काबुल- शनिबार साँझदेखि बन्दुकधारीको कब्जामा रहेको काबुलस्थित सुविधासम्पन्न होटल इन्टरकन्टिनेन्टललाई अफगान प्रहरीले आफ्नो नियन्त्रणमा लिएको छ।
होटललाई बन्दुकधारीको कब्जाबाट मुक्त गर्ने क्रममा ५ नागरिक मारिएको र ६ घाइते भएको अफगानिस्तानको आन्तरिक मन्त्रालयले जनाएको छ। मृत्यु हुनेमध्ये १ जना विदेशी नागरिक रहेको पुष्टि भएको छ। मन्त्रालयका प्रवक्ताले दिएको जानकारी अनुसार सुरक्षा कारवाहीका क्रममा ३ जना बन्दुकधारीको समेत मृत्यु भएको छ।
होटलबाट १ सय ५० जनाभन्दा बढीलाई सकुशल उद्दार गरिएको थियो।
शनिबार साँझ होटलमा प्रवेश गरेका बन्दुकधारीहरुले आतंक सिर्जना गर्न कर्मचारी तथा होटलमा रहेका पाहुनाहरुमाझ अन्धाधुन्ध गोली तथा ग्रिनेड प्रहार गरेका थिए।
ग्रिनेड विस्फोट भएपछि होटलबाट धुँवाको मुस्लो बाहिर आएको प्रत्यक्षदर्शीहरुले बताएको बिबिसीले लेखेको छ।
अहिले पनि होटल तथा उद्दार गरिएका मानिसहरुको सुरक्षाका लागि विशेष सुरक्षा फौज तैनाथ गरिएको मन्त्रालयका प्रवक्ताले जनाएका छन्।
हालसम्म उक्त घटनाको कुनै पनि समूहले जिम्मेवारी लिएको छैन। तर, यसभन्दा अघि सन् २०११ मा उक्त होटलमा तालिवान समूहले आक्रमण गरेको थियो। सो घटनामा ९ आतंकवादीसहित २१ जनाको मृत्यु भएको थियो।
काबुलस्थित अमेरिकी दूतावासमा शहरको कुनै होटलमा आक्रमण हुनसक्ने धम्की आएको केही दिनपछि मात्रै शनिबारको घटना भएको हो।
दूतावासबाट बिहिबार जारी सार्वजनिक सुरक्षा चेतावनीमा भनिएको थियो,‘हामीलाई यो जानकारी छ कि कट्टरपंथी दल काबुलको कुनै होटलमा हमला गर्न योजना बनाइरहेको छ।’
तर चेतावनीमा हमला अन्तर्राष्ट्रिय विमानस्थल आसपासको होटलमा हुनसक्ने बताइएको थियो।
‘यो आतंकवादी समूह सार्वजनिक सभा र प्रदर्शन, सरकारी सेवा, परिवहन, बजार तथा धेरै विदेशी एकजुट हुने स्थानलाई लक्षित गरी आक्रमण गने समूहका रुपमा चिनिन्छ।’ चेतावनीमा उल्लेख छ।
आन्तरिक मन्त्रालयका अर्का एक प्रवक्ताले बन्दुकधारीले कसरी सुरक्षा घेरा तोड्न सफल भए भन्ने सम्बन्धमा घटनाको अनुसन्धान सुरु गरिएको बताएको एएफपी समाचार एजेन्सीले लेखेको छ। जबकि २ साता अघि मात्रै सो होटलको सुरक्षाको जीम्मा एक निजी कम्पनीलाई हस्तान्तरण गरिएको थियो।
उनका अनुसार होटलमा प्रवेश गर्न उनीहरुले भान्साको पछाडिको ढोका प्रयोग गरेको हुनसक्ने आकलन गरिएको छ।
इन्टरकन्टिनेन्टल विशेष गरी विवाह, सम्मेलन तथा राजनैतिक समारोहहरु आयोजना हुने सरकारी स्वामित्व रहेको होटल हो।
केही रिपोर्टका अनुसार होटलमा आइटी सम्मेलनको आयोजना भएको थियो जसमा प्रान्तीय अधिकारीहरुसमेत सहभागी थिए। त्यसकारण सोही सममेलनलाई लक्षित गरेर नै घटना घटाइएको हुनसक्ने अनुमान गरिएको छ।
पछिल्लो मे महिनामा ट्रक बम विस्फोटमा परि कम्तीमा १ सय ५० जनाको मृत्यु भएपछि काबुलको सुरक्षा व्यवस्था कडा बनाइँदै आएको थियो। तथापि पछिल्ला महिनाहरुमा हमलाहरुको संख्यामा भने कमी आएको थिएन। पछिल्लो महिना नै सिया सांस्कृतिक केन्द्रमा गराइएको विस्फोटमा परी ४० जनाभन्दा बढिको मृत्यु भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
