बुटवल- पहिरोमा पुरिएर गुल्मीमा ११ जनाको मृत्यु भएको छ भने २ जना बेपत्ता भएका छन्। जिल्लाको सत्यवति गाउँपालिकाको २ वटा वडाका ३ घर पहिरोले पुर्दा ११ जनाको मृत्यु भएको हो।
सत्यवति गाउँपालिका- ४, लिम्घामा ८ जनाको र सोही गाउँपालिका-३, ठूलो लुम्पेकमा २ जना र १ जना पहिरोबाट बच्नका लागि भाग्ने क्रममा मृत्यु भएको हो।
लिम्घाका मृतक मध्ये ६ जनाको शव बाहिर निकालिएको छ। अरु २ जनाको शव निकाल्ने काम भइरहेको प्रहरीले जनाएको छ।
पहिरोमा परेर मृत्यु हुनेमा ६५ वर्षीया छल्ली विक, २८ वर्षीया पम्फा विक, २५ वर्षीया निर्मला विक, १२ वर्षीया अंजली विक, ५ वर्षीय हिमांशु विक, ७ वर्षीया शिवानी विकको शव बाहिर निकालिएको प्रहरी जनाएको छ।
पहिरोमा ६ वर्षीया तारा विक डेढ वर्षीय सुमन विकको शव निकाल्ने कार्य जारी रहेको जिल्ला प्रहरी कार्यालय गुल्मीका प्रहरी निरीक्षक रवीन्द्र खड्काले बताए। सो घरका एक जना बालक सन्दीप विक मावली घरमा गएकाले जीवितै रहेका छन्।
त्यस्तै सोही गाउँपालिका-३ को ठूलोलुम्पेक कसिनडाँडा पहिरोमा पुरिएर ३२ वर्षीया तिलकुमारी त्रामू, ९ वर्षीय दर्शन त्रामूको मृत्यु भएको छ। त्यस्तै सोही वडामा पहिरोबाट बच्न भाग्ने क्रममा ६३ दुर्गाबहादुर सिंजालीको मृत्यु भएको छ।
ठूलो लुम्पेमा रुद्र विकको घर पहिरोले पुरेको छ। पहिरोमा घर पुरिँदा ४० वर्षीया माया विक र १६ वर्षीय गबी बिक बेपत्ता भएका छन्। पहिरोमा पुरिएर २ जना घाइते भएका छन्।
सत्यवति-४ का १० वर्षीय करिस्मा त्रामू र १३ वर्षीय धनि त्रामू घाइते भएको प्रहरीले जनाएको छ। सोमबार रातीदेखि परेको अविरल वर्षाले घर माथिबाट पहिरो जाँदा घरमा सुतिरहेकाहरुको मृत्यु भएको हो।
उद्धारको लागि जिल्लाबाट प्रहरी नायव उपरीक्षक मिनबहादुर घले, शसस्त्र प्रहरी नायव उपरीक्षक दिनेश रामयमाझी सहितको टोली घटना स्थलल पुगेर उद्धार कार्य गरेको प्रमुख जिल्ला अधिकारी पौडेलले बताए। पहिरो प्रभावित क्षेत्रमा डक्टरसहितको स्वस्थ्य टोली पनि पुगेको छ।
प्रदेश ५ का सामाजिक विकासमन्त्री सुर्दशन बराल सहितको टोली बुटवलबाट पहिरो प्रभावित क्षेत्रमा गएको छ। पहिरोमा परी मृत्यु हुनेका आफन्तलाई प्रदेश सरकारले राहत स्वरुप प्रतिव्यक्ति १ लाखका दरले रकम उपलब्ध गराउने निर्णय गरेको आन्तरिक मार्मिला तथा कानुन मन्त्रालयका सचिव केशवराज आचार्यले बताए।
वर्षाका कारण ठूलो लुम्पेकका करिब २ सय घर जोखिममा रहेको गाउँपालिका अध्यक्ष पारिश्वर ढकालले बताए। सिङ्गो गाउँ नै पहिरो प्रभावित रहेकाले घरसंख्याको आँकलन गर्न सकिने अवस्था नरहेको अध्यक्ष ढकालले बताए।
घरहरु जोखिममा रहेकाले स्थानीय विद्यालयमा बसिरहेका छन्। कुनै पनि समयमा पहिरो खस्ने डरले त्रसित उनीहरूलाई खानपिनको लागि वडा कार्यालयले व्यवस्थापन गरेको छ। प्रभावित क्षेत्रमा जिल्लाबाट र बुटवलबाट स्वास्थ्य सहितको उपचारको लागि खटिएको प्रमुख जिल्ला अधिकारी युदुनाथ पौडेलले बताए।
यसैबीच परराष्ट्रमन्त्री प्रदीप कुमार ज्ञवालीले सो पहिरोको निरीक्षण गरेका छन्। मन्त्री ज्ञवाली नेपाली सेनाको हेलिकप्टरमार्फत प्रभावित क्षेत्रमा पुगेका हुन्।
स्थानीयहरुसँग घटनाको वारेमा जानकारी लिएका मन्त्री ज्ञवालीले उद्दार र प्रभावित परिवारलाई के कसरी सहयोग गर्न सकिन्छ भनी बुझ्नका लागि आफू आएको मन्त्री ज्ञवालीले बताएका थिए।
उनले पहिरोमा ज्यान गुमाएका आफन्तहरुलाई समवेदना प्रकट गर्दै मृतकहरु प्रति श्रद्धाञ्जली व्यक्त गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
