राजविराज– शितलहरका कारण १४ जनाको ज्यान गइसकेपछि सप्तरीमा दाउरा संकलन सुरु भएको छ। जिल्ला दैवी प्रकोप उद्दार समिति तथा स्थानीय तहको पहलमा आइतबारदेखि दाउरा संकलन र वितरण सुरु गरिएको हो।
सरोकारवाला निकायले शीतलहरबाट हुने जोखिमको पूर्व तयारीमा ध्यान नदिँदा सर्वसाधारणले अकालमा ज्यान गुमाउनुपरिरहेको भन्दै गुनासो बढेपछि दाउरा संकलन सुरु भएको हो। जिल्ला दैवी प्रकोप उद्दार समिति, स्थानीय तह र सरोकारवाला निकायबीच समन्वय हुन नसक्दा चिसोबाट पीगित वर्गलाई समयमै तातोको व्यवस्था मिलाउन नसकिएको स्थानीय तहका जनप्रतिनिधिले नै गुनासो गरेका छन्।
दाउराका लागि समन्वय गर्नुपर्ने निकायका प्रमुख (जिल्ला वन अधिकृत) ले मोबाइल स्विच अफ गरेर बसेपछि अधिकांश स्थानीय तहमा दाउरा वितरण गर्न नसकिएको स्थानीय तहका प्रमुख तथा अध्यक्षहरुले आरोप लगाएका छन्।
आइतबार भने वन कार्यालयका कर्मचारीसँग समन्वय गरेर दाउरा संकलन सुरु भएको उनीहरुले बताए। वन कार्यालयका कर्मचारीले भने तिलाठी–कोइलाडी गाउँपालिका लगायतका केही स्थानीय तहका जनप्रतिनिधि सम्पर्कमा आएपछि दाउरा संकलनका लागि स्वीकृति दिइएको बताए।
तर, जिल्ला दैवी प्रकोप उद्दार समितिका संयोजक तथा सप्तरीका सिडिओ भागिरथ पाण्डेले भने आफूले यसअघि नै दाउरा वितरण तथा आगो बाल्नका लागि सेना, प्रहरी र स्थानीय तहलाई निर्देशन दिइसकेको बताएका छन्। उनले हालसम्म सम्पूर्ण स्थानीय तहमा गरी ७ हजार कम्बल वितरण गरिएको र अझै ७ हजार कम्बल वितरणको तयारी भइरहेको बताएका छन्।
मंसिरको अन्तिम सातासम्म गत साउनको बाढी पीडितलाई राहत वितरण गर्दै आएको रेडक्रस सोसाइटी सप्तरीले हालसम्म शीतलहर पीडितका लागि भने राहतको कार्यक्रम अघि सारेको छैन।
सप्तरीमा हालसम्म शीतलहरका कारण ७ महिने बालकसहित १४ जनाले ज्यान गुमाइसकेका छन्। चिसोले कठ्याङ्ग्रिएर हालसम्म कञ्चनरुप–४ जगतपुरका ललित चौधरीका ७ महिने छोरा गणेश चौधरी, वडा नम्बर २ बरमझियाका ५५ वर्षीय बेचन शेख, वडा नम्बर ७ का ६१ वर्षीय उत्तम मरिक (डोम), खडक नगरपालिका–८ मुसरनियाका ७० वर्षीय मुसहरु चौधरी, कृष्णा सवरण गाउँपालिका ४ का ६० वर्षीय लखन ठाकुर, डाकनेश्वरी नगरपालिका ८ का ५५ वर्षीय झौली यादवको मत्यु भएको छ।
यसैगरी, तिलाठी–कोइलाडी गाउँपालिका २ लौनियाँका ५५ वर्षीय सुजान ठाकुर, वडा नम्बर ७ का ३६ वर्षीय शिवु मण्डल, महदेवा गाउँपालिका २ का ५८ वर्षीय सुकदेव यादव, राजविराज नगरपालिका २ का ६० वर्षीया नाजो बेगम, वडा नम्बर १० का ६५ वर्षीया कैलीदेवी खंग, छिन्नमस्ता गाउँपालिका १ का ३५ वर्षीय रामदयाल राम, ३६ वर्षीय कुलदीप राय र ७२ वर्षीया रजियादेवी रायको जाडोका कारण मृत्यु भएको छ। जिल्ला दैवी प्रकोप उद्दार समितिका संयोजक पाण्डेले भने दुई जनाको मात्र चिकोका कारण मृत्यु भएको पुष्टि गरेका छन्।
सप्तरीमा शीतलहरका कारण हरेक वर्ष सर्वसाधारणले ज्यान गुमाउने गरेका छन्। मुलुकमै सबैभन्दा बढी दलितको बसोबास रहेको सप्तरीका दलित परिवार अधिकांश विपन्न छन्। जिल्लामा करिब ३६ हजार भूमिहीन र सकुम्बासी रहेको अनुमान छ। सडक किनार तथा ऐलानी जग्गामा झुप्रो बारेर ज्याला मजदुरी गरी गुजारा गर्दै आएका अधिकांशको आर्थिक अवस्था नाजुग रहेको सुकुम्वासी तथा भूमिहीनको अधिकारका लागि काम गर्ने अभियन्ताहरु बताउँछन्।
उनीहरुका अनुसार अधिकांश भूमिहीन, सुकुम्बासी, दलित र विपन्न समुदायका व्यक्ति नै चिसोबाट प्रभावित भएका छन्। जसमा बालबालिका, वृद्ध र बिरामी बढी समस्यामा छन्। दलितमध्ये पनि मुसहर, बाँतर र डोम समुदाय चिसोको चपेटामा परेका छन्। कतिपय परिवार अहिले पनि पराल र सुक्कुलको भरमा गुजारा गर्दै आएका छन् भने झुप्रो समेत छाउने सामर्थ्य नहुँदा कतिपयले कष्टकर जीवन निर्वाह गरिरहेका छन्।
निरन्तरको शीतलहरले भूमिहीन, सुकुम्वासी, दलित र विपन्न समुदायका बालबालिका र वृद्धवुद्दाहरु बिरामी पर्न थालेका छन्। अस्पतालहरुमा बिरामीको संख्या थपिने क्रम जारी छ। निमोनिया, पखाला, रुघाखोकी, ज्वरो लगायतका बिरामी बढेको सगरमाथा अञ्चल अस्पतालका मेडिकल सुपरिटेन्डेन्ट डा दयाशंकरलाल कर्णले जानकारी दिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
