काठमाडौं- काठमाडौं महानगरपालिकाले सडकमा असरल्ल रहेको तार व्यवथापनको काम तीव्र बनाएको छ।
बिहीबार बिहान त्रिपुरेश्वर चोकबाट दुई गाडी अव्यवस्थित तार संकलन गरेको महानगरपालिकाले वातावरण व्यवस्थापन विभाग, कार्यसञ्चालन शाखाका प्रमुख नगर प्रहरी निरीक्षक मीनबहादुर थापाले जानकारी दिए।
उनले भने 'काम गर्ने थोरै, बिगार्ने धेरै भएपछि सकारात्मक प्रभाव देखिँदैन। यसका लागि सबै जिम्मेवार हुनुपर्यो।'
संकलन गरिएका तारमा इन्टरनेट, केबल सेवा प्रदायकका तार र टेलिफोनका तार बढी छ। संकलित तार टेकुमा राखिएको छ।
सुरक्षाको दृष्टिकोणले भुइँमा लतारिएर जोखिम बनेका तार, प्रयोग नगरिएका तारले थप समस्या निम्त्याउने भएकाले तिनको व्यवस्थापन गर्नु अत्यावश्यक भएको प्रमुख नगर प्रहरी निरीक्षक थापाले बताए।
धूलो संकलन गर्ने, गैरकानुनी रूपले फोहोर फाल्नेलाई निगरानी गर्ने, सडक विस्तारका क्रममा छरपस्ट भएका तार बटुल्ने, अव्यवस्थित तार आफैं काट्ने वा अन्य निकायले काटेका तार व्यवस्थापन गर्ने अहिलेको नियमित काम भएको उनले जानकारी दिए।
सडक विस्तारका क्रममा हालसम्म महानगरपालिकाले ३० गाडी बराबरको तार व्यवस्थापन गरिसकेको र अब छिटै सबै स्थानका अव्यवस्थित तार संकलन गरिने बताइएको छ। (रासस)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
