भैरहवा- उद्योग, वाणिज्य तथा आपूर्ति मन्त्री मातृकाप्रसाद यादवले तेल आपूर्तिमा कुनै समस्या नहुने बताएका छन्। उनले सरकार गठनपछि आफ्नै कारणले आपूर्तिमा बाधा अड्चन आए पनि अहिले पेट्रोलिएम पदार्थको सहज ढंगले भइरहेको बताए।
नेपाल आयल निगम लिमिटेडद्वारा भैरहवामा पुनर्निर्माण गरिएको पेट्रोल पम्पको शुक्रबार भैरहवामा उद्घाटन गर्दै मन्त्री देशमा सुशासन कायम गर्नका लागि व्यवसायीहरुले छोटो समयमा काम गराउने नाममा पाँच पैसा पनि कसैलाई दिन नहुने बताए।
मन्त्री यादवले भने, 'केही व्यवसायी साथीहरुले हाकिमले घुस माग्यो भन्नुहुन्छ, तर पैसा म दिन्छु हाकिमलाई गएर दिनुस् भन्दा उहाँहरुले नाकमुख समेत देखाउन छोड्नुभयो, पछि बुझ्दा त तेल बढी पाइन्छ भन्ने उहाँहरुको मानसिकता रहेको पाइयो। उनले कुनै कर्मचारीले पैसा मागे ५ पैसा निदिई आफूहरुलाई जानकारी दिन आग्रह गरे।'
आफू मन्त्रीबाट हटेपछि हाकिमले सताउँछन् भन्ने नसोच्न व्यवसायीहरुलाई आग्रह गर्दै उनले थपे, 'म मन्त्री पदबाट हटे पनि सांसदबाट त कसैले हटाउन सक्दैन, फेरि मन्त्री जो भए पनि हाम्रै पार्टीको सरकार छ।'
मन्त्री यादवले आफू चाकडी गरेर मन्त्री नबनेकाले आफू बाधक भए मन्त्री पद त्याग्न तयार रहेको प्रधानमन्त्रीलाई समेत भनिसकेको बताए। 'आयल निगममा भ्रष्टाचार छ भन्ने कुरा आउँछ, आफूले भ्रष्टाचार गर्दिनँ भनेर मात्र नहुँदो रहेछ, वरिपरि भ्रष्टाचारी छन् कि छैनन्, त्यसमा ख्याल राख्नुपर्छ,' उनले भने।
मन्त्री यादवले भारतको अगाडि नझुकेको कुनै सरकार नै नभएको बताए। 'भारतको अगाडि नझुकेको, आरोप नखपेको अहिलेसम्म कुनै सरकारै बनेको छैन। एउटा पनि पाउनुहुन्न,' उनले भने, 'के सबै हामी सबै इन्डियाको दलालै हौं त?'
ट्रान्सपोर्ट व्यवसायी (ढुवानीकर्ता) को काँधमा बन्दुक राखेर आन्दोलन गर्न खोजिएको पनि मन्त्री यादवको भनाइ थियो।
सौर्य ऊर्जाबाट पेट्रोलपम्प
निगमको एक मात्र खुद्रा बिक्री केन्द्र रहेको भैरहवाको पेट्रोलपम्प सौर्य ऊर्जाबाट सञ्चालनमा ल्याइएको छ। केन्द्र प्रतिघन्टा ९ हजार ६ सय पेट्रोल र ९ हजार ६ सय लिटर डिजल वितरण गर्न सक्ने क्षमताको रहेको पम्पका प्रमुख गोविन्द्र चौधरीले बताए।
.JPG)
पुनर्निर्माण गरी शुक्रबारदेखि सञ्चालनमा ल्याइएको पम्पको मन्त्री मातृका यादवले गाडीमा डिजेल हालेर उद्घाटन गरे।
२०३७ सालदेखि सञ्चालनमा आएको सिद्धार्थनगर नगरपालिका ९ अञ्चलपुरस्थित निगमको पेट्रोल पम्पको क्षमता वृद्धि गरी समयसापेक्ष आधुनिकीरण गरिएको हो। घामपानीबाट पेट्रोलियम उपभोक्ताहरुलाई बचाउन ९ सय वर्गमिटरको क्षेत्रफल भएको अग्नि प्रतिरोधक एलुमिनियम कम्पोजिट मेटिरिएलबाट छाना निर्माण गरिएको छ।
पम्प परिसरभित्रको अग्नि नियन्त्रणको लागि २ वटा ७० केजी र ८ वटा १० केजी क्षमताको ड्राई केमिकल पाउडरसहित फायर एक्स्टिङ्गुसरको व्यवस्था गरिएको पम्पका प्रमुख चौधरीले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
