानपावरलाई कागज गराई आइतबार युएई उडान भएका कामदारलाई आजै उडान गराउन र गन्तव्यमा पुगेपछि पनि तोके अनुसारको तलब सेवासुविधा र पारिश्रमिक सुनिश्चितता गराउने शर्तनामा गराएको छ। त्यस्तै म्यानपावरलाई विभागमा बयानका लागि समेत पत्र काटेको छ।
आइतबार नै विभागले सोही प्रालिले पोखराको ग्रान्ड शिवालय होटलमा अवैध तरिकाले अन्तर्वार्ताको गर्दै गरेको भन्ने उजुरीका आधारमा आकस्मिक अनुगमन गर्न श्रम तथा रोजगार कार्यालय पोखराबाट टोली खटाएको थियो। तर टोली त्यहाँ पुग्नु अगावै शाखा कार्यालयका कर्मचारी शाखा बन्द गरेर बाहिर निस्किसकेका थिए।
त्यसै गरी पृथ्वीचोकको टार्गेट कन्सल्ट्यान्ट ह्युमन रिसोर्सेजमा समेत टोलीले आकस्मिक अनुगमन गरेको थियो। बोर्ड हटाई अन्तर्वार्ता लिने गरेको उक्त स्थानमा बाहिर च्यानल गेट लगाई एकएक व्यक्तिलाई भित्र बोलाई अन्तर्वार्ता लिँदै गरेको पाइएको थियो। टोलीले उक्त स्थानबाट केही कागजात र कम्प्यूटर हार्डडिस्क बरामद गरी बयानका लागि पत्र काटेको छ।
सार्वजनिक बिदामा पनि विभागको छापा
सार्वजनिक बिदाका दिन पनि वैदेशिक रोजगार विभागले म्यानपावर माथि अनुगमन प्रक्रिया निरन्तर अघि बढाउने बताएको छ।
महानिर्देशक भुसाल भन्छन्, ‘म्यानपावरको बद्मासीमाथि सार्वजनिक बिदा होस् वा शनिबार हामीलाई रोक्दैन।’शनिबार (हिजो) पनि विभागको अनुगमन टोलीले बत्तीसपुतलीस्थित क्लासिक ओभर्सिस् म्यानपावर कम्पनीमा छापा मारेको थियो।
१४ महिना यता बन्द रहेको मलेसिया रोजगारीमा पठाउने भन्दै कामदारहरुको अवैधानिक अन्तरवार्ता लिइरहेको अवस्थामा विभागले छापा मारेको हो।
छापा मारेको अवस्थामा सय जनाभन्दा बढी युवालाई अवैधानिक रुपमा अन्तर्वार्ता लिइरहेको अवस्थामा विभागको अनुगमन टोलीले फेला पारेको थियो।
म्यानपावरले सो म्यानपावरकी सञ्चालिका सारदा न्यौपानेलाई २४ घण्टाभित्र विभागमा उपस्थित हुन निर्देशन दिइसकेको विभागले जनाएको छ।
वैदेशिक रोजगारीलाई थप व्यवस्थित गर्न तथा वैदेशिक रोजगार सम्बन्धी गैह्रकानुनी कार्यहरु नियन्त्रण गर्न अनुगमन टोली परिचालन गरिएको विभागले बताएको छ। अनुगमन टोली परिचालन कार्यविधि २०७६ गत शुक्रबारदेखि लागू गरेको श्रम मन्त्रालयले जानकारी दिएको छ। सोही कार्यविधिलाई टेकेर विभागले कुनै पनि समय वा सार्वजनिक बिदाका दिन समेत अनुगमन गर्न सक्नेछ।
सरकारले २०७२ असार २१ गतेदेखि लागू हुने गरी फ्री भिसा फ्री टिकट नीति ल्याएको छ।
यस नीति अनुसार बहराइन, कुवेत, ओमान, साउदी, युएई, कतार, मलेसिया गरी ७ वटा मुलुकमा कामदार पठाउँदा म्यानपावर कम्पनीले प्रतिव्यक्ति १० हजार लागत शुल्क मात्रै लिन पाउने व्यवस्था गरिएको छ।
तर सो नीति कार्यान्वयन नहुँदा कामदारले १ लाखदेखि ५ लाखसम्म बुझाएर रोजगारीका लागि जान बाध्य छन्। त्यसमाथि पनि म्यानपावर कम्पनीले कामदारबाट लाखौँ रकम असुली गरी १० हजार बुझाएको नगदी रसिद मात्रै उपलब्ध गराउँदै आएकाले यसबाट कामदार थप मारमा परेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
