काठमाडौं- काष्ठमण्डपको एक हजार १०० वर्ष पुरानो काठ वसन्तपुर क्षेत्रमा बेवारिसे छोडिँदा चोरी हुन थालेको छ।
पुरातात्विक महत्वको काठ काष्ठमण्डप, शिव पार्वती सत्तल, गृह मन्त्रालय अन्तर्गतको समारोह प्रबन्ध फाँटको कार्यालय रहेको चोक, भैरव मूर्ति अगाडि बेवारिसे अवस्थामा राखिएको छ। भूकम्पको ३२ महिना बित्दासमेत काष्ठमण्डप पुनःनिर्माण त परको कुरा, पुरातात्विक चिजबीजको संरक्षण समेत हुन सकेको छैन।
राष्ट्रिय पुनःनिर्माण प्राधिकरणले पहिले काष्ठमण्डप पुनःनिर्माणको जिम्मा स्थानीयवासीको समिति र पछि काठमाडौँ महानगरपालिकालाई दिएको थियो। महानगरपालिकाले पुनःनिर्माण सुरु गरेको छैन भने भत्किएका पुरातात्विक महत्वका काठसमेत संरक्षण गर्न सकेको छैन।
सम्पदा संरक्षणको अभियानमा लागेकी स्थानीयवासी सुमना श्रेष्ठ महानगरपालिका ऐतिहासिक महत्व बोकेका सम्पदा बनाउनभन्दा कमिसन खान लागेकाले काष्ठमण्डपका चिजबिज संरक्षण हुन नसकेको गुनासो गर्छिन्।
'महानगरपालिकाले हनुमानढोका संरक्षण कार्यक्रममार्फत यहाँ छिरेका पर्यटकसँग पैसा असुल्छ, तर त्यो पैसा कहाँ खर्च गर्छ? काष्ठमण्डप भत्किएपछि पुरातात्विक चिजबिजको संरक्षणका लागि पनि महानगरले ठाउँ उपलब्ध गराएन', उनले भनिन्।
काष्ठमण्डप पुनःनिर्माणका लागि अभियानले गत बैशाखमा काठ नाप्न सुरु गरेको थियो। स्थानीय तहमा जनप्रतिनिधि निर्वाचित भएर आएपछि महानगरले नै पुनःनिर्माण गर्ने निर्णय भएकाले कति काठ कहाँ-कहाँ राखिएको छ भन्ने अभिलेख महानगरसँगै हुनुपर्ने अभियानकी इञ्जिनियर बिनीता मगैया बताउँछिन्।
हनुमानढोका संरक्षण कार्यक्रम प्रमुख उदय पसखलः भने काष्ठमण्डपको कति काठ छ भन्ने अभिलेख महानगरसँग नभएको बताउँछन्। यो अभिलेख पुरातत्व विभागअन्तर्गतको हनुमानढोका दरबार हेरचाह अड्डामै हुनुपर्ने उनको भनाइ छ।
विभिन्न कलाकृति कुँदेर काष्ठमण्डपमा हालिएका झ्याल, ढोका लगायत पुरातात्विक वस्तुहरु भने सुरक्षित रहेको हनुमानढोका संरक्षण कार्यक्रमले जनाएको छ। (रासस)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766919412.png)
-1764146706.png)
-1766648928.png)
