मनिला- कामदारहरुमाथि हुन सक्ने दुर्व्यवहारको भयका कारण फिलिपिन्सले कुवेतमा कामदार पठाउन रोक लगाएको छ।
छोटो समयको अन्तरालमा आफ्ना केही कामदारको मृत्युको खबर बाहिर आएपछि फिलिपिनी राष्ट्रपति रोड्रिगो डुतेर्तेले सो घोषणा गरेका हुन्। तर यो योजना कहिलेसम्म जारी रहनेछ भन्ने खुलाइएको छैन।
दुर्व्यवहार सहन नसकी केही दिनयता ४ महिलाले कुवेतमा आत्महत्या गरेको राष्ट्रपतिले पुष्टिसमेत गरे। तेलको लागि धनी मुलुक कुवेतमा यौन दुर्व्यवहारमा परेका धेरै फिलिपिनी महिलाहरुको सुरक्षाप्रति आफू सचेत रहेको उनले दाबी गरे।
उता कुवेत सरकारले भने यस्तो दाबीमाथि फिलिपिनी अधिकारीहरुसँग सम्पर्क भइरहेको जनाएको छ। फिलिपिन्सका श्रम सचिव सिल्भेस्ट्रे बेलोले धरै यस्ता घटनाहरुमध्ये ६/७ घटनाहरुको मात्रै छानबिन चलिरहेको बताए।
महिनाको सुरुवातमा नै कुवेतमा आत्महत्या गरेकी एक फिलिपिनी महिलाको शव मनिला ल्याइएपछि फिलिपिन्स सरकार संवेदनशील बनेको हो।
परिवारले दिएको जानकारी अनुसार मृतक महिलाको शरीरमा चोटहरु देखिनुका साथै केही अंग पनि निकालिएको भेटिएको निक्की रिपोर्टले जनाएको छ।
फिलिपिन्सको विदेश मन्त्रालयले दिएको जानकारी अनुसार कुवेतमा झन्डै २ लाख ५० हजार फिलिपिनी कामदार कार्यरत छन्। अधिकतम कामदार नोकरी तथा घरेलु रोजगारीमा संलग्न छन्।
फिलिपिन्सका करिब २.३ मिलियन जनता वैदेशिक राजगारीमा छन्। उनीहरुको प्रमुख गन्तव्य खाडी मुलुक संयुक्त अरब इमिरेट्स, कतार तथा साउदी अरेबिया हुने गरेको छ।
वैदेशिक राजगारीबाट फिलिपिन्सले मासिक २ बिलियन अमेरिकी डलर रेमिट्यान्स भित्र्याउने तथ्यांक छ। रेमिट्यान्सलाई पछिल्लो समय देशको बढ्दो आर्थिक वृद्धिको प्रमुख कारणको रुपमा लिने गरिन्छ। बिबिसी
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
