वासिङ्टन- अमेरिकी सांसद एरिक स्वालवेलले सन् २०२० को अमेरिकी राष्ट्रपतीय चुनावी अभियान आफूले त्यागेको घोषणा गरेका छन्।
डेमोक्रेटिक पार्टीका तर्फबाट उम्मेदवारी त्यागेको घोषणा गर्ने उनी पहिलो व्यक्ति हुन्। डेमोक्रेटिक पार्टीबाट ठूलो संख्यामा राष्ट्रपतिका आकांक्षीहरु पार्टीको प्राथमिक चुनावी मैदानमा छन्। संयुक्त राज्य अमेरिकामा राष्ट्रपतिको उम्मेदवार हुन पार्टीको प्राथमिक चुनावमा विजयी हुनुपर्दछ।
क्यालिफोर्नियाका सांसद स्वालवेलले पार्टीभित्र राम्रो जनमत सिर्जना गर्न नसकेपछि आफूले उम्मेदवारी फिर्ता लिएको बताएका छन्।
अमेरिकी तल्लो संसदको गुप्तचर समितिका सदस्य समेत रहेका स्वालवेलले अर्को चुनावमा संसदमै उठ्ने तयारी गरेको बताए। उनी सन् २०१३ देखि नै अमेरिकी संसद कङ्ग्रेसको सदस्य छन्।
उनले गत अप्रिलमा राष्ट्रपतिको उम्मेदवार हुने भन्दै पार्टीको चुनावी कार्यक्रममा सहभागी भएका थिए। गत महिना मियामीमा भएको पछिल्लो बहस कार्यक्रममा स्वालवेलले पूर्व उपराष्ट्रपति जो बाइडेनलाई पार्टीको नेतृत्व नयाँ पुस्तामा हस्तान्तरण गर्न आग्रह गरेका थिए।
एबिसी न्युजले गरेको पछिल्लो चुनावी सर्वेक्षणमा स्वालवेलले शून्य प्रतिशत मत प्राप्त गरेको देखिएको थियो। रासस/सिन्ह्वा
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791822485.png)
-1786602170.png)
