काठमाडौं- मनाङबाट प्रदेशसभामा निर्वाचित सांसद राजीव गुरुङ (दीपक मनाङे) माथि सरकारले सर्वोच्च अदालतमा पुनरावेदन गर्ने भएको छ। गैरकानुनी सम्पत्ति आर्जन गरी शुद्धीकरण गरेको अभियोगमा विशेष अदालतबाट सफाइ पाएका उनीमाथि पुनरावेदन हुने भएको हो।
अस्वाभाविक सम्पत्ति देखिएको तर विशेष अदालतले ठहर नगरेकाले उनीविरुद्ध पुनरावेदन गर्ने निर्णयमा सरकार पुगेको महान्यायाधीवक्ता कार्यालयका प्रवक्ता सञ्जीवराज रेग्मीले बताए।
केन्द्रीय प्रहरी अनुसन्धान ब्युरो (सिआइबी) र सम्पत्ति शुद्धीकरण अनुसन्धान विभागको अनुसन्धानमा मनाङेको नाममा १४ करोडभन्दा बढीको सम्पत्ति देखिए पनि विशेषले सफाइ दिएको थियो।
ज्यान मुद्दामा तत्कालीन पुनरावेदन अदालत पाटनको फैसला सदर हुने निर्णय सर्वोच्चले मंगलबार मात्रै गरेको छ। यही समयमा मनाङेमाथि अर्को मुद्दा थपिन लागेको हो।
विशेष अदालतको फैसलाको पूर्णपाठ प्राप्त भएको र केही दिनमै पुनरावेदन दर्ता हुने प्रवक्ता रेग्मीले नेपाल लाइभलाई बताए। ठूलो सम्पत्तिको स्रोत नखुलेको अवस्थामा विशेषको निर्णय त्रुटिपूर्ण भएकाले उल्टी हुनुपर्ने सरकारको दाबी हुने उनको भनाइ छ।
मनाङेले विशेष अदालतबाट भदौ ५ गते सम्पत्ति शुद्धीकरणको मुद्दाबाट सफाइ पाएका थिए। एकै दिन मुद्दा खेपेका अन्य ४ जना गुन्डा नाइकेहरुको अन्तिम सुनुवाइ चलिरहेको छ।
कुनै समय काठमाडौंलाई आधार क्षेत्र बनाएर आपराधिक क्रियाकलापमा संलग्न हुँदै राजनीतिमा अवतरण गरेका मनाङे मनाङको प्रदेश ‘क’ बाट सांसद बनिसकेका छन्।
अर्थ मन्त्रालय मातहत रहेको सम्पत्ति शुद्धीकरण विभागले ५ जना गुन्डा नाइकेको सम्पत्तिबारे अनुसन्धान गर्दै २०७० जेठ ५ मा विशेष अदालतमा मुद्दा दायर गरेको थियो। गुन्डा नाइकेहरुको अवैध सम्पत्तिबारे अनुसन्धान गर्न र मुद्दा अदालतसम्म पुर्याउन ४ वर्ष लागेको थियो।
आपराधिक गतिविधि गरेर अकूत सम्पत्ति आर्जन गरेको मुद्दामा मनाङेको सम्पत्ति भने विभागले गरेको दाबी अनुसार नभएको ठहर विशेष अदालतले गरेको थियो। विशेषले त्यसबेला उनीसँगै श्रीमती पासाङ डोमा गुरुङलाई समेत सफाइ दियो।
अभियोगपत्रमा मनाङेकी श्रीमतीका नाममा काठमाडौंमा करिब ३ रोपनी जग्गा र घर तथा नुवाकोटमा ७७ रोपनी १३ आना जग्गा रहेको, मनाङेको नाममा गोसाइँकुण्ड क्रसर, ओम मल्टिपर्पोज, इच्छामाई र वेस्ट पोइन्ट ढुंगारोडामा गरी करिब ५० लाख शेयर लगानी दाबी गरिएको थियो। मनाङेका यी सबै लगानी आपराधिक गतिविधिबाट आर्जन गरेको दाबी आरोपपत्रमा गरिए पनि विशेषले त्यसलाई मान्यता नदिई फैसला सुनाएको थियो।
विशेषले मनाङेको सम्पत्ति शुद्धीकरणमा फैसला सुनाउँदै ‘आरोप दाबी सप्रमाण पुष्टि हुन नसकेकाले प्रतिवादीले आरोप दाबीबाट सफाइ पाउने’ भनेको थियो।
अन्य चार गुन्डा नाइकेको मुद्दा फैसलाको तयारीमा
मनाङेसँगै सम्पत्ति शुद्धीकरणको मुद्दा खेपेका गणेश लामा, पर्शुराम बस्नेत, अभिषेक गिरी र चक्रे मिलनको मुद्दा फैसलाको तयारीमा छ।
विभागसँगको समन्वयमा नेपाल प्रहरीको केन्द्रीय अनुसन्धान ब्युरो (सिआइबी) ले सबैको सम्पत्ति विवरणको अनुसन्धान गरेको थियो।
कुनै समय मनाङेकै सहयात्री रहेका र पछि परस्पर दुस्मन बनेका चक्रे मिलनको अन्तिम सुनुवाइ पुस ४ गतेदेखि सुरु भएको छ। उनको मुद्दा न्यायाधीशहरु द्वारिकामान जोशी, चण्डीराज ढकाल र नारायणप्रसाद पोखरेलको इजलासमा छ। अन्य अभियुक्तहरुको मुद्दाको अन्तिम सुनुवाइ सुरु भएको विशेष अदालतका रजिष्ट्रार भीमप्रसाद श्रेष्ठले बताए।
‘१–२ महिनाभित्र चारै अभियुक्तको मुद्दा फैसला हुने पाइपलाइनमा छन्,’ रजिष्ट्रार श्रेष्ठले भने, ‘सबै प्रतिवादीहरुको मुद्दा अंग पुगेर अन्तिम बहससमेत सुरु भएको छ र केहीमा सुनुवाई समाप्त गर्दै अध्ययनको क्रममा छन्।’ न्यायाधीशले फैसलाका लागि बहस नोट माग्ने क्रम र अध्ययन गर्ने कार्य गरिरहेको श्रेष्ठले बताए।
विभाग र ब्युरोको संयुक्त अनुसन्धानमा गणेश लामाको सम्पत्तिको लामो फेहरिस्त देखिएको थियो। लामा र उनको परिवारका नाममा विभिन्न कम्पनी, पेट्रोल पम्प र जग्गामा प्रशस्त लगानी रहेको देखिएको थियो।
लामाको नाममा काठमाडौं, भक्तपुर र ललितपुरमा २ सय ५ रोपनी जग्गाका साथै २७ करोड अवैध सम्पत्ति रहेको दाबी गरिएको थियो।
यस्तै, पर्शुराम बस्नेतका सहयोगी मुकेश बस्नेतको नाममा मोरङमा ४२ रोपनी जग्गा, तीन वटा गाडी, एडजोन एडभर्टाइजिङ, पिआर हार्डवेयर, बगलामुखी बिल्डर्स, गजलक्ष्मी ट्रेड, मेरो ट्राभल्स, वेलकम पार्टी प्यालेस र टेकेन्द्र निर्माण सेवा लगायतमा लगानीसहित ११ करोड अवैध सम्पत्ति रहेको अभियोग छ।
चक्रे मिलनको नाममा काठमाडौंमा ७ आना जग्गा र उनको परिवारका नाममा काठमाडौं र गोरखामा करिब ३० रोपनी जग्गा गरी ७ करोड र अर्का गुन्डा नाइके गिरीको नाममा २ करोड ९४ लाखको अवैध सम्पत्ति रहेको दाबी गरिएको थियो।
सम्बन्धित समाचार
- ज्यान मुद्दामा दीपक मनाङेलाई ५ वर्षको जेल सजाय, ३ वर्ष जेल बस्नुपर्ने
- मनाङे भन्छन्- सर्वोच्चको फैसलाले अचम्ममा परेँ
- सर्वोच्चको आदेशपछि के हुन्छ मनाङेको सांसद पद?
- चक्रेको हात छिनाएको घटनाले मनाङेको सांसद पद धरापमा
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
