काठमाडौं– राजधानीमा चोरी र लुटपाटका घटना बढेका छन्। शुक्रबार मात्र चार वटा लुटपाट र चोरीका घटना भएका छन्।
तारकेश्वर नगरपालिका–१० मनमैजु डेरा गरी बस्ने लम्जुङकी २३ वर्षीया शुष्मा घिमिरेको कोठाबाट चोरहरुले ढोकाको ताला फोडेर करीव १ लाख ६६ हजार रुपैयाँ मुल्य बराबरका सुनका बिभिन्न गरगहनाहरु चोरी गरेका छन्।
उता ललितपुर महानगरपालिका–१४ लोहार चोक डेरा गरी बस्ने सिन्धुपाल्चोकका ५२ वर्षीय पासाङ दोर्जे लामाको डेरामा पनि चोरी भएको छ। कोही नभएको अवस्थामा कोठाको ताला फोडेर सुनका बिभिन्न गरगहना र नगद १ लाख रुपैयाँ गरी करीव १ लाख ८२ हजार रुपैयाँ बराबरको धनमाल चोरी भएको प्रहरीले जनाएको छ।
मध्यपुर ठिमी नगरपालिका–१ लोकन्थली डेरा गरी बस्ने झापाको दमकका ३३ वर्षीय उद्घब भट्टराईको कोठाबाट पनि चोरी भएको छ। कोठाको ताला फोडेर सुनका बिभिन्न गरगहना, ल्यापटप १ थान, क्यामेरा १ थान, ट्याब ३ थान, कम्प्युटरको हार्डडिक्स १ थान गरी करीव १ लाख ५५ हजार रुपैयाँ बराबरको धनमाल चोरी भएको छ।
शुक्रबार नै सामाखुशीमा एक व्यक्तिले आफु प्रहरी भएको भन्दै लुटेका थिए।
सामाखुशी पेट्रोल पम्प अगाडिबाट चितवन भरतपुरका ४५ वर्षीय विश्वप्रकाश भण्डारीले ६ हजार रुपैयाँ लुटेका हुन्। उनलाई प्रहरीले पक्राउ गरेको छ।
आफु प्रहरी हुँ भन्दै उनले पैसा लुटेको महानगरीय प्रहरी वृत्त महाराजगंजले जनाएको छ। उनीसँग पूर्व प्रहरीको परिचयपत्र फेला परेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
