गुल्मी- खोला किनारमा रहेको मुहानको पानी सोलार प्रविधिले डाँडोमा रहेको गाउँबस्तीमा पुगेपछि गुल्मीको जिमी र नरम गाउँका स्थानीय खुसी भएका छन्।
गाउँमा पुगेको खानेपानी सुविधासँगै स्थानीयले तरकारी खेतीमा सिँचाइ गरेर आम्दानी गर्न सुरु गरेका छन्।
नजिकमा मुहानको अभावका कारण वर्षौंदेखि खानेपानीको समस्या भोग्दै आएका गुल्मी दरबार गाउँपालिका–४ वीरबासको जिमी र छत्रकोट गाउँपालिका– ३ हर्दिनेटाको नरम गाउँका १ सय ६३ परिवारलाई घरघरमै पानी पुगेको हो। रिन्युएबल वर्ल्डको आर्थिक तथा आइडिई र सप्रोस नेपालको प्राविधिक सहयोग एवं नवप्रभात युवा संघको सामाजिक परिचालनमा गाउँमै खानेपानी पुर्याइएको हो। गाउँमा पुगेको खानेपानीलाई स्थानीयले मिटर प्रविधि जडान गरेर घरघरमै धारा निर्माण गरी वितरण गरेका छन्।
नजिक मुहान नभएका कारण गाउँलेलाई घरघरमै मिटर जडान गरेर खानेपानीको सुविधा लिने र सिँचाइ गरेर तरकारीसमेत उत्पादन गर्ने कल्पनासम्म नभएको वीरबासको जिमीकी माया रेश्मीले बताइन्। 'यसरी घरघरै पानीको धारा आउला भन्ने त हामीले कल्पना पनि गरेका थिएनौं', उनले भनिन्, 'अहिले घरमै पानी आएपछि घरको सरसफाइदेखि स्कुल जाने केटाकेटीलाई समेत निकै सजिलो भएको छ।' यसअघि गाउँलेलाई एक गाग्री खानेपानी लिनकै लागि डेढ घन्टा हिँड्नुपर्ने वाध्यता थियो।
वीरबासको बाहुन खोलाको पानी सोलार प्रविधिबाट ६१ मिटर उचाइमा दैनिक १० हजार लिटर पम्पिङ मार्फत जिमी गाउँका १४ घरधुरीमा र १६ हजार लिटर पानी जिमीकै ७१ घरधुरीमा सामुदायिक धारामार्फत वितरण गरिएको छ। त्यस्तै, छत्रकोटको हर्दिनेटामा पनि चनौटी खोलाबाट २ सय ७ मिटर उचाइमा दैनिक ३० हजार ५ सय ३० लिटर पानी पम्पिङ मार्फत ७८ घरधुरी र एक विद्यालयमा वितरण गरिएको रिन्युएबल वर्ल्डका क्षेत्रीय परियोजना अधिकृत गंगाप्रसाद आचार्यले बताए।
योजना व्यवस्थापनका लागि उपभोक्ता आफैँले समिति गठन गरेर योजना मर्मतका लागि प्रतिघर १ हजार र पानी खपत गरेका आधारमा थप रकम संकलन गर्नेगरी संरक्षण र व्यवस्थापन गर्दै आएका छन्। गाउँमा पानी पुर्याउन स्थानीय वडा, गाउँपालिका, परियोजना, स्थानीय जनश्रमदानसहित दुवै योजनामा झन्डै ९२ लाख रुपैयाँ खर्च भएको स्थानीय नवप्रभात युवा संघले जनाएको छ। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
