काठमाडौं- पूर्वराजा ज्ञानेन्द्र शाहले भारत उत्तर प्रदेशका मुख्यमन्त्री योगी आदित्यनाथसँग भेट गरेका छन्।
नेपालगन्ज र पश्चिम नेपालको भ्रमणमा केही दिनअघि निस्किएका पूर्वराजा ज्ञानेन्द्र आइतबार उत्तर प्रदेशको राजधानी लखनऊ गएका थिए।
हिन्दुत्वको नारासहित भारतीय राजनीतिमा उदाएका उत्तर प्रदेशका मुख्यमन्त्री योगी आदित्यनाथसँग नेपालका पूर्वराजा ज्ञानेन्द्रको यो भेटलाई अर्थपूर्ण रुपमा हेरिएको छ।
आदित्यनाथले आज बिहान ट्वीट गर्दै लखनऊको सरकारी आवासमा ज्ञानेन्द्रसँग भेट गरेको तस्विर सार्वजनिक गरेका छन्। भारतलाई हिन्दुराष्ट्र बनाउनुपर्ने अभिव्यक्ति दिने योगी आदित्यनाथ नेपालमा समेत हिन्दु धर्मको एजेण्डालाई समर्थन गर्छन्। उनी यसअघि पटकपटक नेपाल आउने गरेका छन्।
उत्तर प्रदेशमा उनको उदयलाई धेरैले नेपालको राजनीतिमा हिन्दुत्वका प्रवेश गर्ने आशंका व्यक्त गरेका थिए।
बाँकेमा नवनिर्मित होटल सोल्टीको उद्घाटन गर्न पुस १३ गते नेपालगन्ज पुगेका पूर्व राजाले पश्चिम नेपालका विभिन्न जिल्लाको भ्रमण गरेका थिए। नेपालगन्ज रहँदा उनले त्यहाँको बागेश्वरी मन्दिरको समेत दर्शन गरेका थिए भने धनगढीको शिवपुरी धाम उत्तरामेश्वर ज्योर्तिलिंगको समेत दर्शन गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
