कैलाली- प्रदेश नम्बर ७ मा प्रदेशसभा सदस्यको सपथ ग्रहण ढिलो गरी सम्पन्न भएको छ।
बिहान ११ बजे सपथ ग्रहण कार्यक्रम तय गरिए पनि प्रदेश प्रमुख मोहन मल्ल काठमाडौंबाट धनगढी आउन ढिलाइ भएकाले उनी आएपछि अपराह्न ३ बजे सपथ गराइएको हो।
प्रदेश प्रमुख मल्ल २ बजे धनगढी आएर सचिवालयमा पदवहाली गरे लगत्तै सपथ ग्रहण कार्यक्रममा लागि जिल्ला समन्वय समितिको सभाहलमा पुगेका थिए।
प्रदेश प्रमुखले प्रदेशसभाका सांसदमध्ये ज्येष्ठ सदस्य नेपाली कांग्रेसकी समानुपातिक सांसद दिव्यश्वरी साहलाई सपथ ग्रहण गराएपछि उनले अन्य सदस्यहरूलाई सपथ गराएकी थिइन्।
सपथ समारोहमा प्रत्यक्षतर्फ ३२ र समानुपातिकतर्फ २१ जना गरी कुल ५३ सांसदमध्ये एक जना अनुपस्थित थिए। डोटीबाट प्रत्यक्षमा निर्वाचित कांग्रेसका भरत खड्का अनुपस्थित भएको प्रदेश प्रमुखको कार्यालयले जनाएको छ।
निर्वाचनबाट प्रदेश ७ मा एमालेका २५, नेपाली कांग्रेसका १२, नेकपा माओवादी केन्द्रका १४ र राष्ट्रिय जनता पार्टीका दुई जना सदस्य निर्वाचित भएका थिए।
सपथ ग्रहणपछि आइतबारै प्रदेशसभाको बैठक बस्ने भएकाले जिल्ला समन्वय समिति कैलालीको सभाकक्ष र वरपर सुरक्षा व्यवस्था कडा बनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
