नेपालगन्ज– नेपालगन्जसँग सीमा जोडिएको भारतीय बजार रुपैडियामा औषधि पसल खोलेर नेपाली युवालाई लागूऔषध बिक्री गर्दै आएका ६ वटा मेडिकल स्टोरबाट भारतीय प्रहरीले ठूलो परिमाणमा लागूऔषध बरामद गरेको छ।
नेपाली प्रहरी अधिकारीहरुको आग्रहपछि भारतको बहराइच प्रहरी प्रमुख जुगुल किशोरको सक्रियतामा वर्षाैंदेखि अवैध रुपमा लागूऔषधको कारोबार गर्दै आएका औषधि पसलहरुमाथि प्रहरीले कारबाही सुरु गरेको हो।
भारतीय प्रहरीले लागूऔषधको कारोबार गर्दै आएका रुपैडियास्थित बर्मा, ललित, अंकित, अतुल, डानिस र सुमित मेडिकल स्टोरबाट डाइजिपाम, नाइट्राबेट, क्लोनोट्रिल लगायतका लागूऔषध बरामद गरेको हो। लागूऔषध बरामद भएका ६ वटै मेडिकल स्टोरलाई प्रहरीले सिल गरी कारबाहीको प्रक्रिया अगाडि बढाएको छ।
सीमावर्ती रुपैडियाका केही भारतीय प्रहरी अधिकृतहरुकै संरक्षणमा ती मेडिकलहरु वर्षाैंदेखि अवैध रुपमा सञ्चालन हँुदै आएका थिए। केही मेडिकल स्टोर दर्ता समेत नगरी सञ्चालित थिए। सीमावर्ती भारतीय बजारमा सहज रुपमा लागूऔषध पाइने कारण नेपालगन्जबाट दैनिक दर्जनौं युवायुवती लागूऔषध सेवन र खरिदका लागि रुपैडिया जाने गरेका छन्।
नेपालगन्जमा लागूऔषधको अवस्था भयावह बन्दै गएका कारण नेपाली सुरक्षा अधिकारीले सीमावर्ती क्षेत्रमा हुने लागूऔषधको अवैध कारोबार रोक्न भारतीय समकक्षी अधिकारीहरुलाई आग्रह गर्दै आएका थिए।
नेपाली सुरक्षा अधिकारीहरुको आग्रहपछि भारतीय प्रहरीले सीमावर्ती क्षेत्रमा हुँदै आएको लागूऔषधको अवैध कारोबार रोक्न सक्रियता देखाएको हो।
पछिल्ला दिनमा नेपालगन्जको प्रहरी हिरासत र नेपालगन्ज कारागारमा लागूऔषध सम्बन्धी मुद्दाका अभियुक्त तथा कैदी–बन्दीले भरिन थालेका छन्।
नेपालगन्ज कारागारका प्रमुख श्याम लामिछानेका अनुसार नेपालगन्ज कारगारमा मात्रै २ सय १ जना लागूऔषध मुद्दाका अभियुक्त छन्। नेपालगन्ज कारागारमा रहेका ५५ जना भारतीय नागरिकमध्ये अधिकांश लागूऔषध सम्बन्धी मुद्दाका कैदी छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
