काठमाडौं– आजदेखि असन क्षेत्रलाई चारपांग्रे सवारीसाधन मुक्त क्षेत्र बनाउने घोषणा भए पनि महानगरपालिकाको अक्षमताले निर्णय कार्यान्वायन असफल भएको छ। एक महिनादेखि तयारी गर्दा पनि महानगरपालिकाले त्यससम्बन्धि संकेत बोर्डहरु राख्न नसक्दा निर्णय कार्यान्वायन हुन नसकेको हो।
चारपांग्रे सवारीले असन क्षेलाई अव्यवस्थित बनाएको भन्दै महानगरपालिका र ट्राफिक प्रहरीले असन क्षेत्रमा चारपांग्रे सवारी निषेध गर्न लागिएको हो। आजदेखि सवारी निषेध गर्ने भनेपनि संकेत बोर्डहरु राख्ने काम पुरा नभइसकेकाले कार्यान्वायन भइनसकेको महानगरीय ट्राफिक प्रहरी महाशाखाका प्रवक्ता एसएसपी उमेश रञ्जितकारले बताए। ‘महानगरपालिकाले संकेतबोर्डहरु राख्ने काम गरिरहेको छ,’ उनले भने,‘बोर्डहरु राखिसकेपछि निर्णय कार्यान्वायन हुने छ।’ बुधबारदेखि निर्णय कार्यान्वायन हुने सम्भावना छ।
सहरी क्षेत्रको मौलिकतालाई बढ्दो सवारी अव्यवस्थाले अतिक्रमण गरेका कारण केही भागमा पूर्ण र केही भागमा आंशिक रुपमा काठमाडौं महानगरपालिकाले सवारी निषेध गर्न लागेको हो।
कहाँकहाँ हुनेछ निषेध?
काठमाडौं महानगरका अनुसार भोटाहिटीदेखि असनसम्मको दुईतर्फी सडकमा चारपांग्रे सवारी पूर्ण रुपमा निषेध हुनेछ। त्यस्तै इन्द्रचोकबाट असन, इन्द्रचोकबाट भेडासिंह, ज्याठाबाट त्यौड, ठँहिटीबाट असन, कमलाक्षीबाट असन, महाबौद्धबाट असन, इन्द्रचोकबाट वटुतर्फको सडकमा पनि चारपांग्रे सवारी गुडाउन पाइनेछैन।
नरदेवीबाट भेडासिंह हुँदै इन्द्रचोकसम्म एकतर्फी रुपमा चारपांग्रे सवारी लैजान सकिनेछ। यसरी एकतर्फी गरिएका अन्य सडकमा टेङ्गालबाट बाङ्गेमुढा, भेडासिंह हुँदै इन्द्रचोकसम्मको सडक, क्षेत्रपाटीबाट ठँहिटी हुँदै नघल बाङ्गेमुढा, भेडासिंह हुँदै इन्द्रचोकसम्मका सडक रहेका छन्।
महानगरकी उपप्रमुख हरिप्रभा खड्गी श्रेष्ठले आधुनिक सुविधा उपयोग र मौलिकताको संरक्षण अन्तर सम्बन्धित विषय रहेकाले दुवै पक्षलाई सन्तुलन गरे मात्र सुविधा भोग र मौलिकता संरक्षण हुने बताइन्। काठमाडौंमा पर्यटकको आकर्षण बढाउन, स्थानीयको आय बढाउनका लागि अहिलेको अस्तव्यवस्तामा सुधार गर्नैका लागि महानगरले यस्तो निर्णय गरेको उनको भनाइ छ।
यसअघि ठमेलका निश्चित सडकमा सवारी निषेध गरिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
