राजविराज– जिल्ला दैवी प्रकोप उद्दार समिति सप्तरीले शीतलहरका कारण जोखिममा रहेकोहरुको जीवनरक्षा र उद्दारका गम्भीर भएर लाग्न सरोकारवालालाई निर्देशन दिएको छ।
समितिका संयोजक समेत रहेका प्रमुख जिल्ला अधिकारी भागीरथ पाण्डेयको अध्यक्षतामा बसेको बैठकले चिसोका कारण मानवीय क्षति भएको र जनजीवन कष्टकर भएको भन्दै यस्तो निर्देशन दिएको हो।
बैठकमा शीतलहरका कारण थप मानवीय क्षति हुन नदिन प्रमुख जिल्ला अधिकारी पाण्डेयले आ–आफ्नो क्षेत्रमा गम्भीरतापूर्वक लाग्न आग्रह गरेका थिए। उनले शीतलहर पीडितका लागि विभिन्न क्षेत्रबाट हालसम्म भएका प्रयासका विषयमा पनि चासो राखेका थिए।
प्रमुख जिल्ला अधिकारी पाण्डेयले शीतलहरबाट प्रभावित दलित र विपन्न समुदायका नागरिकहरुका लागि तत्काल न्यानो कपडा, कम्बल, दाउरा बाँड्न स्थानीय तहका प्रमुख तथा पदाधिकारीहरुलाई आग्रह समेत गरेका छन्। यसैगरी, आवश्यक उपचारसहितका स्वास्थ्यकर्मीहरुको टोली सम्बन्धित क्षेत्रमा पठाउन पनि निर्देशन दिए।
बैठकमा नेपाल प्रहरीका, सशस्त्र प्रहरी, नेपाली सेना लगायत सुरक्षा निकायका प्रमुखहरु, १८ वटै स्थानीय तहका कार्यकारी अधिकृत, स्थानीय तहका प्रमुखहरु, जिल्ला जनस्वास्थ्य कार्यालय, रेडक्रस सोसाइटीका प्रमुख तथा प्रतिनिधिहरुको सहभागिता थियो।
सप्तरीमा शीतलहरका कारण १७ जनाको मृत्यु भएको छ भने सोमबार बिहानदेखि झलमल्ल घाम लागेपछि सर्वसाधारणले केही राहतको महसुस गरेका छन्।
मलेकपुरको डोम बस्तीमा सिरक बाँडियो
शीतलहरका कारण कष्टकर जीवन बिताइरहेका सप्तरीको बेल्ही चपेना गाउँपालिका ५ स्थित मलेकपुरका डोम बस्तीमा भोर नामक सामाजिक संस्थाले सिरक–डस्ना वितरण गरेको छ। ओढ्ने-ओछ्याउने र लगाउने न्यानो कपडा तथा घर छाउनेसम्मको सामर्थ्य नहुँदा कमल-अरहुलिया मरिक दम्पती लगायत डोम समुदायका परिवारले पाएको दुःखका विषयमा नेपाल लाइभले समाचार सम्प्रेषण गरेको थियो।
उक्त संस्थाद्वारा निर्माण गरिएको मैथिली फिल्म ‘राज्जा रानी’ को टोली डोम बस्तीमा पुगेर सिरक, डस्ना, म्याट र बच्चाहरुका लागि टोपी लगायतका सामग्री उपलब्ध गराएको छ। बालविवाह र दाइजो विरूद्ध सन्देश बोकेको ‘राज्जा रानी’ बाट प्राप्त आम्दानी सामाजिक अभियानमा खर्च गर्ने घोषणापछि टोलीले डोमबस्तीमै पुगी ती सामग्री उपलब्ध गराएको फिल्मका निर्माता राजकुमार महतोले बताए।
न्यानो कपडाको अभावमा मलेकपुरका १० घर डोम परिवार कष्टपूर्ण जीवन बिताइरहेका छन् ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766919412.png)
-1764146706.png)
-1766648928.png)
