राजविराज– कोशीटप्पु वन्यजन्तु आरक्षका जंगली जनावरको उपद्रोले आजित भएका सप्तरीको उत्तर–पूर्वी क्षेत्रका किसानहरुले आइतबार सप्तरीका प्रमुख जिल्ला अधिकारी भागीरथ पाण्डेलाई भेटेर र्याखर्याखती पारे।
जंगली जनावर नियन्त्रणको मागसहित पूर्वपश्चिम राजमार्ग अवरुद्ध गर्न भेला भएका किसानलाई छलफल मार्फत समस्याको समाधान खोज्न आग्रह गर्दै कञ्चनरुप नगरपालिका पुगेका पाण्डेले किसानको आक्रोशको सामना गर्नुपरेको हो।
सशस्त्र प्रहरी बल दन्तकाली गणका गणपति एसपी टंकवहादुर खडका, सीमा सुरक्षा कार्यालय सप्तरीका एसपी रामाधार यादव, नेपाल प्रहरीका डिएसपी ध्रुवकुमार श्रेष्ठ लगायत सुरक्षा प्रमुखसहित पुगेका पाण्डेलाई आफनो समस्या सुनाउँदै किसानहरुले सोधे–‘सिडिओ सा’व जंगली पशुको मुल्य मान्छेको भन्दा बढी हो?’
मान्छेको ज्यान लिने र आतंकित बनाउने पशुमाथि आक्रमण हुँदा जेल–नेल भोग्नुपर्ने, तर जनावरले मान्छे मार्दा खोजखबर समेत नहुने भन्दै उनीहरुले आक्रोश व्यक्त गरे।
कञ्चनरुप नगरपालिकाका मेयर वसन्त मिश्रले आरक्षबाट निस्कने जंगली पशुको आक्रमणमा परी यस वर्ष मात्रै ३ जना किसानले ज्यान गुमाएको स्मरण गराउँदै यसको दीर्घकालीन समाधान नखोजे जनताको जीवनरक्षाका लागि आफनै नेतृत्वमा आन्दोलन सुरु गर्ने चेतावनी समेत दिए।
‘जनताले रातभरि सुत्न पाएका छैनन्। डर÷त्रासमै जिन्दगी सकिँदै छ’ उनले भने, ‘किसानको वर्ष दिन खाने गहुँबाली १५ दिनभित्रमा सखाप भएको छ, तर सरकारले यस विषयमा कुनै चासो दिएन।’
आफू नगरको मेयरमा निर्वाचित भएपछि जनताले आफूमाथि अपेक्षा गर्नु स्वाभाविक भएको भन्दै मेयर मिश्रले कानुनी अड्चनका कारण आफूसँग जंगली जनावर नियन्त्रण गर्ने कुनै अधिकार नरहेको स्पष्ट पारे। उनले वन्यजन्तु आरक्षका जंगली जन्तु नियन्त्रणका लागि तत्काल ठोस कदम चाल्न प्रजिअ पाण्डेलाई आग्रह गरे।
यसैगरी, पीडित किसानहरुले अरुको जग्गा ठेक्कामा लिएर लगाएको बाली समेत जंगली जनावरको आहारा भएपछि आफ्ना छोराछोरी कसरी हेरचाह गर्ने भन्दै प्रश्न गरेका छन्।
‘जंगली जनावर मार्न पाईदैन भन्छन्, तर हाम्रा बालबच्चा मारेको देख्दैनन्’, पीडित किसान लक्ष्मण मण्डलले भने, ‘मानवअधिकार भन्दा बलियो पशु अधिकार हो?’
अर्का किसान निसुनिया पासवानले जनावरको संरक्षण अत्यावश्यक हो भने आफूहरुका लागि अर्को विकल्प तयार गरिदिन माग गरे।
मध्यवर्ती क्षेत्र व्यवस्थापन समितिका अध्यक्ष वीरेन्द्र यादवले आरक्षको सिमानामा तारबार लगाउने व्यवस्थाका लागि पहल गर्न सके समस्यालाई घटाउन सकिने धारणा राखे।
किसानहरुको गुनासो सुनेपछि प्रजिअ पाण्डले क्षतिग्रस्त क्षेत्रको अवलोकन समेत गरेका छन्। अवलोकनपछिको छलफलमा बोल्दै उनले वन्यजन्तु आतंक न्यूनीकरण र क्षति कम गर्न सुरक्षा निकाय र स्थानीय तहबाट संयुक्त गस्ती टोली परिचालन गर्न सकिने सुझाव दिँदै नागरिक स्तरबाट सरकारलाई ज्ञापनपत्र बुझाउन समेत आग्रह गरे।
छलफलमा सप्तकोशी नगरपालिकाका मेयर उत्तमकुमार गौतम तथा वडा अध्यक्षहरुको समेत सहभागिता थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
