राजविराज– पछिल्लो समय सप्तरीमा कतै दिसामुक्त अभियान त कतै सरसफाइका नाममा सर्वसाधारणलाई अपमानित गर्नु सामान्य घटना जस्तै भएको छ।
घरमा शौचालय नबनाएको भन्दै शौच गरिरहेका व्यक्तिको फोटो खिचेर सामाजिक सञ्चालमा पोष्ट गर्दै अपमानित गरेको घट्ना सेलाउन नपाउँदै सोमबार सदरमुकाम राजविराजमै सर्वसाधारणलाई सार्वजनिक अपमान गरिएको छ।
ग्रामीण क्षेत्रबाट सरकारी कार्यालयको काम र बजार भर्न आउने सर्वसाधारणलाई खुला ठाउँमा पिसाब गरेकै आरोपमा १५ किलोको माला र अबीर जात्रा गरी बजार परिक्रमा गराइयो। यसरी बजार घुमाइएका व्यक्तिहरुले न त त्यसको प्रतिवाद गर्न सके, न त उनीहरुको पक्षमा बोलिदिने नै कोही निस्किए। अझ रोचक कुरा त मानवअधिकारका क्षेत्रमा काम गर्ने ‘सप्तरी सामुदायिक विकास केन्द्र’ र नगरपालिकाको सरसफाइको जिम्मा लिएको ‘सप्तरी युथ नेपाल’का युवाहरु नै यस्तो काममा सरिक भएको पाइएपछि सर्वसाधारण आश्चर्यमा परेका छन्।
पटक–पटक अभियान चलाउँदा पनि खुला शौच गर्नेको संख्या नघटेपछि यस्तो गर्नुपरेको अभियानकर्मीहरुले जनाएका छन्।
राजविराजमा पर्याप्त सार्वजनिक शौचालय नभएको र भएका शौचालय समेत ताल्चा लगाएर राखिएको अवस्थामा नागरिकको सम्मानपूर्वक बाँच्न पाउने अधिकारको हनन गरिएको भन्दै युवाहरुको यस्तो कदमको आलोचना पनि सुरु भएको छ। पर्याप्त सार्वजनिक शौचालयको व्यवस्था गरेर मात्रै यस्ता अभियान अगाडि बढाउन सर्वसाधारणले माग गरेका छन्।
नागरिक सञ्जालका अध्यक्ष सुखराम यादव भन्छन्, ‘नगरपालिका कार्यालयकै आडभरोसामा सर्वसाधारणलाई अपमानित गर्नु घोर आपत्तिजनक छ, यस्ता गतिविधि तत्काल रोकियोस्।’
राजविराजमा सार्वजनिक शौचालय हुँदै नभएको भने होइन, तर भएका ४ वटा सार्वजनिक शौचालय पनि प्रयोग गर्न लायक छैनन्। कतिपयमा ताल्चा लगाएर राखिएको छ भने कतिपय शौचालय फोहोर र दुर्गन्धले पसिसक्नु छैन। सरकारी कार्यालयका शौचालय पनि ताल्चा लगाएर राख्ने गरिएको स्थानीयहरु बताउँछन्। शौचालय प्रयोग गर्ने ठाउँ नै नभएपछि ग्रामीण क्षेत्रबाट सदरमुकाम आउने जोसुकैले सार्वजनिक स्थलमा र नगरवासीका घरका भित्तामा आड लागेर दिसापिसाब गर्नुपर्ने अवस्था छ।
वर्षौदेखिको यो समस्या समाधान नगरीकनै सुरु गरिएको माला लगाउने अभियानले सफलता नपाउने अधिकांशको तर्क छ।
राजविराज नगरपालिकाका मेयर शम्भुप्रसाद यादवले समेत युवाहरुबाट भएको क्रियाकलाप आपत्तिजनक भएको स्विकार्दै त्यसलाई तत्काल रोक्न निर्देशन दिएको बताए। उपमेयर साधना झाले भने समन्वय अभावमा यस्तो घटना भएको बताइन्।
‘भएका सार्वजनिक शौचालय प्रयोगमा ल्याएपछि यो अभियान सञ्चालन गर्न हामीले सल्लाह गरेका थियौं’, झाले भनिन्, ‘तर, शौचालयको सरसफाइ र व्यवस्थापन नहुँदै यस्तो भएछ, रोक्न लगाएका छौं।’
सप्तरी सामुदायिक विकास केन्द्रका अध्यक्ष शम्भुनन्दन चौधरीले भने नगरको सरसफाइका लागि भएका गतिविधिलाई सकारात्मक रुपमा लिनुपर्ने बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1755350560.jpg)
-1764146706.png)
