काठमाडौं- उपप्रधान एवं स्वास्थ्य तथा जनसंख्या मन्त्री उपेन्द्र यादवले निजी अस्पतालले लामो समय चलाउन सक्ने अत्याधुनिक उपकरण वीर अस्पतालमा ल्याउने बित्तिकै किन बिग्रिन्छ भनी प्रश्न गरेका छन्।
वीर अस्पतालको १३०औँ वार्षिकोत्सव कार्यक्रममा बोल्दै उनले भने, ‘केही महिनाअघि एमआरआइ मेसिन उद्घाटन गरेर गएको अर्को दिन नै बिग्रियो भन्ने खबर आयो, अर्को दिन बिग्रेको होइन बिगारेका हुन् भनियो।’ रेडियोलोजीसँग सम्बन्धित विषयमा धेरै गुनासो आएको भन्दै मन्त्री यादवले अस्पतालका कर्मचारीले चलाउन नसके पब्लिक पार्टनसिपमा चलाउने चेतावनी समेत दिए।
सरकारी अस्पतालमा नियतवश उपकरण बिगारेर बिरामी निजी संस्थामा पठाउनेलाई कारबाहीको दायरामा ल्याइने उनको भनाइ थियो।
समायोजनको काम सकिएपछि ओएनएम सर्वेक्षण गरी वीर अस्पताललगायतका अन्य स्वास्थ्य संस्थामा जनशक्ति र उपकरणको समस्या समाधान गर्ने बताएका थिए।
वीर अस्पतालले स्वास्थ्य सेवा र शिक्षाको क्षेत्रमा महत्वपूर्ण योगदान दिएको भन्दै चिकित्सा विज्ञान राष्ट्रिय प्रतिष्ठानलाई अनुसन्धान केन्द्रको रुपमा पनि विकास गर्नुपर्नेमा मन्त्री यादवको जोड थियो।
स्वास्थ्य तथा जनसंख्या राज्यमन्त्री डा सुरेन्द्रप्रसाद यादवले सबैभन्दा धेरै सर्जन भएको अस्पतालमा किन थोरै शल्यक्रिया र थोरै सर्जन हुने भन्दै प्रश्न गरे। ‘हामीलाई वार्षिक मेडिकल अडिट चाहियो, कुन सर्जन कति शल्यक्रिया गरे, जब डायलासिस मेडिन जडान होइन, मिर्गौला प्रत्यारोपण कति हुन्छ भन्ने कुरा हुनुपर्छ,’ राज्यमन्त्री यादवले भने।
सरकारले देशभरका १७ केन्द्रीय अस्पतालमध्ये वीर अस्पताललाई 'सेन्टर फर एक्सिलेन्स'को रूपमा विकास विकास गर्न खोजेको बताए।
पूर्वस्वास्थ्यमन्त्री एवं नेकपाका सांसद खगराज अधिकारीले सरकारी चिकित्सकले निजी अस्पतालमा काम गर्दा अस्पताल चल्ने तर सरकारीमा काम गर्दा नचल्ने परिपाटीले सरकारी स्वास्थ्य सेवा प्रभावकारी नभएको धारणा राखे।
केही समयअघि विकिरण चुहावटबारे सञ्चारमा माध्यममा आएको समाचारप्रति लक्षित गर्दै स्वास्थ्य सचिव रामप्रसाद थपलियाले अस्पतालले आन्तरिक समस्यालाई पहिले समाधान गर्नुपर्ने भन्दै असन्तुष्टि जनाए।
वीरमा सिटी स्क्यान कक्षमा विकिरण चुहावट भएको समाचार स्वास्थ्यखबर पत्रिकाले प्रकाशन गरेपछि संसदमा समेत कुरा उठेको थियो। संसदले प्रश्न उठाएपछि स्वास्थ्य मन्त्रालयले उच्चस्तरीय कमिटी गठन गरी प्रतिवेदन बुझाउन निर्देशन दिएको थियो।
सचिव थपलियाले कमिटीले प्रतिवेदन बुझाइसकेको बताउँदै छिट्टै कार्यान्वयनमा ल्याइने जानकारी दिए।
वीर अस्पतालका निर्देशक डा केदार सेन्चुरीले आव २०७५/७६मा ४ लाख २२ हजार ८०१ सेवाग्राहीले आकस्मिकसहित बहिरङ्ग सेवा लिएको बताए।
उनले ६ हजार ८ सय ७७ जनाले आकस्मिकसहित शल्यक्रिया सेवा लिएको र १३ हजार १ सय ५९ जनाले अस्पतालमा भर्ना भई उपचार सेवा लिएको बताए।
वीर अस्पतालले इलेक्ट्रोनिक मेडिकल रेर्कड राख्ने, २० बेडको आइसियु सेवा संचालन गर्ने, अस्पतालकाृ सरसफाई,फोहरमैला व्यवस्थापन गर्ने आगामी कार्ययोजना रहेको सेन्चुरीले सुनाए।
विसं १९४७ साउन १२ गते प्रन्ध शय्यामा सेवा संचालन गरेको वीर अस्पतालले १ सय ३० वर्षको अवधिमा ४ सय ६० शय्या पुर्याएको छ।
२०५९ सालमा चिकित्सा विज्ञान राष्ट्रिय प्रतिष्ठानको रुपमा स्थापित भएपछि स्वास्थ्य सेवाका साथै चिकित्सकीय जनशक्ति उत्पादन समेत गर्दै आएको छ। प्रतिष्ठानले पिसिएल नर्सिङदेखि विभिन्न विधाका विशेषज्ञ चिकित्सक उत्पादन गर्दै आएको छ। तर, अस्पतालको व्यवस्थापन प्रभावकारी नहुँदा सेवा भने निकै कमजोर छ।
हरेक वर्ष अत्याधुनिक उपकरण खरीद गर्ने तर विभिन्न बहानामा ती उपकरणबाट सेवा नदिने, विशेषज्ञ चिकित्सक निजी अस्पतालमा बढी समय बिताउने, फार्मेसीमा आवश्यक औषधि नहुँदा महंगो मूल्यमा बाहिरबाट किन्नुपर्ने, भनसुनबिना शल्यक्रिया नहुने, समयमै उपचार नपाइनेलगायतका सेवाग्राहीका गुनासा समाधान हुन सकेको छैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
