दुई वर्षअघि नै माइती नेपालकी संस्थापक अनुराधा कोइरालाले सपना बुनेकी थिइन्- एउटा क्याफे खोल्ने र त्यहाँ आश्रय लिइरहेका चेलीहरूलाई आत्मनिर्भर बनाउने।
उनको त्यो सपना पूरा भएको छ।
बानेश्वर चोकनजिकै भर्खरै एउटा क्याफे उद्घाटन भयो, उनकै सहभागितामा।
नाम– माइती क्याफे।
विशेष परिकार– माइती वन, माइती आलु, र अन्य स्पेसल खानाहरू।
क्याफेमा २२ जना स्टाफ छन्। तीमध्ये १० जना त माइती नेपालकै चेली। आँखामा चमक र ओठमा प्रफुल्ल मुस्कान लिएर उनीहरू सेवामा तल्लीन छन्।
शनिबार क्याफे उद्घाटनको दिन।
भुइँतलाबाट माथिल्लो तलामा आउँदै गरेका अतिथिहरू एकपटक मुस्कुराउँछन्। बाहिरी भिडको ह्याङलाई चटक्कै मारिदिने आदरजन्य ‘वेलकम’।
व्यस्त समय, तर उचित व्यवस्थापन।
‘हामी फरक सोचिरहेका छौँ, सेवा पनि फरक दिने प्रयासमा छौँ,’ क्याफेका प्रमोटर समीर पन्थी भन्छन्। प्रमोटर पन्थी नाफा र लाभका लागि नभई सामाजिक सेवा र उत्तरदायित्वका लागि क्याफे खोलिएको बताउँछन्। ‘यसबाट भएको नाफाको ५१ प्रतिशत माइती नेपाललाई हुन्छ, बाँकी अन्य कामका लागि खर्चिन्छौँ,’ उनी भन्छन्।
उसो त क्याफेको नाममा ‘माइती’ जोडिनुले नै सम्बन्ध स्पष्ट पार्छ।
‘आफ्नो नेपाल’को सहकार्य
अमेरिकामा विभिन्न व्यवसाय गर्दै आएका पन्थीको एउटा चाहना थियो– नेपालमा सामाजिक काम गर्ने।
केही वर्षअघि अनुराधासँग उनको भेट भयो। उनी माइती नेपालसँग जोडिए। उताबाट सहयोग गर्दै गरे। ‘माइती नेपालजस्तो संस्था, सधैं कति अरुको डोनेसनमा चल्ने? त्यहाँका चेलीहरूलाई पनि आत्मनिर्भर बनाउन सकिए,’ उनले सोच्न थाले।
‘हामीले आयमूलक काम गरेर फण्ड जुटाउने कुराकानी गर्यौं,’ उनले भने, ‘सधैं अरुसँग मागेर हैन, समग्र नेपालीनै आत्मभिर्नर बनाउने योजना बुन्न थाल्यौं।’
त्यसपछि नेपाल आएर उनले ‘आफ्नो संस्था’ भन्ने संस्था खोले। त्यतिबेला उनलाई उनका साथीहरूले साथ दिइरहेका थिए। त्यस संस्थाबाट व्यावसायिक र सामाजिक दुवै काम भयो।
उही संस्थामार्फत् माइती नेपाललाई आत्मनिर्भर बनाउने योजनाहरू बुन्न थाले।
‘यही क्रममा माइती क्याफेको कन्सेप्ट आयो,’ उनले भने, ‘अब यसैलाई पाइलट प्रोजेक्ट बनाएर देशव्यापी रुपमा पुर्याउने हाम्रो योजना छ।’
क्याफेमा समीर लगायत उपेन्द्र बहादुर श्रेष्ठ, प्रवीर शमशेर राणा, मनिष कोइरालाको लगानी छ।
क्याफे एक सय सिट क्षमताको छ। सिट क्षमता अझै बढाउने उनीहरूको योजना छ। ‘स्टाफहरूलाई तालिमको व्यवस्था पनि छिट्टै गर्नेछौं,’ समीरले भने। समीरका अनुसार क्याफेमा २ करोड ५० लाखको लगानी छ।
चरिमाया भन्छिन्– चेलीका निम्ति अवसर
उद्घाटन कार्यक्रममा उपश्थित थिइन्, चरिमाया तामाङ। उनले समाजमा चेहीहरूलाई पुनस्र्थापना र आत्मनिर्भर बनाउने यो महत्वपूर्ण अभियान भएको बताइन्।
‘यो क्याफले माइती नेपालका चेलीहरूलाई अवसर दिएको छ। यो मेरो लागि पनि खुसीको कुरा हो,’ उनले भनिन्, ‘उकालो ओरालो गर्दै जाने क्रममा बहिनीहरूले जुन विश्वास लिएर काम गर्दै जानु भएको छ। उहाँहरू विश्वास अझै बलियो होस्। उहाँहरू आत्मनिर्भर बनुन्।’
चेलीहरूले सहयोग र अवसर पाए गर्न नसक्ने केही नभएको उनको धारणा थियो। दुई दशकअघि आफू बेचिएको पीडा सुनाउँदै उनले भनिन्, ‘माइती नेपालका चेलीहरूले आफूहरूले पनि पीडालाई भुलेर आत्मनिर्भर बन्नुपर्छ।’
हाल माइती नेपालबाट १० जना स्टाफ छन्।
बाध्यताबस् बाहिरबाट केही स्टाफ राख्नु परेपनि तालिमपश्चात् सबै स्टाफ माइती नेपालबाटै राख्ने पन्थीले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
