काठमाडौं- माओवादी केन्द्रका अध्यक्ष पुष्पकमल दाहाल ‘प्रचण्ड’ले नेकपा एमाले र माओवादीबीचको एकतालाई अनुमोदन गरेकाले पछाडि फर्केर जाने अवस्था कसैलाई नभएको बताएका छन्।
पार्टी कार्यालय पेरिसडाँडामा शनिबार पार्टी निकट जनसांस्कृतिक महासंघले आयोजना गरेको कार्यक्रमलाई सम्बोधन गर्दै अध्यक्ष दाहालले जनताले पार्टी एकतालाई स्वीकार गरिसकेको बताए।
पार्टीभित्रका केही व्यक्तिले एकताको विरोध गरिरहे पनि त्यसको कुनै औचित्य नभएको र त्यसले कुनै पनि प्रभाव नपार्ने उनको भनाइ थियो।
'एमाले–माओवादी एकताबाट प्रतिक्रियावादीहरु आत्तिएका छन्', अध्यक्ष दाहालले भने, 'जनता खुसी हुँदा उहाँहरु किन निराश हुनुभयो? नेपालमा राजनीतिक स्थिरता, समृद्धि र समाजवाद आउँदा उहाँहरुलाई के घाटा हुन्छ? मैले बुझ्न सकेको छैन।'
अध्यक्ष दाहालले आफूलाई लागेका विषय खुला फोरममा छलफल गर्न छाडेर एकता र बहसबाट भाग्नेहरु क्रान्तिकारी हुन नसक्ने तर्क समेत गरे।
नेपाली राजनीतिक इतिहासमा एमाले र माओवादी एक अर्काका पूरकको भूमिकामा रहँदै आएको उनले बताए।
नेपालका कम्युनिस्टलाई सधैं शत्रुको व्यवहार गरिँदै आएको भन्दै दाहालले एमालेलाई आक्रमण गर्ने शक्तिले नै माओवादी केन्द्रलाई समेत आक्रमण गरेको उल्लेख गरे।
विश्वभर कम्युनिस्ट आन्दोलन रक्षात्मक अवस्थामा पुगेको बेला नेपालमा फैलँदै गएको भन्दै अध्यक्ष दाहालले एमाले र माओवादी अलग-अलग पार्टी हुनुपर्ने कारण नै नरहेको बताए।
'हामीले माओवाद छोडेका छैनौं, एमालेले पनि जनताको बहुदलीय जनवाद छाडेको छैन', उनले भने, 'नेपालको राजनीतिक क्रान्तिमा माओवादको भूमिका छ भन्ने कुरामा एमालेका नेताहरु पनि सहमत हुनुहुन्छ, हामी पनि बहुदलीय राजनीतिक प्रतिस्पर्धामा आएका छौं। त्यसकारण समान राजनीतिक विचारधाराको हैसियतमा छौं।'
दाहालले एकले अर्काको पूर्ण सम्मान गरेर र अहिलेको परिस्थिति सुहाउँदो वैचारिक कार्यदिशा बनाएर अगाडि बढ्ने भएकाले कुनै शंका नरहेको स्पष्ट पारे। (रासस)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
