डडेल्धुरा– प्रधानमन्त्री एवं नेपाली कांग्रेसका सभापति शेरबहादुर देउवाले निर्वाचन खर्चको विवरण बुझाएका छन्। डडेल्धुराबाट प्रतिनिधिसभामा निर्वाचित देउवाले निर्वाचनमा २३ लाख ४ हजार ५ सय रुपैयाँ खर्च गरेको विवरण निर्वाचन कार्यालयमा बुझाएका हुन्। मंसिर २१ मा सम्पन्न प्रदेशसभा र प्रतिनिधिसभा सदस्य निर्वाचनमा डडेल्धुराबाट १४ उम्मेदवारमध्ये ८ उम्मेदवारले खर्च विवरण बुझाएका हुन्।
निर्वाचनमा खर्च विवरण बुझाउनेमा प्रतिनिधिसभातर्फका उम्मेदवारमा देउवा, राष्ट्रिय जनमोर्चाका लालबहादुर जाग्री र स्वतन्त्र उम्मेदवार कर्ण रावल रहेको जिल्ला निर्वाचन कार्यालय डडेल्धुराका निर्वाचन अधिकृत कृष्णसिंह नायकले जनाए।
खर्च विवरण अनुसार देउवाले सबैभन्दा बढी गोष्ठी र कार्यकर्ता परिचालनमा ७ लाख ६५ हजार खर्च गरेको विवरण पेश गरेका छन्।
यस्तै, देउवाले सवारी साधनमा ४ लाख ५० हजार, मतदाता नामावली छपाइमा २५ सय, सवारी इन्धनमा ९५ हजार, प्रचारप्रचार सामग्रीमा ९२ हजार, कार्यालय सञ्चालनमा ४ लाख ५० हजार, प्रतिनिधि परिचालनमा १ लाख ८० हजार र विविधमा १ लाख १५ हजार रुपैयाँ खर्च गरेको विवरण बुझाएका छन्।
प्रधानमन्त्री देउवाले पेश गरेको निर्वाचन खर्च विवरण
यस्तै, प्रदेशसभातर्फ खर्च विवरण बुझाउनेमा प्रदेशसभा (क) का कांग्रेस उम्मेदवार रघुवर भट्ट, राष्ट्रिय यथार्थवादी पार्टी नेपालका उम्मेदवार लालबहादुर दमाईं, राष्ट्रिय जनमोर्चाका चन्द्रसिंह बोहराले खर्च विवरण बुझाएका छन्।
प्रदेशसभा (ख) का कांग्रेस उम्मेदवार कर्णबहादुर मल्ल र राष्ट्रिय जनमोर्चाका पदमबहादुर ओलीले पनि खर्च विवरण बुझाएका छन्।
८ जनाले बुझाएको खर्च विवरण निर्वाचन आयोगको सीमाभित्रै रहेको निर्वाचन अधिकारी नायकले बताएका छन्।
प्रनिनिधिसभा सदस्य निर्वाचन ऐन, २०७४ को दफा ७२ को उपदफा(४) र प्रदेशसभा सदस्य निर्वाचन ऐन, २०७४ को दफा ७२ को उपदफा (४) मा निर्वाचन खर्चको विवरण दल, उम्मेदवार वा तिनका प्रतिनिधिले निर्वाचन परिणाम घोषणा भएको मितिले ३५ दिनभित्र आयोग वा आयोगले तोकेको कार्यालयसमक्ष पेस गर्नुपर्ने व्यवस्था छ।
प्रतिनिधिसभातर्फ वाम गठबन्धनका उम्मेदवार माओवादी केन्द्रका खगराज भट्ट, नेपाल दलितका रमेश टमटा र राष्ट्रिय मुक्ति आन्दोलन नेपालका लक्ष्मीदत्त भट्टले खर्च विवरण बुझाएका छैनन्।
प्रदेशसभातर्फ (क) मा विजयी वाम गठबन्धनका एमाले उम्मेदवार पठनसिंह बोहराले पनि खर्च विवरण पेश गरेका छैनन्। यस्तै, वाम गठबन्धनबाट प्रदेशसभा (ख) मा उम्मेदवार एमालेका डा ताराप्रसाद जोशी र नेपाल दलित पार्टीका रामबहादुर टमाटाले पनि निर्वाचन खर्च विवरण पेश गरेका छैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
