राजविराज– सप्तकोसी नगरपालिकाको प्रथम नगरसभाले पूर्वाञ्चलकै उत्कृष्ट पर्यटकीय स्थल बनाउने महत्वाकांक्षी योजना तय गरेको छ।
१९८२ सालमा निर्मित देशकै पहिलो चन्द्रनहर, चुरे क्षेत्रसहितको प्राकृतिक सम्पदा, सामुदायिक वन, धार्मिक स्थल, कोसीटप्पु वन्यजन्त आरक्ष लगायतको अधिकतम सदुपयोग गरी नगरलाई पर्यटकीय क्षेत्रका रुपमा विकास गर्ने नीति तथा कार्यक्रम नगरसभाले अनुमोदन गरेको छ।
यसैगरी, नगरको मुख्य बजारका रुपमा रहेको फत्तेपुर हटियामा व्यापारिक भवन निर्माण गर्ने, सहिद पार्क र चिडियाखाना निर्माण गर्ने, सुख्खा क्षेत्रमा भूमिगत सिँचाइको व्यवस्था गरी हरियाली बढाउने, रिङरोड बनाउने लगायतका योजना समेत नीति तथा कार्यक्रममा समेटिएको छ।
कान्छो नगरपालिकाका रुपमा रहेको सप्तकोशी नगरपालिकाको महत्वाकांक्षी योजना पूरा गर्न विभिन्न दातृ निकायसँग समन्वय गरिने जनाइएको छ। जसका लागि नगरपालिकाको पाँचवर्षे गुरुयोजना तयारीको अन्तिम चरणमा रहेको मेयर उत्तमकुमार गौतमले परिषदलाई जानकारी गराए।
‘गरिबी र बेरोजगारी हटाउँदै नगरलाई समृद्ध बनाउने अभिभारा मैले लिएको छु’, गौतमले भने, ‘जनमतको कदर गर्दै नगरको पाँचवर्षे मास्टर प्लान तयार भएको छ, जेठ अन्तिमसम्मका त्यसको अनुमोदनसहित काम अघि बढ्छ।’
सप्तकोसी नगरपालिकामा समस्या र अवसर दुवै रहेकाले अवसरलाई उपयोग गर्दै समस्यालाई घटाउने र विकासको गतिलाई तिव्रता दिने विषयमा मास्टर प्लानले काम गर्ने गौतमले बताए।
परिषदले नगरपालिकाहरुको भौतिक पूर्वाधार, सामाजिक, आर्थिक अवस्थाहरुको विस्तृत अध्ययन, आम्दानीका स्रोतहरुको पहिचान तथा एक वर्षभित्र गर्ने कामको खाकासहित २५ करोड ३७ लाख ८७ हजार ६ सय ९० रुपियाँ २५ पैसाको प्रस्तावित आय–व्यय प्रस्तुत गरेको छ।
फत्तेपुर, ओद्राहा र कमलपुर गाविसलाई मिलाएर ०७२ मंसिर १५ मा सप्तकोशी नगरपालिका घोषणा भएको थियो। ०६८ सालको जनगणना अनुसार २२ हजार जनसंख्या रहेको यो नगरपालिकाले कुल ६५ वर्गकिलोमिटर क्षेत्रफल ओगटेको छ।
सप्तरीका ९ नगरपालिका र ९ गाउँपालिकामध्ये हालसम्म राजविराज, हनुमाननगर कंकालिनी, वोदेवरसाइन नगरपालिका र तिलाठी–कोईलाडी गाउँपालिकाको अधिवेशन सम्पन्न भइसकेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
