सुर्खेत– प्रदेश ६ को प्रस्तावित राजधानीका रुपमा हेरिएको सुर्खेत उपत्यकाको खानेपानी अभाव टार्न स्रोत वृद्धिको पहल थालिएको छ। हाल सञ्चालनमा रहेका आयोजनाले यहाँको माग पूर्ति गर्न नसकेपछि अल्पकालीन र दीर्घकालीन आयोजना सञ्चालन गर्न लागिएको हो।
भेरी नदीको पानी लिफ्टमार्फत सुर्खेत उपत्यकामा ल्याउने दीर्घकालीन योजनाका लागि सर्भे भइसकेको छ भने तत्कालका लागि खरीखोला र बोरीखोला आयोजनालाई विकल्पका रुपमा निर्माण गरिएको छ। उपत्यकामा खानेपानी आपूर्ति गर्दै आएको ‘झुप्रा बृहत् खानेपानी तथा सरसफाइ उपभोक्ता संस्था’ले खरीखोला र बोरीखोलाबाट प्रति सेकेन्ड २२ लिटर पानी थप आपूर्ति हुनेगरी आयोजना विस्तार गरेको हो।
आयोजना थप भएसँगै सुर्खेत उपत्यकामा अब खानेपानीको आपूर्ति केही सहज हुने अनुमान छ। खानेपानीको स्रोत थप भएपछि अब खडेरीको समयमा उपभोक्ताले विगतमा जस्तो सास्ती भोग्नुनपर्ने झुप्रा बृहत्का अध्यक्ष कुलमणि देवकोटाले जनाए। यसअघि खडेरीमा उपभोक्ताले ९६ घन्टासम्म पानीको पालो कुर्दै आएका थिए। तर, अबदेखि भने जस्तोसुकै खडेरीमा पनि उपभोक्ताको धारामा बढीमा २४ घन्टाको अन्तरालमा पानी आउने संस्थाका अध्यक्ष देवकोटाको दाबी छ।
‘अब पानीको अभाव धेरै हुँदैन, खडेरीमा पनि बढीमा २४ घन्टाभित्र सबैको धारामा पानीको पालो आउँछ, हामीले यसका लागि व्यवस्थापन गरेका छौं,’ अध्यक्ष देवकोटाले भने।
पानीको स्रोत थप भएसँगै अब संस्थाले थप धारा पनि वितरण गर्ने भएको छ। संस्थाले यसअघि नै अग्रिम भुक्तानी दिएका उपभोक्तालाई धारा बाँड्ने तयारी गरेको हो।
हाल सुर्खेत उपत्यकामा १५ हजार ३ सय ७६ धारा वितरण भएका छन्। प्रक्रिया पूरा भएका बाँकी २ हजार १ सय १५ वटा धारा पनि तत्काल वितरण हुनेछन्।
संस्थाले माग अनुसार उपभोक्तालाई सहज रूपमा धारा जडान गरिने जनाएको छ। संस्थाले २ वर्षभित्र उपत्यकामा ३५ हजार धारा जडान गर्ने लक्ष्य लिएको छ। पानीको स्रोत थप्दै जाने र स्थानीय कुवा र ढुंगे धाराहरू पनि संरक्षण गर्ने संस्थाको योजना छ।
‘अहिले सञ्चालनमा रहेको आयोजनाबाट दैनिक प्रति सेकेन्ड १ सय ४१ लिटर पानी आपूर्ति भइरहेको छ। उपत्यकामा दैनिक १ सय ७१ लिटर प्रति सेकेन्ड पानीको माग छ,’ देवकोटाले भने, ‘माग अनुसार उपत्यकामा अहिले प्रति सेकेन्ड ३३ लिटर पानी अपुग छ। यसकारण उपभोक्तालाई पालो अनुसार पानी वितरण गर्नु परेको हो।’
उपत्यकामा जनसंख्या बढ्दो क्रममा रहेका कारण खानेपानीको माग पनि बढ्दै गएको देवकोटाले बताए। माग अनुसार खानेपानीको व्यवस्थापन गर्न संस्थाले भेरी नदीको पानी उपत्यकामा ल्याउने प्रक्रिया अगाडि बढाएको छ। भेरीको पानी ल्याउन आवश्यक सर्भेको काम सम्पन्न भएको देवकोटाले जनाए। ‘अबको २ वर्षपछि भेरीबाट प्रति सेकेन्ड ७ सय लिटर पानी उपत्यकामा आउनेछ,’ उनले भने।
करिब १ सय वर्षसम्म उपत्यकालाई धान्न सक्नेगरी यो आयोजना सुरु हुन लागेको उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
