बनारस, भारत- प्रसिद्ध धार्मिकस्थल बनारस र गयामा नेपाली ठगिने गरेका छन् । धार्मिक आस्था र विश्वासका साथ तर्पण र श्राद्ध गर्न त्यहाँ पुगेका नेपाली धर्मका नाममा स्थानीय पुरोहितबाटै ठगिने गरेका हुन्।
बनारसमा स्थानीय पुरोहितले नेपालीका लागि भनेर मुण्डन गर्ने स्थान छुट्याएर पैसा लिने गरेका छन् भने गयामा स्थानीय पुरोहितले पूजाआजा तथा श्राद्ध गर्ने स्थान पैसा तिरेर किन्नुपर्ने बाध्यतामा पार्ने गरेको छ । नेपाली त्यहाँ मुण्डन र श्राद्ध गर्न भारु ३०० देखि १० हजाससम्म तिर्न बाध्य हुन्छन्।
‘नयाँ स्थान र नयाँ परिवेशका कारण नेपालीलाई धेरै विषयमा जानकारी नहुनाले उनीहरु ठगिन्छन्’ – रुपन्देही शुद्धोधन गाउँपालिकाका बमलाल भण्डारीले भने। नेपालबाट भारतीय तीर्थस्थल पठाउने माध्यमको खोजी गरेरमात्रै धार्मिकस्थल जान नेपालीलाई आग्रह गर्दै उहाँले त्यसरी जाँदा कम खर्चमा तर्पण र श्राद्ध गरेर घर फर्कन सकिने जानकारी दिए।
रुपन्देहीको सैनामैना–५ नगरपालिकाका युवराज ज्ञवालीले धर्मको नाममा भारतका तीर्थस्थलहरुमा नेपालीमाथि ठगी हुँदैआएको बताए। ती ठाउँमा आफ्नै पुरोहित लगेर पनि श्राद्ध वा तर्पणको काम गराउन नपाउनु नेपालीमाथिको अन्याय उनको धारणा छ।
उनले वनारस र गया आउने १० वर्षअघिको धोको पूरा भएको र आफ्ना दिवंगत भएका पितृको आत्माले शान्ति पाओस् भनेर यस क्षेत्रमा तर्पण र श्राद्ध गर्न आएको बताए।
भारतको बनारस र गयामा हरेक वर्ष डिसेम्बरदेखि मार्चसम्म नेपालका विभिन्न जिल्लाबाट झण्डै दुई लाख नेपाली तर्पण र श्राद्ध गर्न पुग्ने गरेको बताइन्छ।
स्थानीय पं रामकुमार ओझाका अनुसार विष्णु भगवान्ले गयासुर राक्षसलाई दबाएर मारेको र उसलाई पिण्डदान गरेकाले त्यो प्रचलन अहिलेसम्म चल्दै आएको छ । त्यसकारण मृत्युपछि पिण्डदान गरे मोक्ष प्राप्त हुने धार्मिक विश्वास रहिआएको छ । उनले कुनै पनि नेपालीलाई ठग्ने काम नभएको जिकिर गर्दै आफूले गरेको कामको शुल्कमात्रै लिएको बताए।
धुन्धकारीको मृत्युपछि बनेको प्रेतको उद्धार भएको र महाभारत युद्धमा भएको नरसंहारको कंलङ मेटाउन आफ्ना कुललाई पिण्डदान गरेको धार्मिक विश्वास रहेको पं ओझाको भनाइ छ । धेरै नेपाली भारतको बनारस नुहाउन र तर्पणका लागि जाने गर्छन् । श्राद्ध गर्न गया प्रसिद्ध मानिन्छ।
बनारसमा बाबा विश्वनाथ मन्दिर, शृंगारगौरीमा मन्दिर, काल भैरव, दुर्गाकुण्ड, तुलसी मानस मन्दिर, संकटमोचन मन्दिरलगायतका धार्मिकस्थलमा पूजाआजा र दर्शन गर्न पाइन्छ भने गया मोक्षधामका रुपमा परिचित छ । गयामा श्राद्ध गर्नका लागि एक हजार ४०८ पण्डित छन् जसले आ–आफ्नो धर्म र संस्कारअनुसार श्राद्ध गराउने गर्छन् । भारतको प्रान्तअनुसार बेग्लाबेग्लै धर्म र संस्कारअनुसार यी तीर्थस्थलमा पिण्डदान र श्राद्ध हुने गरेको बताइन्छ। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
