काठमाडौं- एमाले र माओवादी केन्द्रले प्रदेश सरकारको मुख्यमन्त्री, सभामुख, उपसभामुख र राष्ट्रियसभा सदस्यको नाम टुंगो लगाउने भएका छन्।
आज दिउँसो ३ बजे बस्ने बैठकले वाम गठबन्धनले प्रदेशसभा तर्फको भागबन्डा मिलाउने एमालेका नेता तथा प्रवक्ता योगेश भट्टराईले बताए। पार्टी एकता प्रक्रियाका बारेमा थप छलफल गर्नुपर्ने भएकाले आजै टुंगोमा भने पुग्न नसकिने उनको भनाइ छ।
दुवै दलका अध्यक्षबीच ओली निवास बालकोटमा शनिबार भएको बैठकमा प्रदेश सरकार गठन, राष्ट्रियसभा उम्मेदवार चयन र पार्टी एकीकरण प्रक्रिया टुंगो लगाउन आइतबार एकता संयोजन समितिको बैठक बोलाउने सहमति भएको थियो।
एमाले अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहालबीच शनिबार यी तीनै विषयमा करिब ३ घन्टा वार्ता चलेको थियो।
राष्ट्रियसभाको उम्मेदवारी र प्रदेश सरकार गठनका लागि कार्यदलले तयार पारेका प्रतिवेदनमा एकता संयोजन समितिले आइतबार निर्णय गर्ने सहमति उक्त भेटमा भएको थियो। आइतबार बस्ने कार्यदलको बैठकमा पार्टी एकताबारे पनि छलफल हुनेछ।
प्रदेशमा आफ्नो पक्षवाट दाबी गर्ने हिस्साको बारेमा निर्णय गर्न माओवादी केन्द्रले बिहान पार्टी हेडक्वार्टरका बैठक बोलाएको छ।
'अहिले तत्काल निर्णय गरिहाल्नुपर्ने राष्ट्रियसभाको उम्मेदवारी र प्रदेश सरकार गठनका लागि कार्यदलले तयार पारेका प्रतिवेदनमा आज निर्णय हुनेछ,' माओवादी प्रवक्ता पम्फा भुसालले भनिन्।
शनिबार अपराह्न माओवादी केन्द्रका अध्यक्ष दाहालसँग आफ्नो निवासमा भएको बैठकपछि एमाले अध्यक्ष ओलीले ठोस सहमति भएको बताएका छन्।
ओली निवास बालकोटमा भएको छलफलमा राष्ट्रियसभाको निर्वाचन, प्रदेश सरकारको गठनका लागि गठित संयुक्त कार्यदलको प्रतिवेदन, पार्टी एकता र एकताको साझा दस्तावेजका विषयमा कुराकानी भएको दाहालले पार्टीमा जानकारी गराएका थिए।
यसअघि दुवै दलका कार्यदलले राष्ट्रियसभाको उम्मेदवार बाँडफाँट, प्रदेश सरकारको खाका नेताहरूसमक्ष प्रस्तुत गरेको थियो। जसलाई आजको बैठकले अन्तिम रूप दिनेछ। यसले राष्ट्रियसभामा एकल संक्रमणीय मतका आधारमा जित्न सकिने ४३ सिटको बाँडफाँट गरेको थियो। एमाले र माओवादीबीच ६६ र ३३ अनुपातमा सिट बाँडफाँट गरिएको थियो। सोअनुसार एमालेले २९ र माओवादीले १४ सिटमा उम्मेदवारी दिनेछन्। त्यसैगरी ७ मध्ये एमाले र माओवादी गठबन्धन ६ वटा प्रदेशमा सरकार गठन गर्ने अवस्थामा छ।
एमाले अध्यक्ष ओली उपचारका लागि थाइल्यान्ड जानुभन्दा एक दिनअघि भएको बैठकमा एकता संयोजन समितिमा बैठकले कार्यदल गठन गरेको थियो।
दाहालले एकता सम्बन्धी थप विषयको निर्णय संयोजन समितिले नै गर्ने बताएका छन्। दाहाल र ओलीबीच यसअघि सानो कार्यदल बनाएर संगठन र वैचारिक विषयलाई अन्तिम रुप दिने सहमति भएको थियो। तर दुवै नेताबीच सहमति भएको एक दिनपछि बसेको संयोजन समिति बैठकले सो विषयलाई अर्को बैठकमा लैजाने निर्णय गरेको थियो। समितिमा एमालेबाट झलनाथ खनाल, माधवकुमार नेपाल, वामदेव गौतम, ईश्वर पोखरेल र माओवादीका तर्फबाट नारायणकाजी श्रेष्ठ, रामबहादुर थापा छन्।
एकतालाई तीव्रता दिन चुनावपछि बनेको एकता संयोजन समितिको बैठक बस्न लागेको दोस्रो पटक हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
